3 John 1

Shan

Jump to:

1ၵေႃႉဢၼ်ဢသၢၵ်ႈယႂ်ႇၼႆႉ တႅမ်ႈပၼ်ငိၼ်းၵႂႃႇတီႈ ၵႃႇယူႉ ဢၼ်လီႁၵ်ႉလီပႅင်းၼၼ်ႉဢေႃႈ။

2ၵေႃႉဢၼ်ၵဝ်ႁၵ်ႉဢိူၺ်း၊ လွင်ႈၼင်ႇႁိုဝ် မႂ်းတၵ်းမီးတၢင်းဢၼ်လႆႈလီလႆႈပဵၼ် ဢိၵ်ႇတင်းတၢင်းဢၼ်ယူႇလီၵိၼ်ဝၢၼ် ၼႂ်းလွင်ႈတၢင်းဢၼ် ၵူႈၸိူဝ်ႉၵူႈပိူင်ၸွမ်းၵႃႈၼင်ႇဢၼ် ႁူဝ်ၸႂ်မႂ်း လႆႈလီလႆႈပဵၼ်ၼၼ်ႉၸိုင် ၵဝ်သူးတွင်းယူႇဢေႃႈ။-

3မိူဝ်ႈဢၼ်ပီႈၼွင်ႉမႃးလႄႈ ၶၢမ်ႇသၢၵ်ႈသေႇ လွင်ႈသမ်ႇမႃႇတြႃးဢၼ်မီးၼႂ်းမႂ်း ဢၼ်မႅၼ်ႈၸွမ်းၵႃႈၼင်ႇဢၼ် မႂ်းၵႂႃႇၵႂႃႇမႃးမႃးယူႇ ၼႂ်းသမ်ႇမႃႇတြႃးၼၼ်ႉၸိုင်၊ ၵဝ်မီးတၢင်းဢၼ်သိူဝ်းပျေႃႇၼႃႇဢေႃႈ။-

4တၢင်းသိူဝ်းပျေႃႇ ဢၼ်ယဵင်ႈၶႅၼ်းယႂ်ႇလိူဝ်တွၼ်းသေတၢင်းဢၼ်ၵဝ်ငိၼ်းလႄႈ သိူဝ်းပျေႃႇလူၺ်ႈလွင်ႈ လုၵ်ႈလၢင်းၵဝ်တင်းလၢႆ ၵႂႃႇၵႂႃႇမႃးမႃးယူႇ ၼႂ်းသမ်ႇမႃႇတြႃးၼၼ်ႉဢမ်ႇမီး။

5ၵေႃႉဢၼ်ၵဝ်ႁၵ်ႉဢိူၺ်း၊ မႂ်းၸၢင်ႈဢဝ်တင်းသဵတ်ႈၸႃႇ ႁဵတ်းၼႂ်းဝၢတ်ႈ ဢၼ်မႂ်းႁဵတ်းၵႃႈတီႈပီႈၼွင်ႉ ဢိၵ်ႇတင်းၶႅၵ်ႇတင်းလၢႆ ၵူႈၸိူဝ်ႉၵူႈပိူင်ၼၼ်ႉဢေႃႈ။-

6ၶဝ်ၼၼ်ႉၶၢမ်ႇသၢၵ်ႈသေႇ လွင်ႈတၢင်းႁၵ်ႉမႅတ်ႈတႃႇမႂ်း ၵႃႈတီႈၽၢႆႇၼႃႈၸိူဝ်းၸဝ်ႈဢေႃႈ။ ပေႃးမႂ်းၸွမ်းသူင်ႇၶဝ် ၵႃႈၼင်ႇဢၼ်မႅၼ်ႈၵၼ်တင်း ဢလူဝ်ႇၽြႃးပဵၼ်ၸဝ်ႈၸိုင် မႂ်းတၵ်းႁဵတ်း လွင်ႈတၢင်းဢၼ်လီဢၼ်ငၢမ်းဢေႃႈ။-

7လွင်ႈမၼ်းၸမ်ႉ ၶဝ်ၼၼ်ႉထွၵ်ႈလူၺ်ႈၼႃႇမႃႉၸိုဝ်ႈသဵင်ၸဝ်ႈလႄႈ၊ ယင်းဢမ်ႇၶၢမ်ႇဢမ်ႇဢဝ် တၢင်းလူႇတၢင်းတၢၼ်း ၵႃႈၼႂ်းၵူၼ်း သႃႇသၼႃႇပႃႉ တင်းလၢႆလႄႈၵႂႃႇဢေႃႈ။-

8ႁဝ်းလီႁဵတ်းဝၢတ်ႈၶႅၵ်ႇ ၵႃႈတီႈၶဝ်ၸိူဝ်ႉၼင်ႇၼၼ်ၼၼ်ႉ ႁႂ်ႈလႆႈပဵၼ်ၵေႃႉဢၼ် ၸွႆႈထႅမ်သမ်ႇမႃႇတြႃးဢေႃႈ။

9ၵဝ်တႅမ်ႈလိၵ်ႈလႄႈ ပၼ်ၵႂႃႇတီႈၸိူဝ်းၸဝ်ႈယဝ်ႉ။ ၵူၺ်းၵႃႈ တယေႃႇတရပ်ႉ ဢၼ်ၶႂ်ႈပဵၼ်ၵႄႇပဵၼ်ႁူဝ်ပိူၼ်ႈၼၼ်ႉ ဢမ်ႇႁပ်ႉတုင်းဢဝ်ႁဝ်း။-

10ပိူဝ်ႈၼႆလႄႈ မိူဝ်ႈဢၼ်ၵဝ်မႃးၸိုင်၊ ၵဝ်တၵ်းႁဵတ်းႁႂ်ႈမၼ်း ၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းဢၼ်မၼ်းႁဵတ်းၼၼ်ႉဢေႃႈ။ ၵေႃႉၼၼ်ႉဢဝ်တင်းၵႂၢမ်း ဢၼ်သီႈၵေႉသႄႉသွမ်းႁဝ်းယဝ်ႉဢမ်ႇၵႃး၊ ယင်းဢမ်ႇပေႇၸႂ်လူၺ်ႈ တၢင်းဢၼ်သႄႉဢၼ်သွမ်းၼၼ်ႉလႄႈ တူဝ်ၸဝ်ႈၵဝ်ႇယင်းဢမ်ႇႁပ်ႉတုင်းဢဝ် ပီႈၼွင်ႉတင်းလၢႆ၊ ၸၢင်ႈႁႄႉၶႅၼ်ၶဝ်ၸိူဝ်းဢၼ် ၶႂ်ႈႁပ်ႉတုင်းဢဝ်ၼၼ်ႉသေလႄႈ ႁေႃႈဢွၵ်ႇသေၵႃႈၼႂ်းၸိူဝ်းၸဝ်ႈဢေႃႈ။

11ၵေႃႉဢၼ်ၵဝ်ႁၵ်ႉဢိူၺ်း၊ ယႃႇပေၸွမ်းၼႄး ဢၼ်ဢမ်ႇလီဢမ်ႇငၢမ်း။ ၸွမ်းၼႄး ဢၼ်လီဢၼ်ငၢမ်းၵူၺ်းတႃႉ။ ၵေႃႉဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢၼ်ငၢမ်းၼၼ်ႉ ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈဢေႃႈ။ ၵေႃႉဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ဢမ်ႇလီဢမ်ႇငၢမ်းၼၼ်ႉ ဢမ်ႇႁူႉႁၼ်ၽြႃးပဵၼ်ၸဝ်ႈ။

12ၵူၼ်းတင်းသဵင်ႈတင်းလူင်ပဵၼ်သၢၵ်ႈသေႇ တေႇမေႇတရီႉ ဢေႃႈ။ သမ်ႇမႃႇတြႃးၵေႃႈပဵၼ်သၢၵ်ႈသေႇမၼ်းဢေႃႈ။ ႁဝ်းၵေႃႈ ၶၢမ်ႇသၢၵ်ႈသေႇၽၢႆႇမၼ်းဢေႃႈ။ လွင်ႈတၢင်းဢၼ်ႁဝ်း ၶၢမ်ႇသၢၵ်ႈသေႇၼၼ်ႉ ပဵၼ်ဢၼ်ၸိုဝ်ႈဢၼ်ၸႂ်ႈၼၼ်ႉၸိုင် မႂ်းႁူႉယူႇဢေႃႈ။

13ပိၵ်ႉသမ်ႉၵဝ်မီးလွင်ႈတၢင်းဢၼ် လီတႅမ်ႈပၼ်ၵႂႃႇၵႃႈတီႈမႂ်းၼမ်ၼႃႇသေၵေႃႈ၊ ၵဝ်ဢမ်ႇမီးဢလူဝ်ႇ ၶႂ်းဢဝ်တင်းၼမ်ႉမိုၵ်ႉတႅမ်ႈသႂ်ႇၵႃႈၼိူဝ်ၸေႈ။-

14ဢမ်ႇႁိုင်ဢမ်ႇၼၢၼ်း ၵဝ်တၵ်းထူပ်းႁၼ်မႂ်းလႄႈ လၢတ်ႈၵႂၢမ်းတေႃႇၵၼ်တင်းမႂ်းဝႃႈၼႆ ၵဝ်မုင်ႈထႃႈမွင်းထႃႈယူႇဢေႃႈ။

15ႁႂ်ႈတၢင်းၼိမ် မီးၼိူဝ်မႂ်းသေၵမ်းလူၺ်ႈ။ ၵေႃႉသေႈၸိူဝ်းၼႆႉ တၵ်ႉၼၢႆမႂ်းဢေႃႈ။ ဢဝ်ၸိုဝ်ႈသဵင်ၵေႃႉသေႈ ဢၼ်မီးတီႈမႂ်းၼၼ်ႉ ဢွၵ်ႇသေလႄႈ တၵ်ႉၼၢႆသေၵမ်း။ လိၵ်ႈဢေႃးဝႃႇတႃႉယူဝ်းႁၢၼ်ႇၽိုၼ်တႃႉတီႉယႃႉယဝ်ႉယဝ်ႉဢေႃႈ။

Jump to: