Nahum 3

Shan

← Chapter 2 Jump to:

1ႁႂ်ႈဢႃႉမင်ႇၵလႃႇ မီးတီႈဝဵင်း ဢၼ်ၸၢင်ႈ ထွၵ်ႇလိူတ်ႈၵူၼ်းပႅတ်ႈၼၼ်ႉ သေၵမ်းလူၺ်ႈ။ ဝဵင်းၼၼ်ႉ ပျေႉၸုမ်ႇတဵမ်ဝႆႉတင်း တၢင်းဢၼ်ပႅတ်ႉလႅၼ်၊ တၢင်းဢၼ်ႁဵတ်း ဢႃႉထမ်ႇမႃႉဢေႃႈ။ ဢမ်ႇၸၢင်ႈပွႆႇ လွင်ႈတၢင်းဢၼ်တီႉလႆႈၼၼ်ႉလွတ်ႈ။-

2လႆႈငိၼ်းသဵင်ဢၼ် ဢဝ်ၶွၼ်ႉႁေႃႈပေႃႉယႅၼ်ႉ၊ သဵင်မၢၵ်ႇလေႃႉၵိင်ႈ၊ သဵင်မႃႉဝႅၼ်၊ သဵင်လေႃႉရထႃးလႅၼ်ႈဢေႃႈ။-

3မီးတၢင်းဢၼ် ၵူၼ်းသိုၵ်းၶီႇမႃႉယူႇ၊ တၢင်းဢၼ်လၢပ်ႇႁိူဝ်ႈ မၢပ်ႈမႅပ်ႈယူႇ၊ တၢင်းဢၼ် ႁွၵ်ႇၽႃႉမႅပ်ႈယူႇ၊ တၢင်းဢၼ် ၵူၼ်းတၢႆၼမ်ၼႃႇယူႇ၊ တၢင်းဢၼ် တူဝ်တၢႆ ပဵၼ်ပုမ်ႇပဵၼ်ၵွင်ယူႇဢေႃႈ။ ၼပ်ႉဢၢၼ်ႇ တူဝ်တၢႆၸိူဝ်းၼၼ်ႉလႄႈ ဢမ်ႇသဵင်ႈလႆႈ။ ၶဝ်ဢွၼ်ၵၼ် ၶီႈလိုတ်းတူဝ်တၢႆ ၸိူဝ်းၼၼ်ႉ မႅၼ်ႈလႄႈလူမ်ႉဢေႃႈ။-

4လွင်ႈတၢင်းၸိူဝ်းၼၼ်ႉ ပဵၼ်ၵွပ်ႈပိူဝ်ႈဢမူႉမေႇထုင်ႇ ဢၼ်ဢမ်ႇတြႃး ဢၼ်မႄႈမွၵ်ႇယႃႈ ဢၼ်ႁၢင်ႈလီၽၢင်လီလႄႈ ၸၢင်ႈၸေႃႉ ၸၢင်ႈႁဵတ်း၊ ဢၼ်ဢဝ်မေႇထုင်ႇ ဢၼ်ဢမ်ႇတြႃးတင်းလၢႆ ၵႃႉၶၢႆမဵဝ်းၵူၼ်း တင်းလၢႆ၊ ဢၼ်ဢဝ်တၢင်းဢၼ် ၸၢင်ႈၸေႃႉၸၢင်ႈႁဵတ်း တင်းလၢႆ ၵႃႉၶၢႆမဵဝ်းၸိူဝ်ႉၶိူဝ်း တင်းလၢႆၼၼ်ႉ ႁဵတ်းပွၵ်ႈ ၼမ်ၼႃႇၼၼ်ႉဢေႃႈ။-

5ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်ယူႇၽၢႆႇၼိုင်ႈတင်းမႂ်း ဢေႃႈ။ ၵဝ်တၵ်းပိုတ်ႇပိၼ်ႈ ၶူဝ်းၼုင်ႈမႂ်းၶိုၼ်ႈ ၵႃႈၼိူဝ်ၼႃႈမႂ်းလႄႈ ၼႄပျႃးတၢင်းဢၼ်မႂ်း မီးယူႇတူဝ်ပူၺ်ၼၼ်ႉ တီႈၼႃႈၵူၼ်း ၵူႈၸိူဝ်ႉၵူႈမဵဝ်း ဢိၵ်ႇတင်း တၢင်းဢၼ်လီဢူၵ်းလီဢၢႆ မႂ်းၼၼ်ႉ တီႈၵူႈသိုင်ႇ ၵူႈမိူင်းဢေႃႈ။-

6ၵဝ်တၵ်းဢဝ် ဢၼ်ဝူၺ်ႇဢၼ်ႁင်ႈ ထိမ်ႈသႂ်ႇတီႈမႂ်းလႄႈ ႁႂ်ႈမႂ်းၵူဝ်ႈၵိူၵ်ႇသေလႄႈ ဢဝ်မႂ်းဝႆႉ တီႈဢၼ်ပိူၼ်ႈ တၵ်းလူတၵ်းတူၺ်းၼၼ်ႉဢေႃႈ။-

7ၶဝ်ၵႃႈဢၼ်ႁၼ်မႂ်းၼၼ်ႉ တၵ်းဢွၼ်ၵၼ်ဢွၵ်ႇပၢႆႈသေ ၵႃႈတီႈမႂ်းလႄႈ လၢတ်ႈလႄႈဝႃႈ၊ ဝဵင်း ၼီႉၼေႇဝူၺ်ႇ လူႉလႅဝ်ယဝ်ႉ။ ၽူႈလႂ်တၵ်းပွင်ႉ တၵ်းမိူၼ်ႇ ၵွပ်ႈပိူဝ်ႈမၼ်းၼၼ်ႉ ဝႃႈၼင်ႇၼႆဢေႃႈ။ ၵဝ်တၵ်းႁႃဢဝ် ၶဝ်ၸိူဝ်းဢၼ် ႁႂ်ႈမႂ်းပျေႃႇၸႂ်ၼၼ်ႉ ပုၼ်ႈမႂ်းၵႃႈတီႈလႂ်လႆႈ။-

8မႂ်းၼႆႉယဵင်ႈၶႅၼ်း ယႂ်ႇမျၢတ်ႈၼႃႇသေ ဝဵင်း ၼေႃႇဢမ်ႇမုၼ်ႇ ဢၼ်တႄႇယူႇၵႃႈၼႂ်း ၵႄႈဝူင်ႈၵၢင်ၼမ်ႉႁွင်ႈ ၼမ်ႉၵႄးတင်းလၢႆ ဢၼ်ၶူးမၼ်းပဵၼ်ၼမ်ႉပၢင်ႇလၢႆႇ၊ ဢၼ်လမ်းမၼ်းပဵၼ်ပၢင်ႇလၢႆႇၼၼ်ႉႁိုဝ်။-

9မိူင်း ၵူႉသႃႉ တင်းမိူင်း ဢေႇၵိပ်ႉတူႉ ၼၼ်ႉ ပဵၼ်လၢၵ်ႈၼၢၵ်ႈမၼ်းဢေႃႈ။ ၼပ်ႉဢၢၼ်ႇ တူၺ်းလႄႈ ဢမ်ႇသဵင်ႈဢမ်ႇမူတ်းလႆႈ။ မိူင်း ၽူႉတႃႉ တင်းမိူင်း လီႉပူႉ ၵေႃႈ ၶဝ်ႈပႃးၼႂ်း လၢၵ်ႈၼၢၵ်ႈမၼ်းဢေႃႈ။-

10ၵူၺ်းၵႃႈ ဝဵင်းၼၼ်ႉ လႆႈၶၢမ်ႇတၢင်းဢၼ်ၶၢႆႉတီႈ ၵႂႃႇလႄႈ ပိူၼ်ႈသိမ်းဢဝ်ၵႂႃႇယဝ်ႉယဝ်ႉ။ လုၵ်ႈၶဝ်လၢင်းၶဝ်ၼၼ်ႉ လႆႈၶၢမ်ႇတၢင်းဢၼ်ဢဝ်ႁၵ်းႁဵၵ်း သိၵ်ႇလႅဝ်ပႅတ်ႈ ၵႃႈတီႈႁူဝ်တၢင်းၵႃႈမီးလႄႈ တူၵ်းၸႃႇၵွၵ်ႈပုၼ်ႈ ၵူၼ်းဝဵင်းဢၼ်မီးၵုင်ႇသရေႇ ၸိူဝ်းၼၼ်ႉသေလႄႈ ဢဝ်ၸိူၵ်ႈလဵၵ်းမတ်ႉၽုၵ်ႇ ၵူၼ်းဝဵင်းဢၼ်ႁႅင်းယႂ်ႇၼႃႇ ၵႃႈမီးၼၼ်ႉယဝ်ႉယဝ်ႉ။-

11မႂ်းၵေႃႈတၵ်းလႆႈမဝ်းလဝ်ႈ မဝ်းၵမ်သေလႄႈ တဵတ်ႇမႅပ်ႉယူႇဢေႃႈ။ မႂ်းတၵ်းလႆႈႁႃတီႈဢၼ်မၼ်ႈ ဢၼ်ၶိူင်ႇၼၼ်ႉ ႁႂ်ႈၵၢင်းလွတ်ႈမိုဝ်းရၢၼ်ႇသူႇဢေႃႈ။-

12တိူၵ်ႈတီႈတိုၵ်းသိုၵ်းမႂ်း ၵႃႈမီးၼၼ်ႉ တၵ်းလႆႈပဵၼ် မိူၼ်ၸိူဝ်ႉၼင်ႇတူၼ်ႈမၢၵ်ႇလိူဝ်ႇသၢင်းၽေႃး ဢၼ်မၢၵ်ႇမၢၵ်ႇ ဢၼ်သုၵ်းဢွၼ် တၢင်းပိူၼ်ႈၼၼ်ႉလႄႈ ပေႃးသၼ်ႇၶွၼ်းၸိုင် တၵ်းတူၵ်းသႂ်ႇ ၵႃႈၼႂ်းသူပ်း ၵေႃႉဢၼ်ၶႂ်ႈၵိၼ်ၼၼ်ႉဢေႃႈ။-

13တူၺ်းလူး။ ၵူၼ်းၵႃႈၼႂ်းမႂ်းၸိူဝ်းၼၼ်ႉ ပဵၼ်ၸိူဝ်ႉၼင်ႇမႄႈယိင်း ၼၼ်ႉဝႆႉလႄႈ ၽၵ်းတူမိူင်းမႂ်းၸိူဝ်းၼၼ်ႉ မီးတၢင်းဢၼ်ၽုၺ်ႇပိုတ်ႇပၼ် ၵႂၢင်ႈၵႂၢင်ႈ တီႈရၢၼ်ႇသူႇမႂ်း သေလႄႈ ၽႆးလႆႈမႆႈၵိူၼ်ႇၽၵ်းတူမႂ်းၸိူဝ်းၼၼ်ႉယဝ်ႉယဝ်ႉ။-

14တဵၵ်းၼမ်ႉဝႆႉ ပုၼ်ႈၶိင်ႇမိူဝ်ႈဢၼ်ရၢၼ်ႇသူႇတင်းလၢႆ လွမ်ႉလဵပ်ႈႁွပ်ႈယူႇၼၼ်ႉတႃႉ။ ႁႂ်ႈတိူၵ်ႈတီႈတိုၵ်းသိုၵ်းတင်းလၢႆ မၼ်ႈၶိူင်ႇတႃႉ။ ၶဝ်ႈၵႃႈၼႂ်းၵူမ်ႇလႄႈ ယဵပ်ႇၼူတ်ႈလိၼ်ဢုတ်ႇသေလႄႈ မႄးၵုမ်းမႄးႁဵတ်းတဝ်ဢုတ်ႇတႃႉ။-

15ၽႆးတၵ်းမႆႈမႂ်း ၵႃႈတီႈၼၼ်ႈလႄႈ၊ လၢပ်ႇလႅဝ်းတၵ်းတႅပ်းၽၼ်းမႂ်းပႅတ်ႈ သေလႄႈ ၶူပ်းၵိၼ်မႂ်းၸိူဝ်ႉၼင်ႇဢၼ်မႅင်းၵႅင်း ယႃႇလိၵ်ႉ ၼၼ်ႉဢေႃႈ။ ၵျူဝ်းၸႃးႁဵတ်းႁႂ်ႈ ၵူၼ်းမႂ်းၼမ်ၼႃႇ မိူၼ်ၸိူဝ်ႉၼင်ႇဢၼ် မႅင်းၵႅင်း ယႃႇလိၵ်ႉ ၼၼ်ႉလႄႈ ႁႂ်ႈၼမ်ၼႃႇ မိူၼ်ၸိူဝ်ႉၼင်ႇ မႅင်းၵႅင်း ဢရႃႇၽႃႉ ၼၼ်ႉတႃႉ။-

16ပိၵ်ႉသမ်ႉ မႂ်းႁႂ်ႈၸဝ်ႈၵုၼ်ႇ ၸဝ်ႈသိၼ်မႂ်း ၼမ်ၼႃႇသေ လၢဝ်ၵၢင်ႁၢဝ်ၸိူဝ်းၼၼ်ႉသေၵေႃႈ၊ မႅင်းၵႅင်း ယႃႇလိၵ်ႉ ၸိူဝ်းၼၼ်ႉ မီးၸွတ်ႇမီးတူဝ်ႈဝႆႉလႄႈ ဢွၼ်ၵၼ်မိၼ်ၵႂႃႇဢေႃႈ။-

17ၶုၼ်မႂ်းၸိူဝ်းၼၼ်ႉ ပဵၼ်ၸိူဝ်ႉၼင်ႇမႅင်းၵႅင်း ဢရႃႇၽႃႉ ၊ ပူဝ်ႇမႂ်းၸိူဝ်းၼၼ်ႉ ပဵၼ်ၸိူဝ်ႉၼင်ႇမႅင်းၵႅင်း ၵေႃႇၽႃႉ ဢၼ်ၸၢင်ႈဢွၼ်ၵၼ်မူပ်ႇယူႇ ၵႃႈတီႈႁိမ်းႁူဝ်ႉႁိမ်းႁိူၵ်ႈ ၼႂ်းမိုဝ်ႉဝၼ်းဢၼ်ၵတ်း ၼၼ်ႉဢေႃႈ။ မိူဝ်ႈဢၼ်လႅတ်ႇဢွၵ်ႇၼၼ်ႉၸိုင် ၶဝ်မိၼ်ၵႂႃႇလႄႈ ဢမ်ႇလႆႈႁူႉ လွင်ႈဢၼ်ၶဝ်ႁွတ်ႈထိုင် ၵႃႈတီႈလႂ်ၼၼ်ႉ။-

18ၶုၼ်ႁေႃၶမ်း ဢႃႇသူႉရီႉ ဢိူၺ်း၊ ၵူၼ်းဢၼ်လဵင်ႉသူဝ်းထိင်းသူဝ်းမႂ်း ၸိူဝ်းၼၼ်ႉ ၼွၼ်းလပ်းယူႇ၊ မူးမၢတ်ႈၽွင်းမိူင်းမႂ်းၸိူဝ်းၼၼ်ႉ ၵိင်းဝၢပ်ႈယူႇ၊ ၵူၼ်းမႂ်းတင်းလၢႆ ၸိူဝ်းၼၼ်ႉ ၽၢတ်ႇၽႄၵၼ်ယူႇ ၵႃႈၼိူဝ်သၼ်လွႆၵူႈတီႈၵူႈလႅၼ်ယူႇလႄႈ ၽူႈလႂ်သေၵေႃႉ ဢမ်ႇႁႂ်ႈၶဝ်ၸူႉၵၼ်တုမ်ၵၼ်။-

19တၢင်းၸဵပ်းမႂ်းဢမ်ႇႁၢႆလႆႈ။ တၢင်းဢၼ်တိူဝ်ႉဢၼ်မၢတ်ႇမႂ်း ႁႅင်းယႂ်ႇၼႃႇလူင်လၢင်ဢေႃႈ။ ၶဝ်ၵႃႈဢၼ်ငိၼ်းသတၢင်းသဵင်ၶၢဝ်ႇမႂ်းၼၼ်ႉ တၵ်းဢွၼ်ၵၼ်တူပ်းမိုဝ်း ၵႃႈၼိူဝ်မႂ်းဢေႃႈ။ လွင်ႈမၼ်းၸမ်ႉ ၵေႃႉဢၼ်ယင်းဢမ်ႇလႆႈၶၢမ်ႇ လွင်ႈတၢင်းဢၼ်ႁၢႆႉမိူၵ်ႈ ဢၼ်မႂ်းႁဵတ်းၼၼ်ႉလႄႈ ၵၢင်းလွတ်ႈၼၼ်ႉၸမ်ႉ၊ ပဵၼ်ၽူႈလႂ်။ ၵျၢမ်းဢၼႃႇၵၢတ်ႈတီႉၼႃႇႁုမ်ႇယဝ်ႉယဝ်ႉဢေႃႈ။

← Chapter 2 Jump to: