Obadiah 1

Shan

Jump to:

1ပျႃႇတိၵ်ႈရူႇပႃႇရူင်ႇ ဢေႃးပတီႉ ဢေႃႈ။ ၸဝ်ႈထႃႇဝရႃႉၽြႃး ဢဝ်လွင်ႈမိူင်း ဢေႇတုမ်ႇ မီးဢမိင်ႉၸမ်ႉ၊ ႁဝ်းလႆႈငိၼ်းသဵင်ဢၼ် ထႃႇဝရႃႉၽြႃး ႁွင်ႉပၢဝ်ႇႁွင်ႉသေႃႇၼၼ်ႉဢေႃႈ။ မၼ်းၸဝ်ႈပွႆႇ သၢၼ်ႇတမၢၼ်ႇၵႂႃႇ ၵႃႈၼႂ်းၵူၼ်း တၢင်ႇၸိူဝ်ႉတၢင်ႇၶိူဝ်းတင်းလၢႆ လႄႈ လၢတ်ႈလႄႈဝႃႈ၊ သူဢွၼ်ၵၼ်လုၵ်ႉလႄႈ ၶီႇသိုၵ်းႁႂ်ႈလႆႈတိုၵ်းတေႃး မိူင်းၼၼ်ႉတႃႉ၊ ဝႃႈၼင်ႇၼႆဢေႃႈ။

2တူၺ်းလူး။ ၵဝ်ၸီႇယၢင်ႇ ႁႂ်ႈမႂ်းပဵၼ် ဢၼ်လဵၵ်ႉဢၼ်ဢွၼ်ႇ ၵႃႈၼႂ်းၵူၼ်း တၢင်ႇၸိူဝ်ႉတၢင်ႇၶိူဝ်း တင်းလၢႆလႄႈ မႂ်းလႆႈၶၢမ်ႇတၢင်းဢၼ် ပိူၼ်ႈႁဵတ်းဢမ်ႇပေႃးၼင်ႇႁိုဝ်ဢေႃႈ။-

3မႂ်းဢၼ်ယူႇၼႂ်းၵႄႈ မၢၵ်ႇႁိၼ်မၢၵ်ႇၽႃတင်းလၢႆလႄႈ သွၼ်ႈပိုင်ႈယူႇၵႃႈတီႈဢၼ်သုင်၊ ဢၼ်လၢတ်ႈၼႂ်းၸႂ်လႄႈဝႃႈ၊ ၽူႈလႂ်တၵ်းၶျႃးၵဝ်တူၵ်း တီႈလိၼ်လႆႈ၊ ဝႃႈၼင်ႇၼႆ ၼၼ်ႉၼႆႉဢိူၺ်း၊ မႃႇၼႃႉၸႂ်သုင်မႂ်းၼၼ်ႉ ပႅတ်ႉလႅၼ်မႂ်းယဝ်ႉ။-

4ပိၵ်ႉသမ်ႉမႂ်း ယုၵ်ႉယွင်ႈတူဝ်မႂ်း ၶိုၼ်ႈတီႈသုင် မိူၼ်ၸိူဝ်ႉၼင်ႇ လၢင်းတႃႉၶမ်းၼၼ်ႉလႄႈ ႁဵတ်းႁင်းမႂ်းယူႇ ၵႃႈတီႈလၢဝ်တင်းလၢႆသေၵေႃႈ၊ ၵဝ်တၵ်းၶျႃးမႂ်းသေ ၵႃႈတီႈၼၼ်ႈ တူၵ်းတီႈတႅမ်ႇဢေႃႈ၊ ဝႃႈၼင်ႇၼႆဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

5သင်ၽူႈလၵ်ႉမႃး၊ သင်ၵူၼ်းၸူၼ်မႃးၸူး တီႈမႂ်း ၶိင်ႇၵၢင်ၶိုၼ်းၸိုင် ၶဝ်တၵ်းလၵ်ႉဢဝ် ႁႂ်ႈထၼ်ႈပေႃး ပေႇၸႂ်ၶဝ်ၵူၺ်း ဢမ်ႇၸႂ်ႈႁိုဝ်။ သင်ႇၵူၼ်းဢၼ်ဝိတ်း မၢၵ်ႇၸပိတ်ႈတင်းလၢႆ မႃးၸူးတီႈမႂ်းၸိုင်၊ ၶဝ်တၵ်းႁႂ်ႈၵိုတ်းၵျၢၼ်ႇဝႆႉ ပုၼ်ႈဢၼ်ပိူၼ်ႈ တၵ်းၸွမ်းလႄႈဝိတ်းဢဝ် ဢမ်ႇၸႂ်ႈႁိုဝ်။ မႂ်းၼႆႉ ပဵၼ်ဢၼ်လူႉလႅဝ်ၼႃႇလူင်လၢင်ယဝ်ႉ လူင်ပႄႇ။-

6ဢေးသေႃး ၼၼ်ႉ လႆႈၶၢမ်ႇတၢင်းဢၼ် ၸႅတ်ႈဢဝ် ထၢမ်ဢဝ် ၼႃႇလူင်လၢင်ယဝ်ႉလူင်ပႄႇ။ လႆႈၶၢမ်ႇတၢင်းဢၼ်ႁႃဢဝ် ဢုၵ်ႉၸႃႇ ဢၼ်မၼ်းသိူင်ႇဝႆႉ မႅပ်ႉဝႆႉၸိူဝ်းၼၼ်ႉ ၼႃႇလူင်လၢင်ယဝ်ႉလူင်ပႄႇ။-

7ၶဝ်ၸိူဝ်းဢၼ် ႁဵတ်းမိၵ်ႉသႃႇႁႃယႃႉ လူၺ်ႈၵၼ်တင်းမႂ်းၼၼ်ႉ ႁေႃႈမႂ်းဢွၵ်ႇၸူးၵႃႈတီႈ ၶွပ်ႇၼမ်ႉလႅၼ်လိၼ်ယဝ်ႉယဝ်ႉ။ ၶဝ်ၸိူဝ်းဢၼ် ႁဵတ်းၵေႃႉႁဵတ်းသေႈ လူၺ်ႈၵၼ်တင်းမႂ်းၼၼ်ႉ ပႅတ်ႉလႅၼ်မႂ်းလႄႈ ပႄႉၼႅင်ႇမႂ်းယဝ်ႉယဝ်ႉ။ ၶဝ်ၸိူဝ်းဢၼ် ၵိၼ်ၶူပ်း တၢင်းၵိၼ်တၢင်းၶူပ်း မႂ်းၼၼ်ႉ ၵၢင်တူင်ႇႁႅဝ်ႉ တူင်ႇၶိုမ်းဝႆႉ ၵႃႈတီႈတႂ်ႈမႂ်းယဝ်ႉယဝ်ႉ။ မၼ်းဢမ်ႇမီးၺၢၼ်ႇပိင်ႇၺႃႇ လႃးလႃး။-

8ထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းၼၼ်ႉ ၵဝ်တၵ်းပႄႇၽဵဝ်ႈ ၶဝ်ၸိူဝ်းဢၼ်မီးပိင်ႇၺႃႇၼၼ်ႉ ပႅတ်ႈသေၵႃႈၼႂ်းမိူင်း ဢေႇတုမ်ႇ ၊ ၶဝ်ၸိူဝ်းဢၼ်ၺၢၼ်ႇလီၼၼ်ႉ ပႅတ်ႈသေၵႃႈတီႈလွႆ ဢေးသေႃး ဢမ်ႇၸႂ်ႈႁိုဝ်။-

9ဝဵင်း တေႇမၢၼ်ႇ ဢိူၺ်း၊ ၵူၼ်းမႂ်းဢၼ်ႁႅင်းယႂ်ႇၼႃႇၸိူဝ်းၼၼ်ႉ တၵ်းႁွတ်ႈထိုင် တၢင်းဢၼ်ၵူဝ်ဢၼ်ႁႄ ႁႂ်ႈၶဝ်တင်းသဵင်ႈတင်းလူင် လႆႈၶၢမ်ႇတၢင်းဢၼ်ပႄႇၽဵဝ်ႈ ၶႃႈၽၼ်းဢဝ်တၢႆပႅတ်ႈသေၵႃႈၼိူဝ်လွႆ ဢေးသေႃး ဢေႃႈ။

10ၵွပ်ႈပိူဝ်ႈဢပႅတ်ႈ တၢင်းဢၼ်မႂ်း ႁဵတ်းပႄႉႁဵတ်းၼႅင်ႇ ၼွင်ႉၸၢႆးမႂ်း ယႃႇၵုပ်ႈ ၼၼ်ႉလႄႈ တၢင်းဢၼ်ဢူၵ်းဢၼ်ဢၢႆ တၵ်းလႆႈႁူမ်ႇသုမ်ႇမႂ်းလႄႈ မႂ်းတၵ်းလႆႈၶၢမ်ႇတၢင်းဢၼ် ပႄႇၽဵဝ်ႈပႅတ်ႈယူႇ သေႇသေႇဢေႃႈ။-

11ၼႂ်းမိုဝ်ႉဝၼ်းဢၼ်မႂ်းယူႇ ၽၢႆႇၶၢင်ႈၼိုင်ႈ၊ ၼႂ်းဝၼ်းဢၼ်ၵူၼ်းတၢင်ႇဝၢၼ်ႈ တၢင်ႇမိူင်းတင်းလၢႆ သိမ်းဢဝ်ၶဝ်ၸိူဝ်းဢၼ် ႁၢပ်ႇဢမူႉမၼ်းၼၼ်ႉလႄႈ ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ၶဝ်ႈၵႃႈၼႂ်းၽၵ်းတူဝဵင်းမၼ်းသေလႄႈ တူၵ်းလိၵ်ႈၸႃႇၵွၵ်ႈၵၼ် လူၺ်ႈလွင်ႈ ဝဵင်း ယေႇရူႉသလႅမ်ႇ ၼၼ်ႉၼၼ်ႉ၊ မႂ်းပဵၼ်ၵေႃႉဢၼ် ႁပ်ႉတုင်းဢဝ်ဢေႃႈ။-

12ၼႂ်းမိုဝ်ႉဝၼ်းၼွင်ႉၸၢႆးမႂ်း၊ ဝၼ်းဢၼ်မၼ်းပဵၼ် ၵူၼ်းတၢင်ႇၸိူဝ်ႉတၢင်ႇမဵဝ်း ၵႂႃႇၼၼ်ႉ၊ မႂ်းဢမ်ႇထုၵ်ႇလီလူတူၺ်း ဢမူႉမၼ်းယူႇ။ ၼႂ်းမိုဝ်ႉဝၼ်းဢၼ် ၵူၼ်းမဵဝ်း ယူႉတႃႉ တင်းလၢႆလူႉလႅဝ်ၼၼ်ႉ မႂ်းဢမ်ႇထုၵ်ႇလီၸူမ်းလီသိူဝ်း။ ၼႂ်းမိုဝ်ႉဝၼ်းဢၼ် ၶဝ်လႆႈၶၢမ်ႇတုၵ်ႉၶႃႉ တၢင်းၽၢၼ်ၼၼ်ႉ မႂ်းဢမ်ႇထုၵ်ႇလီလၢတ်ႈၵႂၢမ်း ဢၼ်ဢမ်ႇၼပ်ႉဢမ်ႇၶၢၼ်း။-

13ၼႂ်းမိုဝ်ႉဝၼ်းဢၼ် ၵူၼ်းၵဝ်တင်းလၢႆ လႆႈၶၢမ်ႇၽေးဢူႉပၢတ်ႈၼၼ်ႉ၊ မႂ်းဢမ်ႇထုၵ်ႇလီၶဝ်ႈၵႃႈၼႂ်းႁူးၽၵ်းတူ တီႈဢၼ်ၶဝ်ယူႇၼၼ်ႉ။ ၼႂ်းမိုဝ်ႉဝၼ်းဢၼ်ၶဝ်လႆႈၶၢမ်ႇ ၽေးဢူႉပၢတ်ႈၼၼ်ႉ မႂ်းဢမ်ႇထုၵ်ႇလီလူတူၺ်း တုၵ်ႉၶႃႉတၢင်းၽၢၼ်ၶဝ်။ ၼႂ်းမိုဝ်ႉဝၼ်းဢၼ် ၶဝ်လႆႈၶၢမ်ႇၽေးဢူႉပၢတ်ႈၼၼ်ႉ မႂ်းဢမ်ႇထုၵ်ႇလီယိုၼ်ႈမိုဝ်း ႁိမ်ဢဝ်ႁူင်ႇဢဝ်ဢုၵ်ႉၸႃႇၶဝ်။-

14မႂ်းဢမ်ႇထုၵ်ႇလီယူႇ ၵႃႈတီႈသဵၼ်ႈတၢင်း ဢၼ်ၽႃႇၵႂႃႇလတ်းၵႂႃႇၼၼ်ႉ ႁႂ်ႈလႆႈပႄႇၽဵဝ်ႈၶဝ်ၸိူဝ်းဢၼ် ပၢႆႈလွတ်ႈၵႂႃႇၼၼ်ႉပႅတ်ႈ။ မႂ်းဢမ်ႇထုၵ်ႇလီဢဝ် ၶဝ်ၸိူဝ်းဢၼ် ယင်းၵိုတ်းယင်းၵျၢၼ်ႇ ၼႂ်းမိုဝ်ႉဝၼ်းဢၼ် ဢမူႉႁွတ်ႈထိုင်ၼၼ်ႉၸိူဝ်းၼၼ်ႉ ဢၢပ်ႈပၼ်။

15လွင်ႈမၼ်းၸမ်ႉ မိုဝ်ႉဝၼ်းထႃႇဝရႃႉၽြႃးၼၼ်ႉ ၸမ်ၵၼ်တင်းၵူၼ်း ၵူႈၸိူဝ်ႉၵူႈမဵဝ်းယဝ်ႉ။ ၸွမ်းၵႃႈၼင်ႇဢၼ် မႂ်းႁဵတ်းၼၼ်ႉသေလႄႈ ပိူၼ်ႈတၵ်းႁဵတ်း တီႈမႂ်းဢေႃႈ။ ဢမူႉဢၼ်မႂ်းႁဵတ်းၼၼ်ႉ တၵ်းလႆႈၶိုၼ်းႁွတ်ႈထိုင် ၵႃႈတီႈၼိူဝ်ႁူဝ်မႂ်းဢေႃႈ။-

16ၸိူဝ်ႉၼင်ႇဢၼ်သူ သူတ်ႉၵိၼ်ဢိုၵ်ႉၵိၼ်ၵႃႈၼိူဝ်လွႆၵဝ် ဢၼ်မူတ်းၸၢင်ႇၼၼ်ႉ ၵူၼ်းၵူႈၸိူဝ်ႉၵူႈမဵဝ်း တၵ်းလႆႈသူတ်ႉၵိၼ်ဢိုၵ်ႉၵိၼ်ယူႇ သေႇသေႇဢေႃႈ။ ၶဝ်တၵ်းလႆႈသူတ်ႉၵိၼ် ဢိုၵ်ႉၵိၼ်လႄႈ ဢိုၼ်ၵိၼ်သေယဝ်ႉ၊ တၵ်းလႆႈပဵၼ်မိူၼ်ၸိူဝ်ႉၼင်ႇ ၵေႃႉဢၼ် ဢမ်ႇတွၼ်ႉယၢမ်ႈမီးၼၼ်ႉယူႇဢေႃႈ။

17ၵႃႈၼိူဝ်လွႆ ၸီႉဢုၼ်ႇ ၼၼ်ႉ တၵ်းမီးၶဝ်ၸိူဝ်းဢၼ် လွတ်ႈၽေးၵမ်ႈၽွင်ႈလႄႈ တီႈၼၼ်ႈ တၵ်းပဵၼ်တီႈဢၼ် မူတ်းၸၢင်ႇဢေႃႈ။ မဵဝ်း ယႃႇၵုပ်ႈ ၼၼ်ႉ တၵ်းလႆႈ ပိူင်ႇဢဝ်လိၼ် ဢၼ်ၶဝ်ထိူၵ်ႈပိူင်ႇၼၼ်ႉဢေႃႈ။-

18မဵဝ်း ယႃႇၵုပ်ႈ ၼၼ်ႉ တၵ်းပဵၼ်ၽႆး၊ မဵဝ်း ယူဝ်းသႅပ်ႈ ၼၼ်ႉ တၵ်းပဵၼ်ပဵဝ်ၽႆး၊ မဵဝ်း ဢေးသေႃး ၼၼ်ႉ တၵ်းပဵၼ်ယိူဝ်ႈႁႅင်ႈယိူဝ်ႈႁွင်ယူႇသေလႄႈ ၸပ်းၽႆးလႄႈမႆႈသေယဝ်ႉ၊ ၵူၼ်းမဵဝ်း ဢေႇတုမ်ႇ ၼၼ်ႉ ဢမ်ႇလႆႈၵိုတ်း လႆႈၵျၢၼ်ႇဝႆႉ သေၵေႃႉသေၵူၼ်း၊ ထႃႇဝရႃႉၽြႃး မီးဢမိင်ႉဝႆႉယဝ်ႉယဝ်ႉ။-

19ၵူၼ်းၵႃႈၼႂ်းပွတ်းတၢင်းၸၢၼ်းၸိူဝ်းၼၼ်ႉ တၵ်းဢွၼ်ၵၼ်သိမ်းဢဝ်လွႆ ဢေးသေႃး ၊ ၵူၼ်းဢၼ်ယူႇၵႃႈတႂ်ႈ တီႈဢၼ်ပၢင်ႇဢၼ်ပဵင်း ၸိူဝ်းၼၼ်ႉ တၵ်းဢွၼ်ၵၼ်သိမ်းဢဝ်မိူင်း ၽီႉလိတ်ႉတီႉ ၊ ၶဝ်ၼၼ်ႉ တၵ်းဢွၼ်ၵၼ် သိမ်းဢဝ် တီႈပၢင်ႇတီႈပဵင်း ဢေႇၽရိမ်ႇ ဢိၵ်ႇတင်း တီႈပၢင်ႇတီႈပဵင်း သမႃႇရီႉ ၊ မဵဝ်း ပိၼ်ႇယႃႇမိၼ်ႇ ၼၼ်ႉ တၵ်းဢွၼ်ၵၼ် သိမ်းဢဝ်မိူင်း ၵီႉလတ်ႉ ဢေႃႈ။-

20မုၵ်ႉၸိူဝ်းမဵဝ်း ဢီႉသရေႇလႃႉ ဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇလႄႈ မီးယူႇၵႃႈၼႂ်းၵူၼ်း ၶႃႇၼၢၼ်ႇ ၸိူဝ်းၼၼ်ႉ တၵ်းလႆႈသိမ်းဢဝ်တေႃႇထိုင်ႁွတ်ႈဝဵင်း ၸႃႇရိပ်ႉတႃႉ လႄႈ ၵူၼ်းဝဵင်း ယေႇရူႉသလႅမ်ႇ ဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇလႄႈ မီးယူႇၵႃႈၼႂ်းမိူင်း သေႇၽရတ်ႉ ၸိူဝ်းၼၼ်ႉ တၵ်းလႆႈသိမ်းဢဝ်ဝၢၼ်ႈဝဵင်း ၼႂ်းပွတ်းတၢင်းၸၢၼ်းၸိူဝ်းၼၼ်ႉဢေႃႈ။-

21ၶဝ်ၸိူဝ်းဢၼ် ၵႄႇသႄႇၶျွတ်ႈဢဝ်ၼၼ်ႉ တၵ်းဢွၼ်ၵၼ်ၶိုၼ်ႈ ၵႃႈၼိူဝ်လွႆ ၸီႉဢုၼ်ႇ ႁႂ်ႈလႆႈၸီႇယၢင်ႇတြႃး တီႈလွႆ ဢေးသေႃး လႄႈ၊ သိုင်ႇၸိုင်ႈဝၢၼ်ႈမိူင်း ၵေႃႈ တၵ်းပဵၼ် သိုင်ႇၸိုင်ႈဝၢၼ်ႈမိူင်း ထႃႇဝရႃႉၽြႃးဢေႃႈ။ ပျႃႇတိၵ်ႈရူႇပႃႇရူင်ႇဢေႃးပတီႉယဝ်ႉယဝ်ႉဢေႃႈ။

Jump to:

Recommended Reading

Commentary Obadiah Commentaries → Devotional Obadiah Devotional Guide → Get This Bible Shan Study Bible →