Philemon 1

Shan

Jump to:

1ၵဝ် ပေႃးလူႉ ဢၼ်လႆႈၶၢမ်ႇတူၵ်းၵိၼ်း ၵွပ်ႈပိူဝ်ႈ ယေႇသူႉၶရိၸ်ႈ ၼၼ်ႉ ဢိၵ်ႇတင်းၼွင်ႉၵဝ် တီႉမေႃးသေႇ ၼႆႉ ပၼ်ငိၼ်းၵႂႃႇ တီႈၸႃႉၸဵမ် ၽီႉလေႇမုၼ်ႇ ၵေႃႉသေႈဢၼ်ႁဝ်းႁၵ်ႉႁဝ်းပႅင်းလႄႈ သၢင်ႈႁဵတ်းႁူမ်ႈၵၼ်တင်းႁဝ်း၊-

2ဢိၵ်ႇတင်း ဢပ်ႉပီႉ ၼွင်ႉယိင်းဢၼ်ႁဝ်းႁၵ်ႉႁဝ်းပႅင်း တင်း ဢႃႇၶႅပ်ႉပူႉ ဢၼ်ပဵၼ်ၵူၼ်းသိုၵ်း လူၺ်ႈၵၼ်တင်းႁဝ်း၊ တင်းၸိူဝ်းၸဝ်ႈ ဢၼ်မီးၵႃႈၼႂ်းႁိူၼ်းမႂ်းၼၼ်ႉဢေႃႈ။-

3ႁႂ်ႈသူႉၵျေးၸူးဢိၵ်ႇတင်းတၢင်းၼိမ် ဢၼ်ပဵၼ်မႃးၵႃႈတီႈ ၽြႃးပဵၼ်ၸဝ်ႈပေႃႈႁဝ်း တင်းၸဝ်ႈ ယေႇသူႉၶရိၸ်ႈ ၼၼ်ႉ မီးၼိူဝ်သူသေၵမ်းလူၺ်ႈ။

4ပိူဝ်ႈဢၼ်ၵဝ်လႆႈႁူႉလႆႈငိၼ်း လွင်ႈဢၼ်မႂ်းယုမ်ႇမၢတ်ႈ ၸဝ်ႈ ယေႇသူႉ လႄႈ ႁၵ်ႉပႅင်းၵူၼ်းမူတ်းၸၢင်ႇ တင်းသဵင်ႈတင်းလူင် ၼၼ်ႉလႄႈ

5ၵဝ်ယွင်ႈယေႃးၵျေးၸူးၽြႃးပဵၼ်ၸဝ်ႈၵဝ်သေႇသေႇလႄႈ ႁဵတ်းသူးတွင်းပထၼႃႇပုၼ်ႈမႂ်းယူႇဢေႃႈ။-

6လွင်ႈဢၼ်ၵဝ်သူးတွင်းၸမ်ႉ၊ လွင်ႈၼင်ႇႁိုဝ်ဢႁုင်ႇတၢင်းဢၼ်သိူၵ်ႈသမ်ႇၵၼ်တင်း တၢင်းဢၼ်ယုမ်ႇမၢတ်ႈမႂ်းၼၼ်ႉ တၵ်းႁႅင်းယႂ်ႇ ပုၼ်ႈ ယေႇသူႉၶရိၸ်ႈ ၼႂ်းတၢင်းဢၼ်ႁူႉၸႅင်ႈ၊ လွင်ႈတၢင်းၵႃႈဢၼ်လီဢၼ်ငၢမ်း တင်းသဵင်ႈတင်းလူင် ဢၼ်မီးၼႂ်းႁဝ်းၼၼ်ႉၸိုင် ႁဵတ်းသူးတွင်းပထၼႃႇဢေႃႈ။-

7ၼွင်ႉၸၢႆးၵဝ်ဢိူၺ်း၊ ၵဝ်ထွၵ်ႈလူၺ်ႈမႅတ်ႈတႃႇမႂ်းလႄႈ မီးၵတ်းယဵၼ်ၶျၢမ်းသႃႇ တၢင်းဢၼ်သိူဝ်းပျေႃႇ ၼႃႇလူင်လၢင်ၵွပ်ႈပိူဝ်ႈဢၼ်မႂ်းႁႂ်ႈ ႁူဝ်ၸႂ်ၵူၼ်းမူတ်းၸၢင်ႇတင်းလၢႆ သၢၵ်ႈသႃႇဢေႃႈ။

8ပိူဝ်ႈၼႆလႄႈ ပိၵ်ႉသမ်ႉၵဝ်မီးဢၶႂၢင်ႉ တၢင်းဢၼ်ႁတ်းႁၢၼ်ၵွပ်ႈပိူဝ်ႈၸဝ်ႈၶရိၸ်ႈ ႁႂ်ႈလႆႈဝႆႉပိင်းၺၢပ်ႈ လွင်ႈတၢင်းဢၼ်မႂ်းထုၵ်ႇလီႁဵတ်းၼၼ်ႉသေၵေႃႈ၊-

9ၵဝ်ပဵၼ် ပေႃးလူႉ ဢၼ်ဢသၢၵ်ႈယႂ်ႇ၊ ၵေႃႉဢၼ်လႆႈၶၢမ်ႇတူၵ်းၵိၼ်းၵွပ်ႈပိူဝ်ႈ ယေႇသူႉၶရိၸ်ႈ လႄႈ ဢဝ်တင်းမႅတ်ႈတႃႇၵူၺ်း တွင်းပၢၼ်ႇမႂ်းၶႃႈဢေႃႈ။-

10ၵဝ်တွင်းပၢၼ်ႇပုၼ်ႈ ဢေႃးၼေႇသိမ်ႇ ဢၼ်ပဵၼ်လုၵ်ႈၸၢႆးၵဝ် ဢၼ်ၵဝ်ႁႂ်ႈၵိူတ်ႇလဵင်ႉမႃး ၼႂ်းတၢင်းဢၼ် ၵဝ်ၶၢမ်ႇတၢင်းဢၼ်မတ်ႉၽုၵ်ႇ ယူႇၼႆႉ၊-

11ဢၼ်ဝႃႈၵေႃႉဢၼ်မိူဝ်ႈဢွၼ်ၼႆႉၼၼ်ႉ မႂ်းဢမ်ႇလႆႈဢသုင်းၵႃႈသင်၊ တေႃႈလဵဝ်ၼႆႉ မႂ်းတင်းၵဝ်လႆႈဢသုင်းၼၼ်ႉ ၶႃႈဢေႃႈ။-

12ၵဝ်ႁႂ်ႈမၼ်းၶိုၼ်းမိူဝ်းၵႂႃႇ ၵႃႈတီႈမႂ်းလႄႈ မႂ်းမၢတ်ႈမၼ်းပဵၼ်ၸိူဝ်ႉၼင်ႇ လိူတ်ႈႁူဝ်ဢူၵ်းၵဝ်ယူႇသေလႄႈ ႁပ်ႉတုင်းဢဝ်မၼ်းသေၵမ်း။-

13ပိၵ်ႉသမ်ႉၵဝ်ၶႂ်ႈဢဝ်မၼ်းဝႆႉ ႁႂ်ႈမၼ်းလႆႈႁဵတ်းတၢင်တူဝ်မႂ်းသေလႄႈ လူတူၺ်းၵဝ်ၼႂ်းတၢင်းဢၼ်ၵဝ် ၶၢမ်ႇတၢင်းဢၼ်မတ်ႉၽုၵ်ႇ ယူႇ ၵွပ်ႈပိူဝ်ႈတြႃးသတၢင်းသိူဝ်းပျေႃႇၼႆႉသေၵေႃႈ၊-

14ၼႂ်းလွင်ႈတၢင်းဢၼ် မႂ်းႁဵတ်းၵျေးၸူးတီႈၵဝ်ၼၼ်ႉ ၼင်ႇႁိုဝ်တၵ်းလႆႈၼိူင်ႇၶႅၼ် မႂ်းသေလႄႈ ႁဵတ်းဢမ်ႇၸႂ်ႈ၊ ၼင်ႇႁိုဝ်မႂ်း တၵ်းလႆႈႁဵတ်းၸွမ်းၼင်ႇဢလူဝ်ႇမႂ်းၸိုင်၊ ပေႃးဢၶႂၢင်ႉမႂ်းဢမ်ႇမီး ၵဝ်ဢမ်ႇၶႂ်ႈႁဵတ်းသေၸိူဝ်ႉသေပိူင်။-

15လိူဝ်သေၼၼ်ႉ၊ မီးတီႈလၢတ်ႈလႄႈဝႃႈ၊ လွင်ႈၼင်ႇႁိုဝ်မႂ်းတၵ်းလႆႈမၼ်းဝႆႉယူႇသေႇသေႇၸိုင်၊ မၼ်းလႆႈၽၢတ်ႇယၢၼ်ၵၼ်တင်းမႂ်းၵႂႃႇ ၵမ်းဢွၼ်ႇၼိုင်ႈယဝ်ႉ၊ ဝႃႈၼင်ႇၼႆဢေႃႈ။-

16မိူဝ်ႈဢၼ်ဝႃႈၸိူဝ်ႉၼင်ႇၼၼ်ၸိုင်၊ ဢမ်ႇၶႂ်ႈဝႃႈလွင်ႈဢၼ်မႂ်းတၵ်းလႆႈမၼ်းဝႆႉ မိူၼ်ၸိူဝ်ႉၼင်ႇၶႃႈၼၼ်ႉ။ ၶႂ်ႈဝႃႈလွင်ႈဢၼ်မႂ်း တၵ်းလႆႈမၼ်းဝႆႉ မိူၼ်ၸိူဝ်ႉၼင်ႇၵေႃႉဢၼ်ယႂ်ႇလိူဝ်တွၼ်းၶႃႈ၊ ၸိူဝ်ႉၼင်ႇၼွင်ႉၸၢႆး ဢၼ်ၵဝ်ႁၵ်ႉၼႃႇလူင်လၢင်၊ တီႈမႂ်းၸမ်ႉ၊ ၸိူဝ်ႉၼင်ႇၼွင်ႉၸၢႆး ဢၼ်ယဵင်ႈၶႅၼ်းႁၵ်ႉၼႃႇလူင်လၢင် ၵွပ်ႈပိူဝ်ႈ ၸႃႇတီႉၼိူဝ်ႉလိူတ်ႈ ဢိၵ်ႇတင်းၵွပ်ႈပိူဝ်ႈၸဝ်ႈၽြႃးၼၼ်ႉဢေႃႈ။

17ပိူဝ်ႈၼႆလႄႈ ပေႃးမႂ်းမၢတ်ႈၵဝ်ပဵၼ်ၸိူဝ်ႉၼင်ႇ ၵေႃႉသေႈၸိုင် ႁပ်ႉတုင်းဢဝ်မၼ်း မိူၼ်ၸိူဝ်ႉၼင်ႇၵဝ်သေၵမ်း။

18ပေႃးမၼ်းမီးလွင်ႈတၢင်းဢၼ် ၽိတ်းပိူင်ႈတီႈမႂ်း ဢိၵ်ႇတင်းလွင်ႈတၢင်းဢၼ် ထုၵ်ႇၼီႈထုၵ်ႇၶွတ်ႇသေၸိူဝ်ႉသေပိူင်ၸိုင်၊ မၢတ်ႈပဵၼ်ပုၼ်ႈပဵၼ်တႃႇၵဝ်တႃႉ။-

