2 John 1

Sidamo

Jump to:

1Ani geerchu, doorantino ayirradoranna oososera, soommo sokka tenneeti; ani halaalunni baxeemmo'ne; ane calla ikkummokkinni halaale egentinori baalu baxxanno'ne.

2Kuni halaali giddonke noohonna albillitteno hegere geeshsha ledonke hee'rannoho.

3Maganu Annunnitinna Beettisi Yesuusi Kiristoosi elto, maaronna keeru, halaalunninna baxillunni ninke ledo hee'ro.

4Oosokki giddonni mitu mitu, Maganu Annu hajajinonke garinni halaalaancho heeshsho heedhanni noota afe lowo geeshsha hagiidhoommo.

5Xaano ayirrado'ya! Borreesseemmohe hajajo haaro ikkitukkinni albanni ninkewa noo hajajooti; iseno, «Mimmitinke ledo baxammo» yitannote.

6Halaalaancho baxilleeti yaa Maganu hajajo wonshate; tini hajajono alba macciishshitinoonninte gede, «Baxillunni heedhe» yitannote.

7Yesuusi Kiristoosi manna ikke dayinota ammantannokkiri lowo so'risiisaano ka'e no; kuri so'risiisaanotenna Kiristoosa qoxxissannoreeti.

8Ki'ne kayinni daafuri'neha wo'ma waaga afidhinanni gede ikkinnina, loosidhinoonnihu ba"anno'nekki gede qorophe.

9Kiristoosi rosiisino garinni hee'rannokkihuranna isiwiinni xeerti'rannohura Maganu dinosi; Kiristoosi rosiisino garinni hee'rannohura Maganu Annunna Beettu noosi.

10Konne roso haa'rikkinni ki'newa daannoha mini'nera koyisidhinoonte; keere nafa haadhinoonte.

11Hattooha keere haa'rannohu busha loososi gutamanno.

12Borreessammo'nera hasi'reemmohu lowo coyi nooe; ikkollana baalankare borreesse soyammo'nera dihasi'reemmo; roorenka hagiirrinke guuta ikkanno gede ki'newa dayenna xaande hasaambammora hexxo assi'roommo.

13Doorantinori rodookki ooso keere dhaantinohe.

Jump to: