Song of Solomon 7

Shan NCL

← Chapter 6 Jump to: Chapter 8 →

1လုၵ်ႈယိင်းၶုၼ်႟။ တိၼ်မႂ်းၼၢင်းဢၼ် တိုဝ်းၶႅပ်းယူႇၼၼ်ႉ၊ပဵၼ်ဢၼ်ႁၢင်ႈလီႁၢင်ႈငၢမ်း ၼႃႇလူင်လၢင်လႄႈ ပွတ်းဢႅဝ်မႂ်းၼၢင်းၵေႃႈ၊ပဵၼ်ၸိူဝ်ႉၼင်ႇ လၢႆးမိုဝ်းၵေႃႉဢၼ်ၸၢင်ႈမေႃမႄးႁဵတ်း ဝႆႉၼၼ်ႉဢေႃႈ။

2တွင်ႉၼွႆႉမႂ်းၼၢင်းၼၼ်ႉ၊ပဵၼ်ၵွၵ်းၽလႃးဢၼ် တဵမ်ဝႆႉတင်းၼမ်ႉမၢၵ်ႇၸပိတ်ႉဢၼ် လေႃးၼမ်ႉယႃႁွမ်ၼၼ်ႉလႄႈ တွင်ႉမႂ်းၼၢင်းပဵၼ်ၵွင်ၶဝ်ႈပိူၵ်ႇဢၼ်ဢဝ်တင်းမွၵ်ႇႁဵဝ်းငိုၼ်းႁၢင်ႈၶိူင်ႈဝႆႉၼၼ်ႉဢေႃႈ။

3တဝ်ႈၼူမ်းမႂ်းၼၢင်းသွင်လုၵ်ႈၼၼ်ႉ၊မိူၼ်တိုင် ၽႃၽႄဢွၼ်ႇဢေႃႈ။

4ၶေႃးမႂ်းၼၢင်းပဵၼ်မိူၼ်သဝ်လၢင်းငႃးၸၢင်ႉလႄႈမၢၵ်ႇတႃမႂ်းၼၢင်းၼၼ်ႉ၊ပဵၼ်ၸိူဝ်ႉၼင်ႇ ၼမ်ႉၼွင်ဝဵင်း ႁေႇသၽုၼ်ႇ၊ ၵႃႈႁိမ်းၽၵ်းတူဝဵင်း ပႃႇသရပ်ႉပိမ်း၊ ဝဵင်းလူင်ဢၼ်ၵူၼ်းၵိုၼ်းၼႃႇၼၼ်ႉဢေႃႈ။ ၶူႈလင်မႂ်းၼၢင်းပဵၼ်မိူၼ်ထဵင်လၢင်း လေႇပၼုၼ်ႇ၊ ဢၼ်ဝၢႆႇၼႃႈတေႃႇ ဝဵင်း တမ်ႇမတ်ႉသၵတ်ႉ၊ ၼၼ်ႉဢေႃႈ။

5ၵွၵ်းႁူဝ်မႂ်းၼၢင်းပဵၼ်မိူၼ်လွႆ ၵရမေႇလႃႉ၊ လႄႈ ၶူၼ်ႁူဝ်မႂ်းၼၢင်းဢၼ်ၽိူဝ်ဝႆႉ၊ႁိူဝ်ႈမၢပ်ႈမိူၼ်ၽႄးပိၵ်ႈၶျေႃးလႄႈ တၢင်းဢၼ်ၶူၼ်ႁူဝ်ႁၢင်ႈလီႁၢင်ႈငၢမ်းၼၼ်ႉ၊ တိၵမ်ဢဝ်ၶုၼ်ႁေႃၶမ်းလႆႈဢေႃႈ။

6ၼၢင်းဢၼ်ၵဝ်ႁၵ်ႉၼႃႇၼႆႉ႟။ မႂ်းၼၢင်းပဵၼ်ဢၼ် ႁၢင်ႈလီႁၢင်ႈငၢမ်းၼႃႇလႄႈ ပဵၼ်တၢင်းဢၼ်ၵဝ်မူၼ်ႈပျေႃႇလူၺ်ႈတၢင်းႁၵ်ႉ တၢင်းပႅင်းမႂ်းၼၢင်းဢေႃႈ။

7မႂ်းၼၢင်းသုင်ၸၢမ်းလၢမ်း၊ငၢမ်းမိူၼ် တူၼ်ႈထၢၼ်လႄႈ တဝ်ႈၼူမ်းမႂ်းၼၢင်းမိူၼ်ပူၵ်ႉမၢၵ်ႇထၢၼ်ဢေႃႈ။

8ၵဝ်ဝႃႈ၊ “ၵဝ်တၵ်းၶိုၼ်ႈတူၼ်ႈထၢၼ်ၼၼ်ႉလႄႈ ဝိတ်းဢဝ်မၢၵ်ႇၼၼ်ဢေႃႈ၊” ဝႃႈၼႆဢေႃႈ။ ဢူဝ်း။ ႁႂ်ႈတဝ်ႈၼူမ်းမႂ်းၼၢင်းပဵၼ်ၸိူဝ်ႉၼင်ႇ ပူၵ်ႉမၢၵ်ႇၸပိတ်ႉဝႆႉလႄႈ ဢၢႆထူၺ်ႈၸႂ်မႂ်းၼၢင်းပဵၼ်ၸိူဝ်ႉၼင်ႇ ဢၢႆႁွမ်မၢၵ်ႇဝၢၼ်။

9ဢိၵ်ႇတင်းတၢင်းဢၼ်မႂ်းၼၢင်းၸုပ်ႇၼူမ် ပဵၼ်မိူၼ်ၼမ်ႉမၢၵ်ႇၸပိတ်ႉ၊ ဢၼ်လီၼႃႇသေပိူၼ်ႈၼၼ်ႉသေၵမ်း။ ပေႃးပဵၼ်ၼၼ်ၸိုင်၊ႁႂ်ႈၼမ်ႉမၢၵ်ႇၸပိတ်ႉၼၼ်ႉ လႆၸူးသိုဝ်ႈသိုဝ်ႈတီႈၸဝ်ႈဢၼ် ၶႃႈႁၵ်ႉပႅင်းၼၼ်ႉ၊ လႆၶဝ်ႈၵႃႈၼႂ်းသီႇသူပ်းၸဝ်ႈတင်းၶဵဝ်ႈ မၼ်းၸဝ်ႈၸိူဝ်းၼၼ်ႉၵႂႃႇသေၵမ်း။

10ၶႃႈပဵၼ်ၵေႃႉဢၼ်ၸဝ်ႈဢၼ်ၶႃႈႁၵ်ႉပႅင်း ၼႃႇၼၼ်ႉပိူင်ႇလႄႈ မၼ်းၸဝ်ႈၸၢင်ႈထုၵ်ႇၸႂ်ၵျိူၵ်ႈၸႂ်ဢေႃႈ။

11မႃးသေၵမ်း။ ၸဝ်ႈဢၼ်ၶႃႈၼၢင်း ႁၵ်ႉပႅင်းၼႃႇတီႈၶႃႈ႟။ ဢွၼ်ၵၼ်ဢွၵ်ႇၵႂႃႇၵႃႈတီႈတူင်ႈႁႆႈ တူင်ႈၼႃးလႄႈ ၵႂႃႇလိုဝ်ႈၵႂႃႇသွၼ်ႈၵႃႈၼႂ်းဝၢၼ်ႈၸိူဝ်းၼၼ်ႉ တီႈၶႃႈတႃႉႁဝ်း။

12ဢွၼ်ၵၼ်လုၵ်ႉၸဝ်ႉၸဝ်ႉလႄႈၵႂႃႇၵႃႈတီႈ သူၼ်မၢၵ်ႇၸပိတ်ႉ၊ ႁႂ်ႈလႆႈလူတူၺ်းတူၼ်ႈၶိူဝ်းမၢၵ်ႇၸပိတ်ႉ ဢၼ်မၼ်းဢွၵ်ႇတုမ်ႇမႃးယဝ်ႉႁိုဝ်၊ မွၵ်ႇမၼ်းၵီႈမႃးယဝ်ႉႁိုဝ်ၼၼ်ႉ၊ ဢိၵ်ႇတင်းႁႂ်ႈလႆႈလူတူၺ်းတူၼ်ႈမၢၵ်ႇၸင်ႈမွၵ်ႇမၼ်းမွၵ်ႇမႃးယဝ်ႉႁိုဝ်ၼၼ်ႉတီႈၶႃႈတႃႉႁဝ်း၊ ၵႃႈတီႈၼၼ်ႈ၊ၶႃႈၼၢင်းတၵ်းဢဝ်မႅတ်ႈတႃႇၶႃႈၼၢင်းဢၢပ်ႈပၼ်တီႈၸဝ်ႈႁဝ်းတီႈၶႃႈဢေႃႈ။

13ၸဝ်ႈႁဝ်းလႆႈၼူမ်ဢၢႆႁွမ်တူၼ်ႈယႃႈဢၶျူဝ်ႇ ဢိၵ်ႇတင်းမၢၵ်ႇဢၼ်ဝၢၼ်ၵူႈမဵဝ်း မီးၵႃႈတီႈႁိမ်းၽၵ်းတူ၊ ၸႃႉဢၼ်ပႃးမၢၵ်ႇၵဝ်ႇတင်းမၢၵ်ႇမႂ်ႇဢၼ် ၶႃႈၼၢင်းလႆႈသိမ်းဝႆႉပုၼ်ႈၸဝ်ႈႁဝ်း တီႈၶႃႈယဝ်ႉ။ ၸဝ်ႈဢၼ်ၶႃႈႁၵ်ႉၼႃႇ႟။

← Chapter 6 Jump to: Chapter 8 →