19ၵဝ်တၵ်းတႅၼ်းပၼ်ဢေႃႈဝႃႈၼႆ ၵဝ် ပေႃးလူႉ ဢဝ်တင်းမိုဝ်းတူဝ်ၸဝ်ႈၵဝ်ႇ တႅမ်ႈဝႆႉဢေႃႈ။ ၵူၺ်းၵႃႈလွင်ႈဢၼ်မႂ်းမီးတီႈဢၼ်တၵ်းလႆႈ တႅၼ်းပၼ်ၼီႈဢၼ်ဝႃႈ တူဝ်မႂ်းၼၼ်ႉ တီႈၵဝ်ၼၼ်ႉၸိုင်ၵဝ်ဢမ်ႇဝႃႈ။-

20ၼွင်ႉၸၢႆးၵဝ်ဢိူၺ်း၊ ႁဵတ်းၵျေးၸူးတီႈၵဝ်ၼႂ်းၸဝ်ႈၽြႃးသေၵမ်း။ ႁႂ်ႈႁူဝ်ၸႂ်ၵဝ်သၢၵ်ႈသႃႇၼႂ်းၸဝ်ႈၶရိၸ်ႈသေၵမ်း။-

21မႂ်းတၵ်းထွမ်ႇဢဝ်ဝႃႈၼႆ ၵဝ်ဢမ်ႇမီးတၢင်းဢၼ် ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈယဝ်ႉဢမ်ႇၵႃး၊ ၵဝ်ႁူႉလွင်ႈဢၼ် မႂ်းတၵ်းႁဵတ်းၼမ်ၼႃႇ သေဢၼ်ၵဝ်လၢတ်ႈၼႆႉလႄႈ ၸင်ႇတႅမ်ႈပၼ်ၵႂႃႇၶႃႈဢေႃႈ။

22လိူဝ်သေၼၼ်ႉ၊ မႄးႁႅၼ်းဝႆႉတီႈ ပုၼ်ႈဢၼ်ၵဝ်တၵ်းယူႇသေၵမ်း။ လွင်ႈမၼ်းၸမ်ႉ ၵွပ်ႈပိူဝ်ႈဢၼ် သူႁဵတ်းသူးတွင်း ပထၼႃႇလႄႈ မၼ်းၸဝ်ႈတၵ်းပၼ်ဢၶႂၢင်ႉ ႁႂ်ႈၵဝ်လႆႈႁွတ်ႈထိုင် ၵႃႈတီႈဢၼ်သူမီးၼၼ်ႉဝႃႈၼႆ ၵဝ်မီးတၢင်းဢၼ်မုင်ႈထႃႈမွင်းထႃႈ ယူႇဢေႃႈ။

23ၸႃႉၸဵမ် ဢေႇပႃႇၽြႃႉ ဢၼ်လႆႈၶၢမ်ႇတူၵ်းၵိၼ်း လူၺ်ႈၵၼ်တင်းၵဝ် ၵွပ်ႈပိူဝ်ႈ ယေႇသူႉၶရိၸ်ႈ လႄႈ

24မႃႇၵူႉ၊ ဢႃႇရိတ်ႉတႃႇၶူႉ၊ တေႇမႃႉ၊ လူႉၵႃႇ ၊ ၵေႃႉသေႈဢၼ် သၢင်ႈႁဵတ်းႁူမ်ႈၵၼ်တင်းၵဝ်ၸိူဝ်းၼႆႉ တၵ်ႉၼၢႆမႂ်းဢေႃႈ။

25ႁႂ်ႈၵျေးၸူးၸဝ်ႈႁဝ်း ယေႇသူႉၶရိၸ်ႈ မီးလူၺ်ႈၵၼ်တင်း ၸႂ်ဝီႉၺိၺ်ႇသူသေၵမ်းလူၺ်ႈ။ လိၵ်ႈဢေႃးဝႃႇတႃႉၽီႉလေႇမုၼ်ႇယဝ်ႉယဝ်ႉဢေႃႈ။

Jump to: