1 Peter 5

Sidamo

← Chapter 4 Jump to:

1Xa ani insa ledo beetekiristaanete cimeessa ikkoommohu, Kiristoosi qarrire farci'reemmoha ikkoommohu, hattono albillitte leellara noo ayirrinyi beeqqaancho ikkeemmohu, giddo'ne noore beetekiristaanete cimeeyye amaaleemmonsa.

2Eeggo uyinoonni'neta Maganu hoshsha allaalle; allaaltinanni woyiteno Maganu hedo garinni baxxine allaalle; woxeho hagaagatenni ikkikkinni, soqqamate noo'ne halchonni ikkona.

3Hoshshate dancha lawishsha ikke ikkinnina, eeggo uyinoonni'nere gadadissine wolqatenni gashshitinoonte.

4Konne coye agadhitiniro, Qaru Allaalaanchi daanno yannara ba'annokkita ayirrinyu ba'latto adhitinanni.

5Ki'ne wedelluno, cimeeyyete hajajamme. Baalunku joongille uddanote gede uddidhine mimmitoho soqqamme. «Maganu boonaleeyye giwanno; jooguulleho kayinni elto aanno» yine borreessinoonni.

6Yannasinni gotti assanno'ne gede, wolqaataame Maganu anga woroonni umo'ne heeshshi asse.

7Ki'nere malannohu isootina, qarrisanno'nere baala isi aana tuqqe.

8Jilbunni heedhe; balala gede ikkitinoonte! Diini'ne Daawuloosi egemmannoha hasi'ranni ittananno doobbichi gede qooxeessi'nera doyanni no.

9Gobba baalate noori roduuwi'ne konne qarra adhitannota affine, ammanatenni iso kaajjitine gibbe.

10Shiima yanna geeshsha qarra adhitinihu gedensaanni, Kiristoosi Yesuusinni hegere ayirrinyiwa woshshino'nehu, elto baalate Magani, isinni amadino'ne qarriwiinni gatisanno'ne; irkisanno'ne; kaajjishanno'ne; teesiisanno'ne.

11Hegerenni hegere geeshsha ayirrinyunna roorre isira ikkito. Hamii'ni!

12Ammanaminoho yee hedeemmo rodii Silaasi widoonni, tenne sokka haranchunni borreessoommo'ne. Borreessoommo'nehuno, amaalammo'neranna tini halaalaancho Maganu elto ikkitinota farci'rammo'nera yeeti. Kunnira, tenne Maganu eltonni kaajjitine uurre.

13Ki'ne gede doorantinoti Baabilooni heedhanno beetekiristaane keere dhaantino'ne. Beetti'ya Maarqoosino keere dhaamino'ne.

14Ammanaasinete baxillinni mimmito sunqitinanni keere haadhe. Kiristoosire ikkitinoonnirira baalaho keeru iillo'ne.

← Chapter 4 Jump to: