Psalms 89 — Shan

1ၶႃႈၸဝ်ႈတၵ်းႁဵတ်းၵႂၢမ်းၵရူႉၼႃႇထႃႇဝရႃႉၽြႃးယူႇ တႃႇသေႇဢမ်ႇထၢတ်ႇလႄႈ၊ ၶႃႈၸဝ်ႈတၵ်းဢဝ်သဵတ်ႈၸႃႇၸဝ်ႈႁဝ်း ဢွၵ်ႇသူပ်းမွၵ်ႇလၢတ်ႈတီႈမဵဝ်းၵူၼ်း သိုပ်ႇသိုပ်ႇတၢမ်းတၢမ်းတီႈၶႃႈဢေႃႈ။-

2ၶႃႈၸဝ်ႈလႆႈလၢတ်ႈလႄႈဝႃႈ၊ ၵရူႉၼႃႇၸဝ်ႈႁဝ်း လႆႈတႄႇယူႇသေႇသေႇလႄႈ ၸဝ်ႈႁဝ်းႁႂ်ႈသဵတ်ႈၸႃႇၸဝ်ႈႁဝ်း မၼ်ႈၶိူင်ႇယူႇၵႃႈတီႈၼိူဝ်ၵၢင်ႁၢဝ်ၼၼ်ႉတီႈၶႃႈယဝ်ႉ၊ ဝႃႈၼင်ႇၼႆတီႈၶႃႈဢေႃႈ။-

3ၸဝ်ႈႁဝ်းမီးဢမိင်ႉၸမ်ႉ၊ ၵဝ်ႁဵတ်းပတီႉၺိၺ်ႇလူၺ်ႈၵၼ်တင်းၵေႃႉဢၼ်ၵဝ်လိူၵ်ႈၵဵပ်းဢဝ်ၼၼ်ႉလႄႈ ႁဵတ်းတၢင်းဢၼ်တိူင်ႇဝႃႈၵိၼ်ႇဝႃႈ တီႈၶႃႈၵဝ် တႃႇဝိတ်ႈ လႄႈဝႃႈ၊-

4ၵဝ်တၵ်းႁႂ်ႈၸိူဝ်ႉၶိူဝ်းမႂ်း မၼ်ႈၶိူင်ႇယူႇတႃႇသေႇဢမ်ႇထၢတ်ႇလႄႈ တၵ်းႁႂ်ႈပလၢင်ႇမႂ်း တႄႇယူႇၵႃႈတီႈမဵဝ်းၵူၼ်းသိုပ်ႇသိုပ်ႇတၢမ်းတၢမ်းဢေႃႈ၊ ဝႃႈၼင်ႇၼႆဝႆႉတီႈၶႃႈယဝ်ႉ၊ ၸေႇလႃႇ။

5ထႃႇဝရႃႉၽြႃးတီႈၶႃႈ၊ ၽႃႉၵၢင်ႁၢဝ်တၵ်းယွင်ႈယေႃး လွင်ႈတၢင်းဢၼ်လီဢၢမ်းၸဝ်ႈႁဝ်းတင်းလၢႆ ဢိၵ်ႇတင်းသဵတ်ႈၸႃႇၸဝ်ႈႁဝ်း ၵႃႈၼႂ်းၵၢင်ပရဵၵ်ႈသၢတ်ႈ ၵူၼ်းမူတ်းၸၢင်ႇၸိူဝ်းၼၼ်ႉတီႈၶႃႈဢေႃႈ။-

6လွင်ႈမၼ်းၸမ်ႉ ၵႃႈၼႂ်းၽႃႉၵၢင်ႁၢဝ်ၼၼ်ႉ၊ ၽူႈလႂ်တၵ်းၶၢမ်ႇတၢင်းဢၼ်ၶေႉၵၼ်တႅၵ်ႈၵၼ်တင်းထႃႇဝရႃႉၽြႃးလႆႈ။ ၼႂ်းလုၵ်ႈၸၢႆးၽြႃးၸိူဝ်းၼၼ်ႉ ၽူႈလႂ်တၵ်းမိူၼ်ၵၼ်တင်းထႃႇဝရႃႉၽြႃးလႆႈ။-

7ၽြႃးပဵၼ်ၸဝ်ႈ ပဵၼ်တီႈဢၼ်လီၵူဝ်လီႁႄၼႃႇလူင်လၢင် ၵႃႈၼႂ်းပရဵၵ်ႈသၢတ်ႈၶဝ်ၸိူဝ်းဢၼ်မူတ်းၸၢင်ႇၼၼ်ႉလႄႈ ပဵၼ်တီႈဢၼ်လီရူဝ်ႇသေႇၵူဝ်ယမ်ၼႃႇသေၶဝ်ၸိူဝ်းဢၼ်ယူႇလဵပ်ႈႁွပ်ႈမၼ်းၸဝ်ႈ တင်းသဵင်ႈတင်းလူင်ၼၼ်ႉဢေႃႈ။-

8ထႃႇဝရႃႉၽြႃး ၽြႃးပဵၼ်ၸဝ်ႈ၊ ၸဝ်ႈပူဝ်ႇပႃႇၵၢင်ႁၢဝ်တီႈၶႃႈ၊ ၽူႈလႂ်တၵ်းႁႅင်းယႂ်ႇၼႃႇ မိူၼ်ၸိူဝ်ႉၼင်ႇၸဝ်ႈႁဝ်းတီႈၶႃႈ။ ထႃႇဝရႃႉၽြႃးတီႈၶႃႈ၊ သဵတ်ႈၸႃႇၸဝ်ႈႁဝ်းၵေႃႈ မီးတၢင်းဢၼ်ဝႅင်းႁွပ်ႈၸဝ်ႈႁဝ်းယူႇတီႈၶႃႈဢေႃႈ။

9ၸဝ်ႈႁဝ်းလႆႈဢုပ်ႉပိူင်ႇတၢင်းဢၼ် မႃႇၼႃႉၸႂ်သုင်ၼမ်ႉသမ်ႇမုၵ်ႉတြႃႇၼၼ်ႉလႄႈ၊ မိူဝ်ႈဢၼ်လႅင်းၼမ်ႉပိူပ်ႈၼမ်ႉ လုၵ်ႉၶိုၼ်ႈၼၼ်ႉၸိုင် ၸဝ်ႈႁဝ်းႁႂ်ႈထၢတ်ႇၵႂႃႇယဵၼ်ၵႂႃႇတီႈၶႃႈဢေႃႈ။-

10ၸဝ်ႈႁဝ်းယႃႉႁၵ်း ရႃႇၶပ်ႉ ပႅတ်ႈ မိူၼ်ၸိူဝ်ႉၼင်ႇၵေႃႉဢၼ် လႆႈၶၢမ်ႇတၢင်းဢၼ်ဢဝ်တၢႆၼၼ်ႉလႄႈ ဢဝ်တင်းၶႅၼ်မိုဝ်းၸဝ်ႈႁဝ်းဢၼ်ႁႅင်းယႂ်ႇၼႃႇၼၼ်ႉ ႁႂ်ႈရၢၼ်ႇသူႇတင်းလၢႆ ၽူင်ႉပိဝ်ၵႂႃႇတီႈၶႃႈဢေႃႈ။-

11ၽႃႉၵၢင်ႁၢဝ်ပဵၼ်ဢုၵ်ႉၸႃႇၸဝ်ႈႁဝ်းတီႈၶႃႈဢေႃႈ။ လိၼ်မိူင်းၵေႃႈပဵၼ်ဢုၵ်ႉၸႃႇၸဝ်ႈႁဝ်းတီႈၶႃႈဢေႃႈ။ လေႃးၵထၢတ်ႈ ဢိၵ်ႇတင်းတၢင်းဢၼ်ပျေႉၸုမ်ႇတဵမ်ဝႆႉၵႃႈၼႂ်းမၼ်းၼၼ်ႉၸိုင် ၸဝ်ႈႁဝ်းတႄႇဝႆႉတီႈၶႃႈယဝ်ႉ။-

12ၼႃႈတၢင်းႁွင်ႇ ဢိၵ်ႇတင်းၼႃႈတၢင်းၸၢၼ်းၵေႃႈ၊ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ဝႆႉတီႈၶႃႈယဝ်ႉ။ လွႆ တႃႇပေႃႇ ဢိၵ်ႇတင်း လွႆ ႁေႇရမုၼ်ႇ ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ ႁဵတ်းၵႂၢမ်းဢၼ်သႂၢင်ႇဢၼ်သိူဝ်းတီႈၶႃႈဢေႃႈ။-

13ၸဝ်ႈႁဝ်းပျေႉၸုမ်ႇဝႆႉတင်းၶႅၼ်မိုဝ်း ဢၼ်မီးတၼ်းၶူဝ်းၼၼ်ႉတီႈၶႃႈဢေႃႈ။ မိုဝ်းၸဝ်ႈႁဝ်းႁႅင်းယႂ်ႇၼႃႇလႄႈ၊ မိုဝ်းၶွၼ်ၶႂႃၸဝ်ႈႁဝ်းသုင်ၼႃႇတီႈၶႃႈဢေႃႈ။-

14တၢင်းဢၼ်သိုဝ်ႈတေႃႇဢိၵ်ႇတင်း တၢင်းဢၼ်ၸီႇယၢင်ႇၸွမ်းၼင်ႇတြႃးၸိူဝ်းၼၼ်ႉ ပဵၼ်တူၼ်ႈၵဝ်ႉငဝ်ႈႁၢၵ်ႈပလၢင်ႇၸဝ်ႈႁဝ်းလႄႈ ၵရူႉၼႃႇဢိၵ်ႇတင်းသဵတ်ႈၸႃႇ ဢွၼ်ၼႃႈၸဝ်ႈႁဝ်းၵႂႃႇတီႈၶႃႈဢေႃႈ။

15ၵူၼ်းမဵဝ်းဢၼ်ႁူႉငိၼ်းသဵင်တၢင်းဢၼ်ၸူမ်းသိူဝ်းၼၼ်ႉ မီးမင်ႇၵလႃႇလႄႈ ထႃႇဝရႃႉၽြႃးတီႈၶႃႈ၊ ၶဝ်ၼၼ်ႉ လႆႈၵႂႃႇမႃးၵႃႈၼႂ်းဢၼ်လႅင်းၼႃႈၸဝ်ႈႁဝ်းတီႈၶႃႈဢေႃႈ။-

16ၶဝ်လႆႈသိူဝ်းပျေႃႇၼႂ်းၼႃႇမႃႉၸိုဝ်ႈသဵင်ၸဝ်ႈႁဝ်းယူႇ တင်းဝၼ်းတင်းဝၼ်းဢမ်ႇထၢတ်ႇလႄႈ ၶဝ်လႆႈႁွတ်ႈထိုင်တၢင်းဢၼ်ယုၵ်ႉယွင်ႈ ၵွပ်ႈပိူဝ်ႈတြႃးတၢင်းသိုဝ်ႈတေႃႇၸဝ်ႈႁဝ်းၼၼ်ႉတီႈၶႃႈဢေႃႈ။-

17ၸဝ်ႈႁဝ်းပဵၼ်မုၼ်ၽုင်းႁႅင်းၶဝ်ၼၼ်ႉလႄႈ၊ ၵွပ်ႈပိူဝ်ႈၵျေးၸူးၸဝ်ႈႁဝ်းၵေႃႈ၊ ၸဝ်ႈႁဝ်းယုၵ်ႉယွင်ႈၶဝ်လႅမ် ၶႃႈၸဝ်ႈႁဝ်းၶဝ်တီႈၶႃႈဢေႃႈ။-

18ၶိူင်ႈႁႄႉလၢၵ်ႈၼၢၵ်ႈၶႃႈၸဝ်ႈႁဝ်းၶဝ်ၼၼ်ႉ ပဵၼ်ၶွင်ထႃႇဝရႃႉၽြႃးလႄႈ၊ ၶုၼ်ႁေႃၶမ်းၶႃႈၸဝ်ႈႁဝ်းၶဝ်ၼၼ်ႉ ပဵၼ်ၶွင်ၽြႃးဢၼ်မူတ်းၸၢင်ႇ မဵဝ်း ဢီႉသရေႇလႃႉ ၼၼ်ႉတီႈၶႃႈဢေႃႈ။

19မိူဝ်ႈၼၼ်ႉၸဝ်ႈႁဝ်းဢဝ်တင်းရူႇပႃႇရူင်ႇ ဝႃႈဢွၵ်ႇသူပ်းတီႈၶဝ်ၸိူဝ်းဢၼ်မူတ်းၸၢင်ႇၸဝ်ႈႁဝ်းၼၼ်ႉလႄႈ လၢတ်ႈလႄႈဝႃႈၸမ်ႉ၊ ၵဝ်ဢဝ်တၢင်းဢၼ်ၸွႆႈထႅမ်မႃႉၸႃႉ ဢၢပ်ႈပၼ်ဝႆႉတီႈၵေႃႉဢၼ်ႁႅင်းယႂ်ႇၼၼ်ႉလႄႈ ၵဝ်ဢဝ်ၵူၼ်းဢၼ်လိူၵ်ႈၵဵပ်းဢဝ် ၵႃႈၼႂ်းၵူၼ်းတင်းလၢႆၼၼ်ႉၵေႃႉၼိုင်ႈ ယုၵ်ႉယွင်ႈဝႆႉယဝ်ႉ။-

20ၵဝ်ထူပ်းႁၼ်ၶႃႈၵဝ် တႃႇဝိတ်ႈ လႄႈ ဢဝ်တင်းၼမ်ႉမၼ်းဢၼ်မူတ်းၸၢင်ႇ ပၼ်ၽိၵ်ႈသိၵ်ႈတီႈမၼ်းဝႆႉယဝ်ႉ။-

21မိုဝ်းၵဝ်တၵ်းတႄႇယူႇၽၢႆႇမၼ်းလႄႈ၊ ၶႅၼ်ၵဝ်တၵ်းႁႂ်ႈမၼ်းမၼ်ႈၶိူင်ႇဢေႃႈ။-

22ရၢၼ်ႇသူႇဢမ်ႇလႆႈႁဵတ်းပႄႉႁဵတ်းၼႅင်ႇဢဝ်ၶွင်မၼ်း။ ၵူၼ်းဢၼ်ဢမ်ႇတြႃးၼၼ်ႉ ဢမ်ႇလႆႈၼိၵ်ႈၸၢၵ်ႈငႅၼ်းသႄးမၼ်း။-

23ၵဝ်တၵ်းပေႃႉထုပ်ႉရၢၼ်ႇသူႇမၼ်းတင်းလၢႆ ၵႃႈတီႈၽၢႆႇၼႃႈမၼ်းလႄႈ ပၼ်တၢမ်ႇတီႈၶဝ်ၸိူဝ်းဢၼ်ၸင်းမၼ်းၼၼ်ႉဢေႃႈ။-

24သဵတ်ႈၸႃႇဢိၵ်ႇတင်း ၵရူႉၼႃႇၵဝ် တၵ်းယူႇလူၺ်ႈၵၼ်တင်းမၼ်းလႄႈ ၶဝ်လႅမ်မၼ်းတၵ်းမီးတၢင်းဢၼ် ယုၵ်ႉယွင်ႈယူႇ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ဢေႃႈ။-

25ၵဝ်တၵ်းဢဝ်မိုဝ်းမၼ်း တၢင်ႇဝႆႉၵႃႈၼိူဝ်ပၢင်ႇလၢႆႇလႄႈ ဢဝ်မိုဝ်းၶွၼ်ၶႂႃမၼ်း တၢင်ႇဝႆႉၵႃႈၼိူဝ်ၼမ်ႉႁွင်ႈၼမ်ႉၵႄးတင်းလၢႆဢေႃႈ။-

26မၼ်းတၵ်းႁွင်ႉသႅၼ်ႇတီႈၵဝ်လႄႈဝႃႈ၊ ၸဝ်ႈႁဝ်းပဵၼ်ပေႃႈၵဝ်ၶႃႈ၊ ၽြႃးပဵၼ်ၸဝ်ႈၵဝ်ၶႃႈ၊ မၢၵ်ႇႁိၼ်ဢၼ်ၵႄႇသႄႇၶျွတ်ႈဢဝ်ၵဝ်ၶႃႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

27ၵဝ်တၵ်းဢဝ်မၼ်းၶၢၼ်းဝႆႉ ၼႂ်းဢရႃႇလုၵ်ႈၸၢႆးတူၼ်ႈလႄႈ ယုၵ်ႉယွင်ႈမၼ်းဝႆႉၵႃႈၼိူဝ်ၶုၼ်ႁေႃၶမ်းလေႃးၵီႇတင်းလၢႆဢေႃႈ။-

28ၵဝ်တၵ်းပႂ်ႉၵရူႉၼႃႇၵဝ် ပုၼ်ႈမၼ်းယူႇတႃႇသေႇလႄႈ၊ ပတီႉၺိၺ်ႇတြႃးၵဝ် တၵ်းမၼ်ႈၶိူင်ႇယူႇတီႈမၼ်းဢေႃႈ။-

29ၵဝ်တၵ်းႁႂ်ႈၸိူဝ်ႉၶိူဝ်းမၼ်း တႄႇယူႇတႃႇသေႇဢမ်ႇထၢတ်ႇလႄႈ ပလၢင်ႇမၼ်းတၵ်းပဵၼ်ၼိၵ်ႈၸႃႉထႃႇဝရႃႉယူႇ မိူၼ်ၸိူဝ်ႉၼင်ႇမိုဝ်ႉဝၼ်းၵၢင်ႁၢဝ်ၼၼ်ႉဢေႃႈ။

30ပေႃးလုၵ်ႈမၼ်းလၢၼ်မၼ်း ၸုၼ်ႉပႅတ်ႈတြႃးၵဝ်လႄႈ ဢမ်ႇၵႂႃႇမႃးၼႂ်းလွင်ႈတၢင်းဢၼ် ၵဝ်ၸီႇယၢင်ႇဝႆႉၸိူဝ်းၼၼ်ႉ၊-

31ပေႃးၶဝ်ႁဵတ်းဢမ်ႇပေႃးၼင်ႇႁိုဝ် တီႈထုင်းၽိင်ႈတြႃးၵဝ်တင်းလၢႆလႄႈ ယင်းဢမ်ႇပႂ်ႉပိင်းၺၢပ်ႈၵဝ်လႄႈယူႇၸိုင်

32ၵဝ်တၵ်းဢဝ်ၶွၼ်ႉဝၢႆ သင်ႇသွၼ်သုင်းမႃႉတၢင်းဢၼ်ၶဝ်ၽိတ်းပိူင်ႈၼၼ်ႉလႄႈ ဢဝ်ႁွႆးတၢမ်ႇတင်းလၢႆ သင်ႇသွၼ်သုင်းမႃႉ တူႉၸရိူၵ်ႈဢပႅတ်ႈၶဝ်ဢေႃႈ။-

33ၼႂ်းဝႃႈၼၼ်သေၵေႃႈ ၵဝ်တၵ်းဢမ်ႇၼုၵ်ႈဢဝ်ထွၼ်ဢဝ်ၵရူႉၼႃႇၵဝ် သေၵႃႈတီႈမၼ်းလႃးလႃးလႄႈ ဢမ်ႇယႃႉဢမ်ႇလိတ်ႈသဵတ်ႈၸႃႇၵဝ်။-

34ၵဝ်တၵ်းဢမ်ႇႁဵတ်း တၢင်းဢၼ်ႁဵတ်းဢမ်ႇပေႃးၼင်ႇႁိုဝ် တီႈပတီႉၺိၺ်ႇတြႃးၵဝ်ၼၼ်ႉလႄႈ ဢမ်ႇလႅၵ်ႈဢမ်ႇလၢႆႈ ၵႂၢမ်းဢၼ်ၵဝ်မီးဢမိင်ႉဢွၵ်ႇသူပ်းဢွၵ်ႇပၢၵ်ႇယဝ်ႉၼၼ်ႉ။-

35ၵဝ်ဢဝ်ပႃႇရမီႇတၢင်းဢၼ်မူတ်းၸၢင်ႇၵဝ် တိူင်ႇဝႃႈလႄႈဝႃႈ၊ ၵဝ်တၵ်းဢမ်ႇပႅတ်ႉဢမ်ႇလႅၼ် တႃႇဝိတ်ႈ ၵူၺ်ႉ၊ ဝႃႈၼင်ႇၼႆယဝ်ႉ။-

36ၸိူဝ်ႉၶိူဝ်းမၼ်းတၵ်းလႆႈတႄႇယူႇတႃႇသေႇဢမ်ႇထၢတ်ႇလႄႈ ပလၢင်ႇမၼ်းၵေႃႈ တၵ်းလႆႈပဵၼ်ၸိူဝ်ႉၼင်ႇၵၢင်ဝၼ်း ၵႃႈတီႈၽၢႆႇၼႃႈၵဝ်ဢေႃႈ။-

37မၼ်းတၵ်းလႆႈမၼ်ႈၶိူင်ႇယူႇတႃႇသေႇ မိူၼ်ၸိူဝ်ႉၼင်ႇလိူၼ်ၼၼ်ႉ ဢိၵ်ႇတင်း မိူၼ်ၸိူဝ်ႉၼင်ႇသၢၵ်ႈသေႇ ဢၼ်ပႂ်ႉသဵတ်ႈၸႃႇၵႃႈၼိူဝ်ၵၢင်ႁၢဝ်ၼၼ်ႉဢေႃႈ၊ ဝႃႈၼင်ႇၼႆတီႈၶႃႈယဝ်ႉ။ ၸေႇလႃႇ။

38ၵူၺ်းၵႃႈ ၸဝ်ႈႁဝ်းၸုၼ်ႉပႅတ်ႈလႄႈလီႁင်ႈတီႈၶႃႈယဝ်ႉ။ တၢင်းၸႂ်မႆႈၶႆႈၸႃႉၸဝ်ႈႁဝ်း ဢွၵ်ႇၸူးတီႈၵေႃႉဢၼ်ၶၢမ်ႇၽိၵ်ႈသိၵ်ႈ တီႈၸဝ်ႈႁဝ်းၼၼ်ႉတီႈၶႃႈယဝ်ႉ။-

39ၸဝ်ႈႁဝ်းယႃႉပတီႉၺိၺ်ႇ ဢၼ်ႁဵတ်းဝႆႉတင်းၶႃႈၸဝ်ႈႁဝ်းၼၼ်ႉပႅတ်ႈလႄႈ ဢဝ်သရၽူႇမၼ်း ၶျႃးတူၵ်းတီႈတႅမ်ႇတေႃႇထိုင်ႁွတ်ႈလိၼ်တီႈၶႃႈယဝ်ႉ။-

40ၸဝ်ႈႁဝ်းႁၵ်းႁူဝ်ႉဝၢင်းမၼ်း ၵႃႈမီးပႅတ်ႈလႄႈ ၵိူၼ်ႇယႃႉတိူၵ်ႈတီႈတိုၵ်းသိုၵ်းမၼ်း တင်းလၢႆပႅတ်ႈတီႈၶႃႈယဝ်ႉ။-

41ၶဝ်ၸိူဝ်းဢၼ်ၵႂႃႇတၢင်းပႆတၢင်းတင်းသဵင်ႈတင်းလူင်ၼၼ်ႉ ႁိမ်ႁူင်ႇဢဝ်မၼ်းလႄႈ မၼ်းပဵၼ်တီႈဢၼ်လီသႄႉလီသွမ်း တီႈၵူၼ်းႁိူၼ်းၸမ်ၵၼ်တင်းလၢႆတီႈၶႃႈဢေႃႈ။-

42ၸဝ်ႈႁဝ်းယုၵ်ႉယွင်ႈ မိုဝ်းၶွၼ်ၶႂႃရၢၼ်ႇသူႇမၼ်းတင်းလၢႆလႄႈ ႁႂ်ႈၶဝ်ၸိူဝ်းဢၼ်ႁဵတ်းၶတ်းၵၼ်တင်းမၼ်းတင်းသဵင်ႈတင်းလူင်ၼၼ်ႉ ၸူမ်းသိူဝ်းတီႈၶႃႈဢေႃႈ။-

43ၸဝ်ႈႁဝ်းႁႂ်ႈၶူမ်းလၢပ်ႇၶူမ်းလႅဝ်းမၼ်း မဵဝ်ႈၵႂႃႇသေလႄႈ ဢမ်ႇပၼ်ႁႂ်ႈမၼ်းၸုၵ်းၶၢမ်ႇလႆႈ ၵႃႈၼႂ်းပွႆးတိုၵ်းသိုၵ်းၼၼ်ႉတီႈၶႃႈ၊-

44ၸဝ်ႈႁဝ်းႁႂ်ႈသၢႆဢရွင်ႇမၼ်း လပ်ႉႁၢႆၵႂႃႇသေလႄႈ ဢဝ်ရႃႇၸႃႉပလၢင်ႇမၼ်း ၶျႃးတူၵ်းတေႃႇထိုင်ႁွတ်ႈလိၼ်တီႈၶႃႈယဝ်ႉ။-

45ၸဝ်ႈႁဝ်းႁႂ်ႈဢသၢၵ်ႈဢရွႆႇမၼ်း ဢၼ်ယင်းၼုမ်ႇယင်းၵမ်ၼၼ်ႉပွတ်းလႄႈ ဢဝ်တင်းတၢင်းဢၼ်ဢူၵ်းဢၼ်ဢၢႆ ႁူမ်ႇသုမ်ႇမၼ်းဝႆႉတီႈၶႃႈယဝ်ႉ။

46ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းယင်းဢမ်ႇထၢင်ႇသႃးလႃးလႃးလႄႈ၊ တၵ်းတဵတ်ႇယူႇၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ။ တၢင်းၸႂ်မႆႈၶႆႈၸႃႉၸဝ်ႈႁဝ်းၼၼ်ႉ တၵ်းမႆႈယူႇၸိူဝ်ႉၼင်ႇၽႆးၼၼ်ႉ ၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ။-

47ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၸူဝ်ႈတႃႇဢသၢၵ်ႈၶႃႈၸဝ်ႈပွတ်းၵႃႈႁိုဝ်။ ဢိၵ်ႇတင်းလွင်ႈဢၼ်ၸဝ်ႈႁဝ်း ၽၢၼ်ႇသၢင်းႁဵတ်းပဵၼ်လုၵ်ႈၵူၼ်းတင်းသဵင်ႈတင်းလူင် ပုၼ်ႈဢၼ်ၶဝ်တၵ်းဢမ်ႇပွင်ႇလွင်ႈၵႃႈသင် ၵႃႈႁိုဝ်လႃးလႃးၼၼ်ႉသေၵမ်းတီႈၶႃႈ။-

48ၵေႃႉဢၼ်ဢသၢၵ်ႈလိပ်းယူႇသေလႄႈ ယင်းဢမ်ႇထူပ်းဢမ်ႇႁၼ်တၢင်းတၢႆလႄႈ ၵႄႇသႄႇၼုၵ်ႈဢဝ်ဝီႉၺိၺ်ႇမၼ်းသေ ၵႃႈၼႂ်းမိုဝ်းမိူင်းမရၼႃႉၼၼ်ႉၸမ်ႉ၊ ပဵၼ်ၽူႈလႂ်။ ၸေႇလႃႇ။-

49ၸဝ်ႈၽြႃးတီႈၶႃႈ၊ ၵရူႉၼႃႇမိူဝ်ႈဢွၼ်ၼႆႉ ဢၼ်ၸဝ်ႈႁဝ်း ပႃးတင်းသဵတ်ႈၸႃႇသေလႄႈ၊ တိူင်ႇဝႃႈဝႆႉတီႈၶႃႈၸဝ်ႈႁဝ်း တႃႇဝိတ်ႈ ၼၼ်ႉ မီးၵႃႈလႂ်တီႈၶႃႈ။-

50ၸဝ်ႈၽြႃးတီႈၶႃႈ၊ ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်း တၢင်းဢၼ်သႄႉဢၼ်သွမ်း ဢၼ်ၶႃႈၸဝ်ႈႁဝ်းၶဝ်လႆႈၶၢမ်ႇၼၼ်ႉသေၵမ်းတီႈၶႃႈ။ ၶႃႈၸဝ်ႈလႆႈဢဝ်ဢမူႉၵူၼ်းတင်းသဵင်ႈတင်းလူင် ၵူႈသမ်ႇၵူႈပိူင်ၼၼ်ႉ ပႃးသႂ်ႇၵႃႈၼႂ်းႁူဝ်ဢူၵ်းၶႃႈၸဝ်ႈၵႂႃႇတီႈၶႃႈဢေႃႈ။-

51လွင်ႈမၼ်းၸမ်ႉ ထႃႇဝရႃႉၽြႃးတီႈၶႃႈ၊ ရၢၼ်ႇသူႇၸဝ်ႈႁဝ်းၸိူဝ်းၼၼ်ႉ ၸၢင်ႈသႄႉၸၢင်ႈသွမ်းၸဝ်ႈႁဝ်းတီႈၶႃႈဢေႃႈ။ ၶဝ်ဢွၼ်ၵၼ်သႄႉသွမ်းႁွႆးတိၼ် ၵေႃႉဢၼ်ၶၢမ်ႇၽိၵ်ႈသိၵ်ႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။

52ႁႂ်ႈထႃႇဝရႃႉၽြႃး မီးမင်ႇၵလႃႇၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်းသေၵမ်းလူၺ်ႈ။ ဢႃႇမိၼ်ႇတင်း ဢႃႇမိၼ်ႇ။