2 Timothy 1

Sidamo

Jump to: Chapter 2 →

1Kiristoosi Yesuusinni afi'noonni hexxo heeshshonnite xintinni Maganu yiino garinni Yesuusi Kiristoosi soqqamaasincho ikkoommohu ani Phaawuloosi soommo sokka:

2Baxeemmohu beetti'ya Ximootewoosira: Maganu Annunna Mootichinke Yesuusi Kiristoosi elto, maaronna keeru ate ledo hee'ro.

3Wo'manka woyite hashshanna barra huuccatto'yanni qaageemmo woyite, annuwa'ya assitunte gede anino xalalu tii'inni soqqameemmo Magano galaxxeemmo.

4Hindiiddokki qaageemmo; kunnira lowo geeshsha tashshi yaannoe gede ate afammora halchoommo.

5Ateta halaalaancho ammana qaageemmo. Hattoo ammana alba ahaahekki Loyidaranna amakki Ewuniqera no. Aterano hatti ammana nooheta afoommo.

6Kunnira, anga aanaho worummohe yannara uyinoonnihehanna giddokki giirate gede ikkite noota Maganu elto galagalte bushshatto gede qaagiisseemmohe.

7Maganu wolqanniha, baxillunnihanna umo qee'late Ayyaana ikkinnina waajjillu ayyaana diuyinonke.

8Kunni ka'a Mootichinkere farci'rate saalfattooti; isi daafira yee usuramoommo aneno fokkitooti. Maganu aannohe wolqanni Danchu Duduwira yite ane ledo qarra adhi.

9Ninke loosinni ikkikkinni isi hedosinninna eltosinni gitisinonke. Qullaawa heeshshora woshshinonke; tenne elto lowo dirira albaanni Kiristoosi Yesuusi widoonni qole uyinonke.

10Tini elto, Gatisaanchinke Yesuusi Kiristoosi daanni xa leeltino. Isi reyote wolqa hune, Danchu Duduwi widoonni qole reyo nookkita hegere heeshsho leellishinonke.

11Anino kunni Duduwi lallawaancho, soqqamaasinchonna rosiisaancho ikke shoomamoommo.

12Konne qarra adheemmohuno kunni daafiraati. Ikkollana ammanoommoha egennoommo daafira disaaleemmo. Uyinoonnie eeggo hakko barri geeshsha agadha hasiissannoeta huwatoommo.

13Anewiinni rosoottoha hawaqi'nanni qaale lawishsha assidhe, Kiristoosi Yesuusinni noonke ammananninna baxillinni agadhi.

14Uyinoonniheta dancha eeggo, ledonke noohu Qullaawu Ayyaani widoonni qolte agadhi.

15Issiyaho noori baalu ane agurte hadhinota afootto. Agurte hadhueri giddo Figeluusinna Hermogeneesi no.

16Mootichu Onesifoori mini mannira maaro oonsa. Isi ane lowo yanna kaa'linoe; usurama'yarano disaalino.

17Hakkiinnino sae Rooma dayi yannarano jaate hase afinoe.

18Goofimarchu barrano Mootichu maarosi oosi; Efesooni noommo yannara soqqaminoe gara ati seekkite afootto.

Jump to: Chapter 2 →