Habakkuk 2

Shan

← Chapter 1 Jump to: Chapter 3 →

1ၵဝ်တၵ်းၸုၵ်းယူႇ ၵႃႈၼိူဝ်ထဵင်လၢင်းၵဝ်လႄႈ မီးယူႇၵႃႈတီႈ တိူၵ်ႈတီႈတိုၵ်းသိုၵ်းသေလႄႈ ပႂ်ႉထႃႈလွင်ႈဢၼ်မၼ်းၸဝ်ႈ တၵ်းမီးဢမိင်ႉတီႈၵဝ် ၸိူဝ်ႉၼင်ႇႁိုဝ် ဢိၵ်ႇတင်း လွင်ႈဢၼ်ၵဝ် တၵ်းလႆႈၶိုၼ်းလဝ်ႊလၢတ်ႈ လူၺ်ႈလွင်ႈတၢင်းဢၼ် ၵဝ်ၶၢင်းၶီၶၢင်းၽၢၼ်ၼၼ်ႉ ၸိူဝ်ႉၼင်ႇႁိုဝ်ၼၼ်ႉဢေႃႈ။-

2ထႃႇဝရႃႉၽြႃး ၶိုၼ်းဢိူဝ်တီႈၵဝ်လႄႈဝႃႈ၊ မႂ်းတႅမ်ႈပျႃႇတိၵ်ႈ ရူႇပႃႇရူင်ႇဝႆႉလႄႈ ႁႂ်ႈမၼ်းမီးဝႆႉယူႇ ၵႃႈၼိူဝ်သၢင်ႇပုၼ်း ထၢင်ႇထၢင်ႇသႃးသႃး ႁႂ်ႈထၼ်ႈပေႃးၵေႃႉဢၼ်ၽတ်းၼၼ်ႉ ၶုၼ်ႇလႅၼ်ႈယူႇသေလႄႈ ၽတ်းလႆႈတႃႉ။-

3ရူႇပႃႇရူင်ႇၼၼ်ႉ ၸၢပ်ႈသႅင်ႇၵၼ်တင်းၶိင်ႇ မိူဝ်ႈဢၼ် မၵ်းၶိၼ်းဝႆႉၼၼ်ႉလႄႈ မၼ်းတၵ်းလၢတ်ႈၼႂ်းၶိင်ႇမိူဝ်ႈဢၼ်ပဵၼ် တီႈသုတ်းတီႈၵွႆမၼ်းလႄႈ ၵၢင်းလွတ်ႈတင်းမူႉသႃႇဢေႃႈ။ ပိၵ်ႉသမ်ႉမၼ်းၵိုတ်းသဝ်းယူႇသေၵေႃႈ မုင်ႈထႃႈမွင်းထႃႈယူႇတႃႉ။ မၼ်းယင်းဢမ်ႇတူၵ်းလိုၼ်းလႄႈ တၵ်းႁွတ်ႈထိုင်ဢမၢၼ်ႇၶၼ်ပဵၼ်ဢေႃႈ။-

4တူၺ်းလူး။ ႁူဝ်ၸႂ်မၼ်းသုင်လႄႈ ဢမ်ႇမီးတၢင်းဢၼ် သိုဝ်ႈလီယူဝ်းလီ ၵႃႈၼႂ်းမၼ်း။ ၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ ဢသၢၵ်ႈတၵ်းလိပ်း ၵွပ်ႈပိူဝ်ႈတၢင်းဢၼ် မၼ်းယုမ်ႇမၢတ်ႈၼၼ်ႉဢေႃႈ။

5ၼွၵ်ႈသေၼၼ်ႉ ၼမ်ႉၸပိတ်ႈ ၸၢင်ႈပႅတ်ႉၸၢင်ႈလႅၼ်လႄႈ၊ ၵေႃႉဢၼ်မႃႇၼႃႉ ပူၵ်းပႅၼ်ၼၼ်ႉ ယင်းဢမ်ႇယူႇၵႃႈတီႈဢၼ် မၼ်းယူႇၼၼ်ႉလႆႈလႄႈ ႁႂ်ႈလေႃးၽႃႉမၼ်း ပဵၼ်ဢၼ်ၵႂၢင်ႈၸိူဝ်ႉၼင်ႇ မိူင်းမရၼႃႉၼၼ်ႉယူႇ၊ မီးၸႂ်ၸိူဝ်ႉၼင်ႇၶုၼ်တၢႆ ၼၼ်ႉလႄႈ ဢမ်ႇပေႇလႆႈလႄႈ ၸူႉသိမ်းဢဝ်ၵူၼ်း ၵူႈၸိူဝ်ႉၵူႈမဵဝ်းဝႆႉလႄႈ ႁႂ်ႈၵူၼ်းတင်းသဵင်ႈတင်းလူင် ၸူႉၵၼ်ၵွင်ၵၼ်ဝႆႉ ၵႃႈတီႈမၼ်းယူႇဢေႃႈ။-

6ၶဝ်တင်းသဵင်ႈတင်းလူင်ၼၼ်ႉ တၵ်းဢွၼ်ၵၼ်ဢဝ် ၵႂၢမ်းဢပုမ်ႇယူႇၽၢႆႇၼိုင်ႈ တင်းမၼ်း ဢိၵ်ႇတင်းၵႂၢမ်းထုင်း ဢၼ်သႄႉသွမ်းၼၼ်ႉ ယူႇၽၢႆႇၼိုင်ႈတင်းမၼ်းသေလႄႈ ဢွၵ်ႇသူပ်းလၢတ်ႈလႄႈဝႃႈ၊ ၵေႃႉဢၼ်ၵဵပ်းႁွမ် သိမ်းပႅင်းဝႆႉဢုၵ်ႉၸႃႇ ဢၼ်တူဝ်ၸဝ်ႈၵဝ်ႇ ဢမ်ႇပိူင်ႇၼၼ်ႉ မီးဢႃႉမင်ႇၵလႃႇဢေႃႈ။ တၵ်းႁိုင်ၵႃႈႁိုဝ်။ ၵေႃႉဢၼ်ဢဝ်ၼီႈပိူၼ်ႈ တၢင်ႇသႂ်ႇၵႃႈၼိူဝ်တူဝ်ၸဝ်ႈၵဝ်ႇၼၼ်ႉ မီးဢႃႉမင်ႇၵလႃႇဢေႃႈ။-

7ၶဝ်ၸိူဝ်းဢၼ်ၶူပ်းမႂ်းၼၼ်ႉ တၵ်းဢွၼ်ၵၼ်ၽုတ်းၽၢတ်း လုၵ်ႉမႃးၵမ်းလဵဝ်ဢမ်ႇၸႂ်ႈႁိုဝ်။ ၶဝ်ၸိူဝ်းဢၼ် ယႃႉယူၵ်ႉၼၼ်ႉ တၵ်းဢွၼ်ၵၼ် တိုၼ်ႇမႃးၵမ်းလဵဝ် ဢမ်ႇၸႂ်ႈႁိုဝ်။ မႂ်းတၵ်းပဵၼ်တီႈဢၼ် ၶဝ်ႁိမ်ဢဝ်ႁူင်ႇဢဝ်ဢေႃႈ။-

8ၵွပ်ႈပိူဝ်ႈဢၼ်မႂ်း ႁိမ်ဢဝ်မဵဝ်းၵူၼ်းၼမ်ၼႃႇၼၼ်ႉလႄႈ မဵဝ်းၵူၼ်းဢၼ်ၵိုတ်းဢၼ်ၵျၢၼ်ႇၵႃႈမီးၼၼ်ႉ တၵ်းဢွၼ်ၵၼ် ႁိမ်ဢဝ်ႁူင်ႇဢဝ်မႂ်းဢေႃႈ။ တၵ်းဢွၼ်ၵၼ်ႁဵတ်း ၵွပ်ႈပိူဝ်ႈဢပႅတ်ႈလိူတ်ႈၵူၼ်းတင်းလၢႆ ဢိၵ်ႇတင်း ဢပႅတ်ႈဢၼ်ၼိၵ်ႈၸၢၵ်ႈငႅၼ်းသႄးမိူင်း ဢိၵ်ႇတင်းဝဵင်း တင်းၵႃႈဢၼ်ယူႇ ၵႃႈၼႂ်းမၼ်းၸိူဝ်းၼၼ်ႉဢေႃႈ။-

9ၵေႃႉဢၼ်ႁႃဢဝ် ၸီးပႂႃးဢႃႉထမ်ႇမႃႉ ပုၼ်ႈမဵဝ်းၸိူဝ်ႉၶိူဝ်းမၼ်း ႁႂ်ႈလႆႈဢဝ်ႁိူၼ်းမၼ်းႁင်းမၼ်း တၢင်ႇသႂ်ႇဝႆႉၵႃႈၼိူဝ် တီႈဢၼ်သုင်လႄႈ ႁႂ်ႈတူဝ်မၼ်းၵၢင်းလွတ်ႈသေၵႃႈၼႂ်း မိုဝ်းၽေးတၢမ်ႇၼၼ်ႉ မီးဢႃႉမင်ႇၵလႃႇဢေႃႈ။-

10မႂ်းၵျၢမ်ႇပွင်ႁႂ်ႈသရေႇမဵဝ်း ၸိူဝ်ႉၶိူဝ်းမႂ်းလူႉ ၵွပ်ႈပိူဝ်ႈဢၼ် မႂ်းပႄႇၽဵဝ်ႈမဵဝ်းၵူၼ်းၼမ်ၼႃႇပႅတ်ႈၼၼ်ႉလႄႈ ၽိတ်းပိူင်ႈဢသၢၵ်ႈမႂ်းယဝ်ႉ။-

11မၢၵ်ႇႁိၼ်လုၵ်ႈၼိုင်ႈ ယူႇၵႃႈၼႂ်းၽႃမၢၵ်ႇႁိၼ်သႅၼ်ႇႁွင်ႉလႄႈ ၶိုဝ်ႇလႅမ်ႈၼိုင်ႈ ယူႇၵႃႈၼႂ်းၵွင်မႆႉဢိူဝ်ဢေႃႈ။-

12ၵေႃႉဢၼ် ပႃးဢဝ် ဢပႅတ်ႈလိူတ်ႈၵူၼ်းသေလႄႈ တႄႇႁဵတ်းဝၢၼ်ႈလႄႈ ပႃးဢဝ်ဢမူႉ ဢၼ်ဢမ်ႇတြႃးသေလႄႈ ႁႂ်ႈဝဵင်းမၼ်ႈၶိူင်ႇၼၼ်ႉ မီးဢႃႉမင်ႇၵလႃႇဢေႃႈ။-

13တူၺ်းလူး။ တၢင်းဢၼ် မဵဝ်းၵူၼ်းတင်းလၢႆ သၢင်ႈႁဵတ်းဝႆႉပုၼ်ႈၽႆး ဢိၵ်ႇတင်း တၢင်းဢၼ်ၵူၼ်း ၵူႈၸိူဝ်ႉၵူႈမဵဝ်း ႁဵတ်းယၢပ်ႇၸႂ်ၶၢၼ်ၸႂ်ဝႆႉ ပုၼ်ႈလွင်ႈတၢင်းဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ၼၼ်ႉ ပဵၼ်မႃးတီႈၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ဢမ်ႇၸႂ်ႈႁိုဝ်။-

14လွင်ႈမၼ်းၸမ်ႉ လိၼ်မိူင်း တၵ်းပျေႉၸုမ်ႇ တဵမ်ဝႆႉတင်းပိင်ႇၺႃႇ ဢၼ်ႁူႉၸၵ်း မုၼ်ၽုင်းထႃႇဝရႃႉၽြႃး မိူၼ်ၸိူဝ်ႉၼင်ႇဢၼ် ၼမ်ႉပၢင်ႇလၢႆႇ ထူမ်ႈႁူမ်ႇ တီႈဢၼ်မၼ်းယူႇၼၼ်ႉ ဝႆႉၼၼ်ႉဢေႃႈ။-

15ၵေႃႉဢၼ် ဢဝ်ၼမ်ႉလဝ်ႈၼမ်ႉၵမ် ထွၵ်ႇႁိုဝ်ႈႁႂ်ႈၵူၼ်းႁိူၼ်းၸမ်ၵၼ်တင်းမၼ်းၵိၼ်လႄႈ ဢဝ်ဢၢႆႁႅင်းၵွင်ႉမၼ်း ယၢင်မၼ်း ထၢပ်ႈထႅင်ႈသေလႄႈ ႁႂ်ႈမၼ်းၼၼ်ႉ လႆႈမဝ်းလဝ်ႈမဝ်းၵမ် ႁႂ်ႈမၼ်းလႆႈတူၺ်းႁၼ်တၢင်းဢၼ်မၼ်းၼၼ်ႉ ယူႇတူဝ်ပူၺ်ၼၼ်ႉ မီးဢႃႉမင်ႇၵလႃႇ ဢေႃႈ။-

16မႂ်းတၵ်းဢိမ်ႇတဵမ်ဝႆႉတင်း တၢင်းဢၼ်ဢူၵ်းဢၼ်ဢၢႆၼၼ်ႉ ပုၼ်ႈတၢင်တူဝ်မုၼ်ၽုင်းယဝ်ႉ။ မႂ်းၵိၼ်လႄႈ ပဵၼ်ၸိူဝ်ႉၼင်ႇ ၵေႃႉဢၼ်ဢမ်ႇၶၢမ်ႇ တၢင်းဢၼ်ထိူဝ်ႁိမ်းၼၼ်ႉတႃႉ။ ၵွၵ်းဢၼ်မီးၵႃႈၼႂ်း မိုဝ်းၶွၼ်ၶႂႃထႃႇဝရႃႉၽြႃးၼၼ်ႉ တၵ်းႁွတ်ႈထိုင်ၵႃႈတီႈမႂ်းလႄႈ တၢင်းဢၼ်တူၼ်ႉ၊ဢၼ်ႁၢၵ်ႈ ဢၼ်လီႁင်ႈၼၼ်ႉ တၵ်းႁူမ်ႇသုမ်ႇသရေႇမႂ်း ဝႆႉဢေႃႈ။-

