Colossians 1

Shan

Jump to: Chapter 2 →

1ၵဝ် ပေႃးလူႉ ဢၼ်ပဵၼ်တမၢၼ်ႇၸဝ်ႈ ယေႇသူႉၶရိၸ်ႈ ၵွပ်ႈပိူဝ်ႈဢလူဝ်ႇၽြႃးပဵၼ်ၸဝ်ႈ ဢိၵ်ႇတင်းၼွင်ႉၵဝ် တီႉမေႃးသေႇ ၼႆႉ၊-

2ပၼ်ငိၼ်းၵႂႃႇတီႈၵူၼ်းမူတ်းၸၢင်ႇတင်းလၢႆ ဢၼ်မီးယူႇၵႃႈၼႂ်းဝဵင်း ၵေႃးလေႃးသေး ဢၼ်ဝႃႈပီႈၼွင်ႉဢၼ်ယုမ်ႇမၢတ်ႈ ယေႇသူႉၶရိၸ်ႈ ဢေႃႈ။ ႁႂ်ႈသူႉၵျေးၸူးဢိၵ်ႇတင်းတၢင်းၼိမ် ဢၼ်ပဵၼ်မႃးၵႃႈတီႈၽြႃးပေႃႈၸဝ်ႈ တင်းၸဝ်ႈ ယေႇသူႉၶရိၸ်ႈ ၼၼ်ႉ မီးၼိူဝ်သူသေၵမ်းလူၺ်ႈ။

3ၵွပ်ႈပိူဝ်ႈဢၼ်ႁဝ်းလႆႈငိၼ်း လွင်ႈဢၼ်သူယုမ်ႇမၢတ်ႈ ယေႇသူႉၶရိၸ်ႈ လႄႈႁၵ်ႉၵူၼ်းမူတ်းၸၢင်ႇ တင်းသဵင်ႈတင်းလူင်

4ဢိၵ်ႇတင်းၵွပ်ႈပိူဝ်ႈဢၼ်ႁဝ်း ထွၵ်ႈလူၺ်ႈတၢင်းဢၼ် မုင်ႈထႃႈမွင်းထႃႈဢၼ်သူသိမ်းပႅင်းဝႆႉပုၼ်ႈသူ ၵႃႈၼိူဝ်မိူင်းၵၢင်ႁၢဝ်ပုၼ်ႉ

5ၵႃႈၼင်ႇဢၼ်သူလႆႈငိၼ်းၼႂ်းသမ်ႇမႃႇတြႃးဢၼ်ဝႃႈ တြႃးသတၢင်းသိူဝ်းပျေႃႇ မိူဝ်ႈဢွၼ်ၼႆႉၼၼ်ႉလႄႈ ႁဝ်းသူးတွင်းပုၼ်ႈသူ ယူႇတႃႇသေႇဢမ်ႇထၢတ်ႇလႄႈ ယွင်ႈယေႃးၵျေးၸူးၽြႃးပဵၼ်ၸဝ်ႈ ဢၼ်ဝႃႈပေႃႈၸဝ်ႈႁဝ်း ယေႇသူႉၶရိၸ်ႈ ၼၼ်ႉဢေႃႈ။-

6တြႃးၼၼ်ႉလႆႈႁွတ်ႈထိုင်ၵႃႈတီႈဢၼ်သူမီးၼၼ်ႉယဝ်ႉ။ မိူၼ်ၸိူဝ်ႉၼင်ႇဢၼ်ၸွတ်ႇတူဝ်ႈၵႃႈၼႂ်းမိူင်းလေႃးၵီႇ ၵူႈတီႈၵူႈလႅၼ်ၼၼ်ႉလႄႈ ႁဵတ်းတၢင်းဢၼ်မၢၵ်ႇမၢၵ်ႇဢိၵ်ႇတင်း တၢင်းဢၼ်ယႂ်ႇၽႄႈၼမ်ၵိုၼ်းမႃးၼႂ်းသူ ၸႃႉၸဵမ်မိုဝ်ႉဝၼ်းဢၼ်သူလႆႈငိၼ်းလႄႈ ႁူႉၵျေးၸူးၽြႃးပဵၼ်ၸဝ်ႈ ၼႂ်းသမ်ႇမႃႇတြႃးၼၼ်ႉ၊-

7ၵႃႈၼင်ႇဢၼ်သူလႆႈသွၼ်ဢဝ်တီႈ ဢေႇပႃႇၽြႃႉ ၶႃႈၸဝ်ႈၼင်ႇၵၼ်ၵၼ်၊ ဢၼ်ႁဝ်းႁၵ်ႉဢၼ်ဝႃႈသြႃႇ ဢၼ်ပႂ်ႉဢမူႉသူလႄႈ မီးသဵတ်ႈၸႃႇ ၼႂ်းၸဝ်ႈၶရိၸ်ႈ၊-

8ဢၼ်ၼႄပျႃးမႅတ်ႈတႃႇဝီႉၺိၺ်ႇပၵတီႉ ဢၼ်မီးယူႇၵႃႈၼႂ်းသူတီႈႁဝ်းၼၼ်ႉဢေႃႈ။

9ပိူဝ်ႈၼႆလႄႈ ၸႃႉၸဵမ်မိုဝ်ႉဝၼ်းဢၼ်ႁဝ်းလႆႈငိၼ်းၼၼ်ႉ၊ ႁဝ်းႁဵတ်းသူးတွင်းပထၼႃႇပုၼ်ႈသူယူႇ တႃႇသေႇဢမ်ႇထၢတ်ႇဢေႃႈ။ လွင်ႈတၢင်းဢၼ်ႁဝ်းသူးတွင်းၸမ်ႉ၊ ၼင်ႇႁိုဝ်သူတၵ်းလႆႈမီးတင်းပိင်ႇၺႃႇတင်း ထမ်ႇမႃႉၺၢၼ်ႇၵူႈၸိူဝ်ႉၵူႈပိူင်လႄႈ ပျေႉၸုမ်ႇတင်း တၢင်းဢၼ်ႁူႉၸႅင်ႈ ဢလူဝ်ႇၽြႃးပဵၼ်ၸဝ်ႈ ႁႂ်ႈသူလႆႈမီးတၢင်းဢၼ်မၢၵ်ႇမၢၵ်ႇဢၼ်ဝႃႈ တၢင်းၵမ်တၢင်းၵျၢင်ႉဢၼ်လီဢၼ်ငၢမ်းၵူႈၸိူဝ်ႉၵူႈပိူင်လႄႈ ယႂ်ႇၽႄႈ ၼမ်ၵိုၼ်းမႃး ၼႂ်းၺၢၼ်ႇဢၼ်ႁူႉၽြႃးပဵၼ်ၸဝ်ႈၼၼ်ႉယူႇ၊-

10ပျေႉၸုမ်ႇတင်းႁႅင်းၵူႈၸိူဝ်ႉၵူႈပိူင် ၵႃႈၼင်ႇတၼ်းၶူဝ်းၸဝ်ႈဢၼ်မုၼ်ၽုင်းယႂ်ႇၼႃႇၼၼ်ႉ ပုၼ်ႈတၢင်းဢၼ်ယိူၼ်ႉၶၢမ်ႇၼႂ်းၵူႈၸိူဝ်ႉၵူႈပိူင်၊ တၢင်းဢၼ်ၸႂ်ယႂ်ႇၸႂ်ယၢဝ်းဢိၵ်ႇတင်းၸႂ်ဢၼ်သိူဝ်းဢၼ်ပျေႃႇၼၼ်ႉယူႇ၊-

11ယွင်ႈယေႃးၵျေးၸူးၽြႃးပေႃႈၸဝ်ႈယူႇသေလႄႈ ၵမ်ၵျၢင်ႉၵႃႈၼင်ႇဢၼ်ထိူၵ်ႈတၢၼ်ႇတင်းၸဝ်ႈၽြႃးလႄႈ ထုၵ်ႇၸႂ်မၼ်းၸဝ်ႈၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉၸိုင်၊ ႁဝ်းႁဵတ်းသူးတွင်းပထၼႃႇဢေႃႈ။-

12မၼ်းၸဝ်ႈၼၼ်ႉႁဵတ်းၵျေးၸူးႁႂ်ႈႁဝ်းလႆႈထိူၵ်ႈၶဝ်ႈၸၢမ်ႇၸႃး သိူၵ်ႈသမ်ႇဢမူၺ်ႇၵူၼ်းမူတ်းၸၢင်ႇတင်းလၢႆ ဢၼ်ယူႇၵႃႈၼႂ်းဢၼ်လႅင်းၼၼ်ႉလႄႈ၊-

13ၼုၵ်ႈဢဝ်ႁဝ်းဢွၵ်ႇၵႃႈၼႂ်းတၼ်းၶူဝ်းဢၼ်လပ်းသိင်ႇသေလႄႈ သႂၢင်းသႂ်ႇၵႃႈၼႂ်းမိူင်းလုၵ်ႈၸဝ်ႈ ဢၼ်မၼ်းၸဝ်ႈႁၵ်ႉၼၼ်ႉဢေႃႈ။-

14ၵွပ်ႈပိူဝ်ႈလုၵ်ႈၸဝ်ႈၼၼ်ႉလႄႈ ႁဝ်းလႆႈၶၢမ်ႇဢဝ်ၵျေးၸူးတၢင်းဢၼ်မၼ်းၸဝ်ႈ ထုတ်ႇဢဝ်ဢၼ်ဝႃႈ တၢင်းဢၼ်မၼ်းၸဝ်ႈပွႆႇလွတ်ႈဢပႅတ်ႈၼၼ်ႉဢေႃႈ။

15လုၵ်ႈၸဝ်ႈၼၼ်ႉပဵၼ်ပုင်ႇႁၢင်ႈၽြႃးပဵၼ်ၸဝ်ႈ ဢၼ်ဢမ်ႇႁၼ်လႆႈၼၼ်ႉလႄႈ ပဵၼ်လုၵ်ႈတူၼ်ႈ ၼႂ်းဝူၺ်ႇၼေႇယႃႉသတ်ႉတဝႃႇတင်းသဵင်ႈတင်းလူင်ဢေႃႈ။-

16လွင်ႈမၼ်းၸမ်ႉ ၼႂ်းလုၵ်ႈၸဝ်ႈၼၼ်ႉ၊ လွင်ႈတၢင်းဢၼ်မီးၵႃႈၼိူဝ်ၵၢင်ႁၢဝ်၊ လွင်ႈတၢင်းဢၼ်မီးၵႃႈၼိူဝ်လိၼ်မိူင်း၊ လွင်ႈတၢင်း ရူႇပႃႉ၊ လွင်ႈတၢင်းဢႃႉရူႇပႃႉ၊ ပဵၼ်ရႃႇၸႃႉပလၢင်ႇသေဢမ်ႇဝႃႈ၊ ပဵၼ်တၼ်းၶူဝ်းတၢင်းဢၼ်ဢုပ်ႉပိူင်ႇသေဢမ်ႇဝႃႈ၊ ပဵၼ်ဢၼ်ထွတ်ႈဢၼ်မျၢတ်ႈသေဢမ်ႇဝႃႈ၊ ပဵၼ်ဢႃႇၼႃႇၸၢၵ်ႈသေဢမ်ႇဝႃႈ၊ လွင်ႈတၢင်းၵႃႈမီးတင်းသဵင်ႈတင်းလူင်ၼၼ်ႉ လႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်း ပဵၼ်ဢေႃႈ။ လွင်ႈတၢင်းၵႃႈမီးတင်းသဵင်ႈတင်းလူင် လႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ် ၵွပ်ႈပိူဝ်ႈၸဝ်ႈၼၼ်ႉ ဢိၵ်ႇတင်းပုၼ်ႈၸဝ်ႈၼၼ်ႉဢေႃႈ။-

17လုၵ်ႈၸဝ်ႈၼၼ်ႉပဵၼ်ၸဵမ်မိူဝ်ႈ ၸူဝ်ႈဢၼ်လွင်ႈတၢင်းၵႃႈမီးတင်းသဵင်ႈတင်းလူင် ဢမ်ႇပႆႇပဵၼ်ၼၼ်ႉလႄႈ လွင်ႈတၢင်းၵႃႈမီးတင်းသဵင်ႈတင်းလူင်ၼၼ်ႉ တႄႇယူႇၼႂ်းမၼ်းၸဝ်ႈဢေႃႈ။-

18မၼ်းၸဝ်ႈပဵၼ်ႁူဝ်တူဝ် ဢၼ်ဝႃႈၸိူဝ်းၸဝ်ႈဢေႃႈ။ မၼ်းၸဝ်ႈပဵၼ်မူႇလႃႉငဝ်ႈႁၢၵ်ႈလႄႈ ပဵၼ်လုၵ်ႈတူၼ်ႈ ၼႂ်းၶဝ်ၸိူဝ်းဢၼ်တၢႆယဝ်ႉၼၼ်ႉ ႁႂ်ႈယဵင်ႈၶႅၼ်းမျၢတ်ႈၼႃႇသေပိူၼ်ႈ ၼႂ်းၵူႈၸိူဝ်ႉၵူႈပိူင်ဢေႃႈ။-

19လွင်ႈမၼ်းၸမ်ႉ ၽြႃးပဵၼ်ၸဝ်ႈမီးဢလူဝ်ႇၶႂ်ႈႁႂ်ႈ တၢင်းဢၼ်ပျေႉၸုမ်ႇၵႃႈမီးတင်းသဵင်ႈတင်းလူင် ၵိင်းဝၢပ်ႈယူႇၵႃႈၼႂ်းလုၵ်ႈၸဝ်ႈၼၼ်ႉလႄႈ၊-

20ႁႂ်ႈတၢင်းၽိတ်းထၢတ်ႇယဵၼ်ၵွပ်ႈပိူဝ်ႈ လိူတ်ႈၸဝ်ႈဢၼ်သွၼ်းလေႃႇ ၵႃႈၼိူဝ်သဝ်လၵ်းဝႃးၵၢပ်ႈၼၼ်ႉသေယဝ်ႉ၊ ႁႂ်ႈလွင်ႈတၢင်း ၵၢင်ႁၢဝ်သေဢမ်ႇဝႃႈ၊ လွင်ႈတၢင်းလိၼ်မိူင်းသေဢမ်ႇဝႃႈ၊ လွင်ႈတၢင်းၵႃႈမီးတင်းသဵင်ႈတင်းလူင်ၼၼ်ႉ ႁဵတ်းမိၵ်ႉသႃႇႁႃယႃႉတၢင်းဢၼ် ထုၵ်ႇၵၼ်တင်း တူဝ်ၸဝ်ႈၵဝ်ႇ ၵွပ်ႈပိူဝ်ႈလုၵ်ႈၸဝ်ႈၼၼ်ႉဢေႃႈ။

21သူၸိူဝ်းဢၼ်ၽၢတ်ႇယၢၼ်ၵၼ်တင်း မၼ်းၸဝ်ႈမိူဝ်ႈဢွၼ်ၼႆႉၼၼ်ႉလႄႈ ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ႁၢႆႉမိူၵ်ႈသေယဝ်ႉ၊ ပဵၼ်ရၢၼ်ႇသူႇၼႂ်းႁူဝ်ၸႂ်သူၼၼ်ႉၸိုင်၊ တေႃႈလဵဝ်ၼႆႉမၼ်းၸဝ်ႈႁႂ်ႈႁဵတ်း မိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းမၼ်းၸဝ်ႈၵွပ်ႈပိူဝ်ႈဢၼ် ၸဝ်ႈၼၼ်ႉၶၢမ်ႇတၢင်းတၢႆ ၼႂ်းတူဝ်ၶၼ်ႇထႃႇဢေႃႈ။-

22လွင်ႈမၼ်းၸမ်ႉ ပေႃးသူပႃးတၢင်းဢၼ်ၶျႃးငဝ်ႈႁၢၵ်ႈတိူၵ်ႈ ဢိၵ်ႇတင်း တၢင်းဢၼ်တႄႇဝႆႉၼၼ်ႉလႄႈ မီးယူႇၼႂ်းတၢင်းဢၼ်ယုမ်ႇမၢတ်ႈတႃႇသေႇ မၼ်ႈမၼ်ႈၶိူင်ႇၶိူင်ႇလႄႈ

23ဢမ်ႇၶၢႆႉသုတ်ႉယိုတ်းၶိုၼ်းသေၵႃႈၼႂ်းတၢင်းဢၼ်မုင်ႈထႃႈမွင်းထႃႈတြႃးသတၢင်းသိူဝ်းပျေႃႇ ဢၼ်သူလႆႈငိၼ်းဢၼ်လႆႈၶၢမ်ႇတၢင်းဢၼ်ႁေႃးလၢတ်ႈတီႈဝူၺ်ႇၼေႇယႃႉသတ်ႉတဝႃႇ ၵႃႈဢၼ်မီးၵႃႈတႂ်ႈၽႃႉၵၢင်ႁၢဝ်၊ ဢၼ်ၵဝ် ပေႃးလူႉ လႆႈၶၢမ်ႇဢရႃႇ တၢင်းၸႂ်ႉတၢင်းသွႆ ဢၼ်ႁေႃးလၢတ်ႈၼၼ်ႉယူႇၸိုင်၊ လွင်ႈၼင်ႇႁိုဝ်မၼ်းၸဝ်ႈတၵ်းဢဝ်သူၸိူဝ်းဢၼ် မူတ်းၸၢင်ႇၶၢဝ်သႂ်လႄႈ လွတ်ႈတင်းဢပႅတ်ႈၼၼ်ႉ သၢၵ်ႈၵၢပ်ႈၵႃႈတီႈ ၽၢႆႇၼႃႈၽြႃးပဵၼ်ၸဝ်ႈၼၼ်ႉၸိုင်၊ ၸင်ႇပဵၼ်ဢေႃႈ။

24တေႃႈလဵဝ်ၼႆႉ ၵဝ်သိူဝ်းပျေႃႇၼႂ်းတၢင်းဢၼ် ၵဝ်ၶၢမ်ႇတၢင်းၽၢၼ် ပုၼ်ႈသူလႄႈ ႁႂ်ႈတုၵ်ႉၶႃႉတၢင်းၽၢၼ်ၸဝ်ႈၶရိၸ်ႈ ဢၼ်ၵိုတ်းဢၼ်ၵျၢၼ်ႇၼၼ်ႉ ပျေႉၸုမ်ႇၵႃႈၼႂ်းတူဝ်ၶၼ်ႇထႃႇၵဝ် ပုၼ်ႈတူဝ်ၸဝ်ႈဢၼ်ဝႃႈ ၸိူဝ်းၸဝ်ႈၼၼ်ႉဢေႃႈ။-

