Zephaniah 2

Shan

← Chapter 1 Jump to: Chapter 3 →

1မဵဝ်းၵူၼ်းဢၼ် ၽႂ်ဢမ်ႇၵျိူၵ်ႈ ဢမ်ႇၶႂ်ႈလႆႈၶဝ်ဢိူၺ်း၊ ဢွၼ်ၵၼ်ၸႅတ်ႈထၢမ် ၸႅတ်ႈတူၺ်းတူဝ်သူတႃႉ။-

2ဢွၼ်ၵၼ်ၸႅတ်ႈထၢမ် ၸႅတ်ႈတူၺ်း ၸူဝ်ႈဢၼ်ဢမ်ႇပႆႇၸီႇယၢင်ႇ ၸွမ်းၼင်ႇဢမိင်ႉၸဝ်ႈ၊ ၸူဝ်ႈဢၼ်မိုဝ်ႉဝၼ်းသူ ဢမ်ႇပႆႇပူၼ်ႉၵႂႃႇ မိူၼ်ၸိူဝ်ႉၼင်ႇၵႅပ်ႇ၊ ၸူဝ်ႈဢၼ်တၢင်းၸႂ်မႆႈၶႆႈၸႃႉ ထႃႇဝရႃႉၽြႃးဢၼ်ႁႅင်းယႂ်ႇၼႃႇၼၼ်ႉ ဢမ်ႇပႆႇႁွတ်ႈထိုင် ၵႃႈၼိူဝ်သူ၊ ၸူဝ်ႈဢၼ်မိုဝ်ႉဝၼ်း ဢၼ်တၢင်းၸႂ်မႆႈၶႆႈၸႃႉ ထႃႇဝရႃႉၽြႃးၼၼ်ႉ ဢမ်ႇပႆႇႁွတ်ႈထိုင် ၵႃႈၼိူဝ်သူၼၼ်ႉတႃႉ။-

3ၵူၼ်းဝၢၼ်ႈၵူၼ်းမိူင်း ဢၼ်ႁူဝ်ၸႂ်ၶျႃးတႅမ်ႇလႄႈ ၵမ်ၵျၢင်ႉၸွမ်းၼင်ႇတြႃး တင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ႁႃဢဝ် ထႃႇဝရႃႉၽြႃးတႃႉ။ ဢွၼ်ၵၼ်ႁႃဢဝ် တၢင်းဢၼ်သိုဝ်ႈတေႃႇတႃႉ။ တၢင်းဢၼ် ႁူဝ်ၸႂ်ၶျႃးတႅမ်ႇၵေႃႈ ဢွၼ်ၵၼ်ႁႃဢဝ်တႃႉ။ သူၸၢင်ႈၶႄး တၵ်းလႆႈတဵတ်ႇမႅပ်ႉယူႇ ၼႂ်းမိုဝ်ႉဝၼ်းဢၼ် ထႃႇဝရႃႉၽြႃး ၸႂ်မႆႈၶႆႈၸႃႉၼၼ်ႉ ဢေႃႈ။

4ဝဵင်း ၵႃႇၸႃႉ တၵ်းပဵၼ် တီႈဢၼ်ၸုၼ်ႉပႅတ်ႈလႄႈ ဝဵင်း ဢႃႇသၵေႇလုၼ်ႇ တၵ်းပဵၼ် တီႈဢၼ်ပႄႇၽဵဝ်ႈပႅတ်ႈဢေႃႈ။ ၶဝ်တၵ်းႁေႃႈ ၶုၼ်ဝဵင်း ဢႃႇၸုတ်ႉ တင်းလၢႆ ဢွၵ်ႇပႅတ်ႈ ၶိင်ႇဝၼ်းတဵင်ႈလႄႈ ဝဵင်း ဢေႇၵြုၼ်ႇ ၵေႃႈ ၶဝ်တၵ်းလႆႈၶၢမ်ႇ တၢင်းဢၼ်ၵိူၼ်ႇယႃႉပႅတ်ႈဢေႃႈ။-

5ၵူၼ်းမဵဝ်း ၶေးရသီႉ ဢၼ်ယူႇၵႃႈတီႈ ႁိမ်းၽင်ႇပၢင်ႇလၢႆႇၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ မိူင်း ၶႃႇၼၢၼ်ႇ တီႈယူႇၵူၼ်း ၽီႉလိတ်ႉတီႉ ဢိူၺ်း၊ ၼုၵ်ႈၵပၢတ်ႈ ထႃႇဝရႃႉၽြႃး မီးယူႇၽၢႆႇၼိုင်ႈတင်းသူဢေႃႈ။ ၵဝ်တၵ်းယႃႉၽဵဝ်ႈမႂ်းပႅတ်ႈ ႁႂ်ႈထၼ်ႈပေႃး ဢမ်ႇမီးၵေႃႉဢၼ်ယူႇဢၼ်သဝ်း ၵႃႈၼႂ်းမႂ်းဢေႃႈ။-

6ၵႃႈတီႈႁိမ်းၽင်ႇပၢင်ႇလၢႆႇၼၼ်ႉ တၵ်းပဵၼ်ပုၼ်ႈ တီႈဢၼ်ၵိၼ်ယူႇသေႇသေႇ၊ တီႈဢၼ်ၶုတ်းၼမ်ႉမေႃႇ ပုၼ်ႈၶဝ်ၸိူဝ်းဢၼ် လဵင်ႉသူဝ်းထိင်းသူဝ်း၊ တီႈဢၼ်တၵ်းႁဵတ်းၶွၵ်ႈသူဝ်းတင်းလၢႆဢေႃႈ။-

7ၽင်ႇပၢင်ႇလၢႆႇၼၼ်ႉၵေႃႈ တၵ်းပဵၼ်ပုၼ်ႈၵူၼ်းမဵဝ်း ယူႉတႃႉ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႄႈ ၶဝ်ၼၼ်ႉ တၵ်းဢွၼ်ၵၼ်ၵိၼ်ယူႇ ၵႃႈတီႈၼၼ်ႈဢေႃႈ။ ၶိင်ႇၵၢင်ၶမ်ႈၵေႃႈ ၶဝ်တၵ်းဢွၼ်ၵၼ်ၼွၼ်းယူႇ ၵႃႈတီႈႁိူၼ်းၵႃႈၼႂ်းဝဵင်း ဢႃႇသၵေႇလုၼ်ႇ ၸိူဝ်းၼၼ်ႉလႄႈ ထႃႇဝရႃႉၽြႃး ၽြႃးပဵၼ်ၸဝ်ႈၶဝ် တၵ်းမႃးလူ မႃးတူၺ်းၶဝ်လႄႈ ပႄႇၽေးတၢင်းဢၼ်သိမ်းဢဝ်ၵႂႃႇၼၼ်ႉ ပႅတ်ႈသေၵႃႈတီႈၶဝ်ဢေႃႈ။-

8ၵဝ်လႆႈငိၼ်းၵႂၢမ်း ဢၼ်ၵူၼ်းမဵဝ်း မေႃႇၽႃႉ တင်းလၢႆ တၢင်ႇဢပႅတ်ႈ ဢိၵ်ႇတင်း ၵႂၢမ်းဢၼ်ၵူၼ်းမဵဝ်း ဢမ်ႇမုၼ်ႇ တင်းလၢႆ သႄႉသွမ်း ဢၼ်ၶဝ်ဢဝ်သႄႉသွမ်း ၵူၼ်းမဵဝ်းၵဝ် တင်းလၢႆသေလႄႈ ဢုပ်ႇဢၢတ်ႇယူႇၽၢႆႇၼိုင်ႈ တင်းၶွပ်ႇၼမ်ႉ လႅၼ်လိၼ်ၶဝ်ၼၼ်ႉ ယဝ်ႉယဝ်ႉ။-

9ပိူဝ်ႈၼႆလႄႈ ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼင်ႇဢၼ် ၵဝ်ဢသၢၵ်ႈလိပ်းယူႇၼၼ်ႉ၊ မိူင်း မေႃႇၽႃႉ တၵ်းလႆႈ ပဵၼ်ၸိူဝ်ႉၼင်ႇဝဵင်း သေႃးတုမ်ႇ ၊ မိူင်း ဢမ်ႇမုၼ်ႇ တၵ်းလႆႈပဵၼ်ၸိူဝ်ႉၼင်ႇဝဵင်း ၵေႃးမေႃးရႃႉ ၊ တီႈဢၼ် တူၼ်ႈၼၢမ်ဢွၵ်ႇ၊ တီႈဢၼ် ၶုတ်းလိၼ်ပုၼ်ႈဢၼ်တၵ်းႁုင်ၵိူဝ်၊ တီႈဢၼ်လူႉလႅဝ်ယူႇသေႇသေႇ ၼၼ်ႉဢေႃႈ။ ၵူၼ်းၵဝ်ဢၼ်ၵိုတ်း ဢၼ်ၵျၢၼ်ႇၸိူဝ်းၼၼ်ႉ တၵ်းႁိမ်ႁူင်ႇဢဝ်ၶဝ်လႄႈ ၵူၼ်းမဵဝ်းၵဝ် ဢၼ်ၵိုတ်းဢၼ်ၵျၢၼ်ႇ ၸိူဝ်းၼၼ်ႉ တၵ်းၶၢမ်ႇဢဝ် ဢမူၺ်ႇၶဝ်ဢေႃႈ။-

10ၶဝ်တၵ်းလႆႈၶၢမ်ႇၸိူဝ်ႉၼင်ႇၼၼ် ပုၼ်ႈတႃႇ တၢင်းဢၼ်မႃႇၼႃႉၶဝ် ယႂ်ႇၼၼ်ႉ ၵွပ်ႈပိူဝ်ႈ ဢၼ်ၶဝ်သႄႉသွမ်းလႄႈ ဢုပ်ႇဢၢတ်ႇယူႇၽၢႆႇၼိုင်ႈ တင်းၵူၼ်းၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉဢေႃႈ။-

11ထႃႇဝရႃႉၽြႃး တၵ်းပဵၼ် တီႈဢၼ်လီၵူဝ်လီႁႄ တီႈၶဝ်လႄႈ မၼ်းၸဝ်ႈ တၵ်းဢဝ်ၽြႃးလေႃးၵီႇၵႃႈမီး ႁႂ်ႈပဵၼ်ဢၼ်လဵၵ်ႉ ဢၼ်ဢွၼ်ႇဢေႃႈ။ ၵုၼ်ၼႂ်းၼမ်ႉ တီႈယူႇၵူၼ်းတၢင်ႇၸိူဝ်ႉတၢင်ႇၶိူဝ်း ၵႃႈမီးၸိူဝ်းၼၼ်ႉ တၵ်းဢွၼ်ၵၼ်ယူႇ ၵႃႈၼႂ်းတီႈယူႇၶဝ် ႁင်းၽႂ်ႁင်းမၼ်းၼၼ်ႉ သေလႄႈ ဝႆႈသႃမၼ်းၸဝ်ႈဢေႃႈ။-

12ၵူၼ်းမိူင်း ၵူႉသႃႉ ၶဝ်ဢိူၺ်း၊ သူၵေႃႈ တၵ်းလႆႈၶၢမ်ႇတၢႆ လူၺ်ႈလၢပ်ႇၵဝ် လႅဝ်းၵဝ်ဢေႃႈ။-

13မၼ်းၸဝ်ႈ တၵ်းယဵတ်ႇမိုဝ်းမၼ်းၸဝ်ႈ ၵႃႈၼိူဝ်ၼႃႈတၢင်းႁွင်ႇလႄႈ ယႃႉမိူင်း ဢႃႇသူႉရီႉ ပႅတ်ႈဢေႃႈ။ မၼ်းၸဝ်ႈ တၵ်းႁႂ်ႈဝဵင်း ၼီႉၼေႇဝူၺ်ႇ ပဵၼ်တီႈဢၼ် သဵတ်ႇၵူၼ်းယဵၼ်ၵူၼ်း၊ တီႈဢၼ်ႁႅင်ႈႁွင် မိူၼ်ၸိူဝ်ႉၼင်ႇ တီႈပၢင်ႇတီႈပဵင်း ၼၼ်ႉဢေႃႈ။-

14ၽုင်သူဝ်း ဢိၵ်ႇတင်း တူဝ်ထိူၼ်ႇႁၢႆႉ တၢင်ႇၸိူဝ်ႉတၢင်ႇၶိူဝ်း ၵႃႈမီး တၵ်းဢွၼ်ၵၼ်ၼွၼ်းၵႃႈတီႈ ၼႂ်းၵၢင်မၼ်းလႄႈ ၼူၵ်ႉၵွၼ်ႉႁွႆ ဢိၵ်ႇတင်း မဵၼ်ႈတင်းလၢႆ တၵ်းတူၵ်းတီႈ တူၵ်းလႅၼ်ယူႇ ၵႃႈတီႈၶိုဝ်ႇၽၵ်းတူမၼ်း ၸိူဝ်းၼၼ်ႉဢေႃႈ။ သဵင်ၶဝ်တၵ်းႁူၼ်ႈမေႃးယူႇ ၵႃႈၼႂ်းႁူးလၢင်းတဵၼ် တင်းလၢႆလႄႈ ၶူင်ႇၽၵ်းတူတင်းလၢႆ တၵ်းမီးတၢင်းဢၼ် သဵတ်ႇၵူၼ်းယဵၼ်ၵူၼ်းယူႇ ၵွပ်ႈပိူဝ်ႈဢၼ် မၼ်းၸဝ်ႈပိုတ်ႇပိၼ်ႈ လၢႆးမွၵ်ႇလၢႆးမႂ် ၼိူဝ်ႉမႆႉ ဢႃႇရိတ်ႉ ၸိူဝ်းၼၼ်ႉပႅတ်ႈဢေႃႈ။-

15ဝဵင်းၼၼ်ႉ ပဵၼ်ဝဵင်း တၢင်းဢၼ်ယၢမ်ႈမီး တၢင်းဢၼ်ၸူမ်း ဢၼ်သိူဝ်းယူႇ၊ ဢၼ်ၵၢင်းလွတ်ႈတင်း သေႃးၵႃႉယူႇသေလႄႈ လၢတ်ႈၼႂ်းၸႂ်လႄႈဝႃႈ၊ မီးၵဝ်ၵူၺ်းဢေႃႈ။ ၼွၵ်ႈသေၵဝ်ၼႆႉ ဢမ်ႇမီးၽူႈလႂ်၊ ဝႃႈၼင်ႇၼႆယူႇ လူင်ပႄႇ။ မိူဝ်ႈလဵဝ်ၼႆႉ မၼ်းပဵၼ်တီႈဢၼ် ပႄႇၽဵဝ်ႈပႅတ်ႈ၊ တီႈဢၼ်တူဝ်ထိူၼ်ႇႁၢႆႉ ၼွၼ်းယူႇယဝ်ႉလူင်ပႄႇ။ ၶဝ်ၸိူဝ်းဢၼ် ၵႂႃႇတၢင်းပႆတၢင်းၵၢႆၵႂႃႇ ၵႃႈတီႈႁိမ်းမၼ်းၼၼ်ႉ တၵ်းဢွၼ်ၵၼ်ႁဵတ်းသဵင် သီႉသီႉသေႃႉသေႃႉ သႄႉသွမ်းလႄႈ သၼ်ႇမိုဝ်း ၽႅတ်းမိုဝ်းၶဝ်ဢေႃႈ။

← Chapter 1 Jump to: Chapter 3 →