17ဢပႅတ်ႈဢၼ်ႁဵတ်းပႄႉႁဵတ်းၼႅင်ႇလွႆ လေႇပၼုၼ်ႇ ၼၼ်ႉ တၵ်းႁူမ်ႇသုမ်ႇမႂ်း မိူၼ်ၸိူဝ်ႉၼင်ႇဢၼ် တၢင်းဢၼ်ယႃႉ တရိၵ်ႈသၢၼ်ႇပႅတ်ႈၼၼ်ႉ ႁႂ်ႈၶဝ်ၵူဝ်ႁႄၼၼ်ႉ ၵွပ်ႈပိူဝ်ႈဢပႅတ်ႈလိူတ်ႈၵူၼ်းတင်းလၢႆ ဢိၵ်ႇတင်းဢပႅတ်ႈ ဢၼ်ၼိၵ်ႈၸၢၵ်ႈငႅၼ်းသႄးမိူင်း ဢိၵ်ႇတင်းဝဵင်း တင်းၵႃႈဢၼ်ယူႇၵႃႈၼႂ်းမၼ်း ၸိူဝ်းၼၼ်ႉဢေႃႈ။-

18ရုၵ်ႈထူႉဢၼ်တွင်ႈႁဵတ်းၶၵ်းႁဵတ်းၼၼ်ႉ ၸၢင်ႈပၼ်ဢၵျူဝ်း ၸိူဝ်ႉၼင်ႇႁိုဝ်လႄႈ ထၼ်ႈပေႃးႁႂ်ႈ လၢၵ်ႈသမႃးတွင်ႈႁဵတ်း၊ၶၵ်းႁဵတ်းမၼ်းဝႆႉ။ ရုၵ်ႈထူႉဢၼ်သွၼ်းႁဵတ်း၊လေႃႇႁဵတ်း ဢိၵ်ႇတင်းသြႃႇမိၵ်ႉသႃႇၼၼ်ႉ ပၼ်ဢၵျူဝ်းၸိူဝ်ႉၼင်ႇႁိုဝ်လႄႈ ထၼ်ႈပေႃး ႁႂ်ႈၵေႃႉဢၼ်ႁဵတ်းၼၼ်ႉ ဢိင်ပိုင်ႈတၢင်းဢၼ်မၼ်းႁဵတ်းဝႆႉၼၼ်ႉသေလႄႈ ႁဵတ်းရုၵ်ႈထူႉ ဢၼ်ဢမ်ႇလၢတ်ႈၵႂၢမ်းလႆႈၼၼ်ႉ။-

19ၵေႃႉဢၼ်လၢတ်ႈတီႈၼိူဝ်ႉမႆႉလႄႈဝႃႈ၊ တိုၼ်ႇမႃးသေၵမ်းတီႈၶႃႈ၊ ဝႃႈၼင်ႇၼႆလႄႈ လၢတ်ႈတီႈမၢၵ်ႇႁိၼ် ဢၼ်ဢမ်ႇလၢတ်ႈၵႂၢမ်းလႆႈၼၼ်ႉလႄႈဝႃႈ၊ လုၵ်ႉမႃးသေၵမ်းတီႈၶႃႈ၊ ဝႃႈၼင်ႇၼႆၼၼ်ႉ မီးဢႃႉမင်ႇၵလႃႇဢေႃႈ။ ၶိူင်ႈပိူင်ၼၼ်ႉ တၵ်းသင်ႇပၼ်သွၼ်ပၼ်ႁိုဝ်။ တူၺ်းလူး။ မီးတၢင်းဢၼ် ဢဝ်ငိုၼ်းဢဝ်ၶမ်း ဢုမ်ႇႁေႃႇတဵၵ်းတႃးႁၢင်ႈၶိူင်ႈဝႆႉဢေႃႈ။ ၵႃႈတီႈၼႂ်းမၼ်း ဢမ်ႇမီးၸႂ်လႃးလႃးလူင်ပႄႇ။-

20ထႃႇဝရႃႉၽြႃးၸမ်ႉ၊ မီးယူႇၵႃႈၼႂ်းပိၵ်ႈမၢၼ်ႇ ဢၼ်မူတ်းၸၢင်ႇ မၼ်းၸဝ်ႈၼၼ်ႉဢေႃႈ။ ၵူၼ်းလိၼ်မိူင်းတင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ယူႇတဵတ်ႇတဵတ်ႇယဵၼ်ယဵၼ် ယူႇၵႃႈတီႈၽၢႆႇၼႃႈမၼ်းၸဝ်ႈတႃႉ။

← Chapter 1 Jump to: Chapter 3 →