25ၵဝ်ထိုင်ပဵၼ်ထမ်ႇမႃႉသြႃႇ ၼႂ်းၸိူဝ်းၸဝ်ႈၸွမ်းၵႃႈၼင်ႇဢၼ်မႅၼ်ႈတင်းသႃႇသၼႃႇဢၼ်ၽြႃးပဵၼ်ၸဝ်ႈထွၵ်ႈလူၺ်ႈဢၵျူဝ်းသူသေလႄႈ ဢၢပ်ႈပၼ်တီႈၵဝ်ၼၼ်ႉ၊-

26ႁႂ်ႈၵဝ်လႆႈႁေႃးလၢတ်ႈၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ တင်းသဵင်ႈတင်းမူတ်းဢၼ်ဝႃႈ တၢင်းဢၼ်လိုၵ်ႉဢၼ်လမ်ႇဢၼ်သိူင်ႇဝႆႉ လပ်ႉဝႆႉ ၵႃႈၼႂ်းၵၢပ်ႈၵႃႇလႃႉ မိူဝ်ႈဢွၼ်ၼႆႉတင်းသဵင်ႈတင်းလူင်ၼၼ်ႉသေၵေႃႈ၊ တေႃႈလဵဝ်ၼႆႉ ၽုၺ်ႇဢွၵ်ႇၼႄပျႃး တီႈၵူၼ်းမူတ်းၸၢင်ႇတင်းလၢႆၼၼ်ႉဢေႃႈ။-

27မႁႃႇၸေးၸိမ်ႇ ဢၼ်ၸၢပ်ႈသႅင်ႇၵၼ်တင်း တၢင်းဢၼ်လိုၵ်ႉဢၼ်လမ်ႇၼၼ်ႉၸမ်ႉ၊ ယႂ်ႇၼႃႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆထၢၼ်ႇႁိုဝ်ဝႃႈၼႆ၊ ၽြႃးပဵၼ်ၸဝ်ႈမီးဢလူဝ်ႇၶႂ်ႈႁႂ်ႈ ၵူၼ်းမူတ်းၸၢင်ႇတင်းလၢႆႁူႉဢေႃႈ။ ၸေးၸိမ်ႇၼၼ်ႉၸမ်ႉ၊ ပဵၼ်ၸဝ်ႈၶရိၸ်ႈ ဢၼ်တႄႇယူႇၼႂ်းသူဢၼ်ဝႃႈ လွင်ႈတၢင်းဢၼ် မုင်ႈထႃႈမွင်းထႃႈမုၼ်သရေႇဢေႃႈ။-

28ႁဝ်းပၼ်သတီႉတီႈၵူၼ်းတင်းသဵင်ႈတင်းလူင်ယူႇ ဢဝ်တင်းပိင်ႇၺႃႇၵူႈၸိူဝ်ႉၵူႈပိူင်သင်ႇသွၼ်သုင်းမႃႉပၼ်ယူႇသေလႄႈ ႁေႃးလၢတ်ႈတြႃးၸဝ်ႈၶရိၸ်ႈ ႁႂ်ႈၵူႈၵေႃႉၵူႈၵူၼ်း လႆႈႁွတ်ႈထိုင်တၢင်းဢၼ် ၸေးၸုမ်ႇၼႂ်းၸဝ်ႈၶရိၸ်ႈသေလႄႈ ႁဝ်းလႆႈဢဝ်ၶဝ် သၢၵ်ႈၵၢပ်ႈဢေႃႈ။-

29ၵဝ်ပွင်ႁဵတ်းဢမူႉ ႁႂ်ႈလႆႈပဵၼ်ၸိူဝ်ႉၼင်ႇၼၼ်လႄႈ ၵႆႉၵျူဝ်းၸႃး ၵႃႈၼင်ႇတၢင်းဢၼ် မၼ်းၸဝ်ႈဢဝ်တင်းတၼ်းၶူဝ်းၸဝ်ႈ ပွင်ႁဵတ်းၵႃႈၼႂ်းၵဝ်ၼၼ်ႉယူႇဢေႃႈ။

Jump to: Chapter 2 →