Jude 1

Shan

Jump to:

1ၵဝ် ယူႉတႃႉ ဢၼ်ပဵၼ်ၶႃႈ ယေႇသူႉၶရိၸ်ႈ ၊ ဢၼ်ပဵၼ်ၼွင်ႉၸၢႆး ယႃႇၵုပ်ႈ ၼၼ်ႉၼႆႉ ပၼ်ငိၼ်းၵႂႃႇတီႈၶဝ်ၸိူဝ်းဢၼ်ၸဝ်ႈပေႃႈၽြႃးပဵၼ်ၸဝ်ႈလိူၵ်ႈၵဵပ်းဢဝ်ဝႆႉလႄႈ ႁၵ်ႉပႅင်းၼႃႇလူင်လၢင်လႄႈ ၸဝ်ႈ ယေႇသူႉ ႁွင်ႉဝႆႉပႂ်ႉၸွႆႈပႂ်ႉထႅမ်ယူႇၼၼ်ႉၶႃႈဢေႃႈ။-

2ႁႂ်ႈၵရူႉၼႃႇမီးၼိူဝ်သူသေၵမ်းလူၺ်ႈ။ တၢင်းၼိမ် ဢိၵ်ႇတင်းတၢင်းႁၵ်ႉၵေႃႈ ႁႂ်ႈၼမ်ၵိုၼ်းမႃးတီႈသူသေၵမ်းလူၺ်ႈ။

3ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ၼႂ်းမိူဝ်ႈဢၼ်ၵဝ်ယင်းတိုၵ်ႉၵျူဝ်းၸႃး ႁႂ်ႈလႆႈတႅမ်ႈလွင်ႈတၢင်းဢၼ်ၵႄႇၶျွတ်ႈဢဝ် ဢၼ်ႁဝ်းလႆႈသိူၵ်ႈသမ်ႇၶၢမ်ႇဢဝ် မိူၼ်မိူၼ်ၵၼ်ၼၼ်ႉပၼ်တီႈသူယူႇၼၼ်ႉၸိုင် မီးလွင်ႈဢၼ် တၵ်းလႆႈတိုၵ်းယူင်းၸူဝ်းဢဝ်သူလႄႈ တႅမ်ႈပၼ်ၵႂႃႇတီႈသူ ႁႂ်ႈသူလႆႈၵျူဝ်းၸႃးယူႇၽၢႆႇတြႃး တၢင်းဢၼ်ယုမ်ႇမၢတ်ႈဢၼ်ဢၢပ်ႈပၼ်တီႈ ၵူၼ်းမူတ်းၸၢင်ႇတင်းလၢႆမႃးယဝ်ႉ မိူဝ်ႈဢွၼ်ၼႆႉၼၼ်ႉသေလႄႈ တိုၵ်းတေႃးဢေႃႈ။-

4ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ ၵူၼ်းဢႃႉထမ်ႇမႃႉဢၼ်လႆႈၶၢမ်ႇတၢင်းဢၼ် ၸီႇယၢင်ႇမၢတ်ႈမၢႆဝႆႉ ပုၼ်ႈလွင်ႈၼင်ႇႁိုဝ် တၵ်းလႆႈၶၢမ်ႇဢပႅတ်ႈ ၸႃႉၸဵမ်မိူဝ်ႈဢွၼ်ၼႆႉၼၼ်ႉ ၵမ်ႈၽွင်ႈၸိူဝ်းၼၼ်ႉ၊ ၶႂမ်ႈပိၼ်ႈပႅတ်ႈ ၵျေးၸူးၽြႃးပဵၼ်ၸဝ်ႈႁဝ်း ႁႂ်ႈလႆႈပဵၼ်ပုၼ်ႈတၢင်းဢၼ် ၵီႉလေႇသႃႇၵူဝ်ႈၵိူၵ်ႇယူႇ၊ ထဵင်ပႅတ်ႈၸဝ်ႈဢၼ် ဢုပ်ႉပိူင်ႇပႃးလဵဝ်ၵူၺ်းဢၼ်ဝႃႈ ၸဝ်ႈႁဝ်း ယေႇသူႉၶရိၸ်ႈ ၼၼ်ႉယူႇသေလႄႈ ႁဵတ်းတင်းပရီႉယႄႇ တဵတ်ႇတဵတ်ႇလွမ်လႅမ်ၶဝ်ႈယဝ်ႉ။

5ပိူဝ်ႈၼႆလႄႈ ပိၵ်ႉသမ်ႉသူႁူႉဝႆႉထႃႈသေၵေႃႈ လွင်ႈတၢင်းဢၼ်ၵဝ် ၶႂ်ႈပၼ်သတီႉလႄႈလၢတ်ႈၸမ်ႉ ယေႇသူႉ ၶျွတ်ႈဢဝ်ၵူၼ်း ဢီႉသရေႇလႃႉ တင်းလၢႆ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ သေယဝ်ႉ၊ သမ်ႉယႃႉပႅတ်ႈ ၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉဢေႃႈ။-

6လိူဝ်သေၼၼ်ႉ တမၢၼ်ႇၵၢင်ႁၢဝ်ဢၼ်ဢမ်ႇပႂ်ႉဢၶႂၢင်ႉ တူဝ်ၸဝ်ႈၵဝ်ႇလႄႈ ပႅတ်ႈဝႆႉတီႈယူႇတူဝ်ၸဝ်ႈၵဝ်ႇတင်းလၢႆၼၼ်ႉၵေႃႈ မၼ်းၸဝ်ႈဢဝ်တင်း တၢင်းဢၼ်ၸိူၵ်ႈလဵၵ်းမတ်ႉၽုၵ်ႇ ထႃႇဝရႃႉၼၼ်ႉ ၶျုၵ်ႈဝႆႉၵႃႈၼႂ်းဢၼ်လပ်းသိင်ႇ ပုၼ်ႈဢၼ်တၵ်းၸႅတ်ႈထၢမ် ၸီႇယၢင်ႇၼႂ်းဝၼ်းဢၼ်ယႂ်ႇၼႃႇပုၼ်ႉဢေႃႈ။-

7မိူၼ်ၸိူဝ်ႉၼင်ႇၼၼ် ၸႃႉၸဵမ်ဝဵင်း သေႃးတုမ်ႇ ၊ ဝဵင်း ၵေႃးမေႃးရႃႉ တင်းဝဵင်းဢၼ် မီးၵႃႈတီႈႁိမ်းၼၼ်ႉၸိူဝ်းၼၼ်ႉ ၵွပ်ႈပိူဝ်ႈဢၼ်ႁဵတ်းမေႇထုင်ႇဢၼ်ဢမ်ႇတြႃး ၼမ်ၼႃႇသေလႄႈ ၵႂႃႇမႃးၼႂ်းလွင်ႈတၢင်းဢၼ် ၽူႈၸၢႆးၼင်ႇၵၼ် ၽိတ်းပိူင်ႈၵၼ် ၸိူဝ်ႉၼင်ႇၵူၼ်းႁၢႆႉ ဢၼ်ဝႃႈမႃးယဝ်ႉ မိူဝ်ႈဢွၼ်တၢင်းၼႆႉၼၼ်ႉလႄႈ လႆႈၶၢမ်ႇတၢင်းဢၼ် ၽႆးထႃႇဝရႃႉမႆႈလႄႈ ပဵၼ်ပုင်ႇသၢၵ်ႈသေႇထၢင်ႇသႃးဝႆႉယူႇဢေႃႈ။

8ၶဝ်ၸိူဝ်းဢၼ်လိုမ်းတူဝ်လႄႈ ၶႆႈၸႂ်ဝူၼ်ႉၸႂ်ၼမ်ၼႃႇယူႇ တေႃႈလဵဝ်ၼႆႉၼၼ်ႉၵေႃႈ မိူၼ်ၸိူဝ်ႉၼင်ႇ မိူဝ်ႈဢွၼ်တၢင်းၼႆႉၼၼ်ႉ ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇယူႇ၊ ပႄႇပႅတ်ႈဢႃႇၼႃႇၸၢၵ်ႈယူႇ၊ ၸၢင်ႈသႄႉသွမ်းၶဝ်ၸိူဝ်းဢၼ် မုၼ်တၼ်းၶူဝ်းယႂ်ႇၼႃႇၼၼ်ႉယူႇဢေႃႈ။-

9ၶုၼ်တမၢၼ်ႇၵၢင် ႁၢဝ် မိၵ်ႉၶေႇလႃႉ ၸမ်ႉ မိူဝ်ႈဢၼ်ဢဝ်လွင်ႈတူဝ်ၵႃႇယႃႉ မူဝ်းသေႇ လႄႈ ထဵင်ၵၼ်တင်းမႃႇၼၢတ်ႈၼၼ်ႉၸိုင် ယင်းဢမ်ႇႁတ်းႁဵတ်း တၢင်းဢၼ်သႄႉသွမ်းတၢင်ႇဢပႅတ်ႈလႄႈလၢတ်ႈဝႃႈ၊ ႁႂ်ႈထႃႇဝရႃႉၽြႃးသင်ႇသွၼ်မႂ်းတႃႉ၊ ဝႃႈၼင်ႇၼႆၵူၺ်းဢေႃႈ။-

10ၶဝ်ၼၼ်ႉၸမ်ႉ ၸၢင်ႈသႄႉသွမ်း လွင်ႈတၢင်းဢၼ်တူဝ်ၸဝ်ႈၵဝ်ႇ ဢမ်ႇႁူႉၼၼ်ႉဢေႃႈ။ ၵူၺ်းၵႃႈၶဝ်ၸၢင်ႈဢဝ်လွင်ႈတၢင်းဢၼ် တူဝ်ၸဝ်ႈၵဝ်ႇႁူႉ ၸွမ်းၼင်ႇပၵတီႉမိူၼ်ၸိူဝ်ႉၼင်ႇ တရိၵ်ႈသၢၼ်ႇၼၼ်ႉ ႁႂ်ႈတူဝ်ၸဝ်ႈၵဝ်ႇ တူႇၼဝ်ႈလူႉလႅဝ်ဢေႃႈ။

11ၶဝ်မီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ ၶဝ်ၸွမ်းသဵၼ်ႈတၢင်း ၵႃႇဢီႉၼႃႉ ဢေႃႈ။ ၶဝ်ၶုၼ်ႇလႅၼ်ႈၸွမ်းသဵၼ်ႈတၢင်း ဢပႅတ်ႈ ပႃႇလၢမ်ႇ ႁႂ်ႈလႆႈၵႃႈမၼ်းၶၼ်မၼ်းဢေႃႈ။ ၶဝ်ႁဵတ်းၸွမ်းဢပႅတ်ႈတၢင်းဢၼ် ၵေႃးရႃႉ ထဵင်ပႅတ်ႈၼၼ်ႉသေလႄႈ ႁွတ်ႈထိုင်တၢင်းလူႉတၢင်းလႅဝ်ဢေႃႈ။

12ၶဝ်ၼၼ်ႉ ပဵၼ်မၢၵ်ႇႁိၼ်လူင် ၵႃႈတီႈပွႆးမႅတ်ႈတႃႇသူ ၼႂ်းမိူဝ်ႈဢၼ်ၵိၼ်လူၺ်ႈၵၼ်တင်းသူလႄႈ ယင်းဢမ်ႇၸၢင်ႈဢႃးၼႃႇယူႇသေလႄႈ ၸၢင်ႈႁႂ်ႈတူဝ်ၸဝ်ႈၵဝ်ႇတင်းလၢႆဢိမ်ႇတဵမ်ၵူၺ်း။ ၽႃႈၽူၼ်ဢၼ်ဢမ်ႇမီးၼမ်ႉလႄႈ လူမ်းထူဝ်းပိဝ်ၵႂႃႇ၊ တူၼ်ႈမႆႉဢၼ်ႁဵဝ်ႇၸွပ်ႈလႄႈ မၢၵ်ႇယင်းဢမ်ႇၸပ်း၊ တၢႆသွင်ပွၵ်ႈလႄႈ ၶၢမ်ႇတၢင်းဢၼ်ထူၺ်ႈႁၢၵ်ႈမၼ်းပႅတ်ႈ၊-

13လႅင်းၼမ်ႉပိူပ်ႈၼမ်ႉ ဢၼ်မိူၵ်ႈရိူင်းၼႃႇ ဢၼ်ၸၢင်ႈႁႂ်ႈ လွင်ႈတၢင်းဢူၵ်းတၢင်းဢၢႆတူဝ်ၸဝ်ႈၵဝ်ႇ လိူတ်ႇဢွၵ်ႇ၊ လၢဝ်ပုင်ႈသၢဝ်ႈ ဢၼ်တၢင်းဢၼ်လပ်းသိင်ႇထႃႇဝရႃႉ ဢၼ်လိုၵ်ႉဢၼ်လမ်ႇၼႃႇၼၼ်ႉ သိမ်းဝႆႉမီးယူႇပုၼ်ႈမၼ်းၼၼ်ႉဢေႃႈ။

14ဢေးၼွၵ်ႉ ၵေႃႉဢၼ် သိုပ်ႇလူင်းမႃးၵႃႈတီႈ ဢႃႇတၢမ်ႇ လႄႈ လႆႈၸဵတ်းသိုပ်ႇၼၼ်ႉ ႁဵတ်းပရေႃးၽႅတ်ႈလႄႈ ႁေႃးလၢတ်ႈတီႈၶဝ်ၼၼ်ႉလႄႈဝႃႈ၊ တူၺ်းလူး၊-

15ထႃႇဝရႃႉၽြႃးတၵ်းပႃးဢဝ်တင်း ၵူၼ်းမူတ်းၸၢင်ႇမၼ်းၸဝ်ႈ ပဵၼ်မိုၼ်ႇပဵၼ်သႅၼ်ၼၼ်ႉလႄႈ မႃးႁႂ်ႈလႆႈၸီႇယၢင်ႇတြႃး တီႈၵူၼ်းတင်းသဵင်ႈတင်းလူင်လႄႈ ၽုၺ်ႇဢွၵ်ႇၼႄပျႃးဢပႅတ်ႈဢမူႉဢႃႉထမ်ႇမႃႉ ၵႃႈဢၼ်ၶဝ်ၸိူဝ်းဢၼ်ဢမ်ႇတြႃး တင်းသဵင်ႈတင်းလူင် ႁဵတ်းၸွမ်းၼင်ႇဢၼ်ဢမ်ႇတြႃး ဢိၵ်ႇတင်းဢပႅတ်ႈၵႂၢမ်းဢၼ်ၵျၢမ်းလိူင်း ၵႃႈဢၼ်ၵူၼ်းႁၢႆႉ ဢၼ်ဢမ်ႇတြႃးတင်းသဵင်ႈတင်းလူင် လၢတ်ႈလႄႈ ၽိတ်းပိူင်ႈမၼ်းၸဝ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။

16ၶဝ်ၼၼ်ႉပဵၼ်ၵေႃႉဢၼ် ၸၢင်ႈပွင်ႉၸၢင်ႈမိုၼ်ႇလႄႈ တၢင်ႇဢပႅတ်ႈ၊ ၵေႃႉဢၼ်ၸၢင်ႈၵမ်ၸၢင်ႈၵျၢင်ႉၸွမ်းၼင်ႇ တၢင်းဢၼ်တူဝ်ၸဝ်ႈၵဝ်ႇၸွႆးၸပ်း၊ ၵေႃႉဢၼ်ၸၢင်ႈလၢတ်ႈၵႂၢမ်းဢၼ်သုင်ၼႃႇလႄႈ ဢုပ်ႇဢၢတ်ႇ၊ ၵေႃႉဢၼ်ၸၢင်ႈထွၵ်ႈလူၺ်ႈၼႃႈပိူၼ်ႈ ၵွပ်ႈပိူဝ်ႈဢၵျူဝ်းၸီးပႂႃးဢေႃႈ။

17ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ၶုၵ်းၸႂ်လႆႈၶႆႈၸႂ်ထူပ်း ၵႂၢမ်းဢၼ်တမၢၼ်ႇၸဝ်ႈႁဝ်း ယေႇသူႉၶရိၸ်ႈ တင်းလၢႆ ႁေႃးလၢတ်ႈဝႆႉယဝ်ႉလႄႈဝႃႈ၊ ၼႂ်းၶိင်ႇၵႃႇလႃႉလိုၼ်းလင်သုတ်းပုၼ်ႉ-

18ၶဝ်ၸိူဝ်းဢၼ်ၸၢင်ႈၵမ်ၸၢင်ႈၵျၢင်ႉၸွမ်းၼင်ႇ တၢင်းဢၼ်တူဝ်ၸဝ်ႈၵဝ်ႇၸွႆးၸပ်း ဢၼ်ဢမ်ႇတြႃးလႄႈ ႁဵတ်းပျၢၵ်ႈယူႇၼၼ်ႉ တၵ်းပေႃႇမႃးဢေႃႈ၊ ဝႃႈၼင်ႇၼႆၼၼ်ႉတႃႉ။-

19ၶဝ်ၼၼ်ႉပဵၼ်ၵေႃႉဢၼ် ၽႄၵိူင်းၶႂၢႆးၵိူင်းလႄႈ ပဵၼ်ၵူၼ်းၸႃႇတီႉပၵတီႉ ဢၼ်ၵၢင်းလွတ်ႈတင်းဝီႉၺိၺ်ႇၸဝ်ႈဢေႃႈ။

20ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ သူတႄႇႁဵတ်းတူဝ်ၸဝ်ႈၵဝ်ႇ ၵႃႈၼိူဝ်တၢင်းဢၼ်ယုမ်ႇမၢတ်ႈတူဝ်ၸဝ်ႈၵဝ်ႇ ဢၼ်မူတ်းၸၢင်ႇၼႃႇသေပိူၼ်ႈၼၼ်ႉယူႇ၊ သူႁဵတ်းသူးတွင်းပထၼႃႇ ၼႂ်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇ၊-

21တူဝ်ၸဝ်ႈၵဝ်ႇပႂ်ႉတူဝ်ၸဝ်ႈၵဝ်ႇ ၵႃႈၼႂ်းတၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈယူႇသေလႄႈ ဢွၼ်ၵၼ်မုင်ႈထႃႈမွင်းထႃႈၵရူႉၼႃႇၸဝ်ႈႁဝ်း ယေႇသူႉၶရိၸ်ႈ ပုၼ်ႈ ဢသၢၵ်ႈထႃႇဝရႃႉယူႇတႃႉ။

22ၼႂ်းမိူဝ်ႈဢၼ် ၵူၼ်းၵမ်ႈၽွင်ႈ တွပ်ႇထဵင်ၵၼ်တင်းသူယူႇၼၼ်ႉၸိုင် ႁႂ်ႈဢပႅတ်ႈၵႃႈတီႈၶဝ်ၼၼ်ႉ ထၢင်ႇသႃးတႃႉ။-

23ၵမ်ႈၽွင်ႈၵေႃႈ ၸၵ်ႉၼုၵ်ႈဢဝ်ဢွၵ်ႇသေၵႃႈၼႂ်းၽႆးလႄႈ ၵႄႇသႄႇၶျွတ်ႈဢဝ်တႃႉ။ လီႁင်ႈဢဵတ်ႇသဵတ်ႇၶူဝ်းၼုင်ႈဢၼ် မီးၵႂၢၵ်ႈဢၼ်ၵူဝ်ႈဢၼ်ၵိူၵ်ႇ ၵွပ်ႈပိူဝ်ႈတူဝ်ၵႃႇယႃႉၼၼ်ႉယူႇသေလႄႈ မီးတင်းတၢင်းဢၼ်ၵူဝ်ၼႃႇလူင်လၢင်လႄႈ ဢဵတ်းလူၵမ်ႈၽွင်ႈတႃႉ။

24ႁႂ်ႈၸဝ်ႈဢၼ်တၢတ်ႈၼိူင်ႇလႆႈ ႁႂ်ႈလႆႈပႂ်ႉသူ လွင်ႈၼင်ႇႁိုဝ်သူတၵ်း ၵၢင်းလွတ်ႈတင်း တၢင်းဢၼ်တိူဝ်ႉမႅၼ်ႈလႄႈလူမ်ႉ ဢိၵ်ႇတင်း ႁႂ်ႈလႆႈဢဝ်သူၸိူဝ်းဢၼ်ယင်းဢမ်ႇမီးဢပႅတ်ႈလႄႈ ပျေႉၸုမ်ႇယူႇတင်း တၢင်းဢၼ်သိူဝ်းပျေႃႇၼၼ်ႉ သၢၵ်ႈၵၢပ်ႈၵႃႈတီႈၽၢႆႇၼႃႈ မုၼ်သရေႇၸဝ်ႈ။-

25ဢၼ်ဝႃႈၽြႃးပဵၼ်ၸဝ်ႈသူႇလဵဝ်ၵူၺ်း ၸဝ်ႈဢၼ်ၵႄႇၶျွတ်ႈဢဝ်ႁဝ်းၼၼ်ႉ မီးမုၼ်တၼ်းၶူဝ်း ဢႃႇၼူႉၽေႃႇ ဢႃႇၼႃႇၸၢၵ်ႈ ၵွပ်ႈပိူဝ်ႈၸဝ်ႈႁဝ်း ယေႇသူႉၶရိၸ်ႈ ၸႃႉၸဵမ်ၵမ်ႇၽႃႇ ဢွၼ်တၢင်းၼၼ်ႉ၊ တေႃႈလဵဝ်ၼႆႉ မိူဝ်းၼႃႈ ၵူႈၵမ်ႇၽႃႇ၊ သိုပ်ႇသိုပ်ႇတၢမ်းတၢမ်း သေၵမ်းလူၺ်ႈ။ ဢႃႇမိၼ်ႇ။ လိၵ်ႈဢေႃးဝႃႇတႃႉယူႉတႃႉယဝ်ႉယဝ်ႉဢေႃႈ။

Jump to:

Recommended Reading

Commentary Jude Commentaries → Devotional Jude Devotional Guide → Get This Bible Shan Study Bible →