Daniel 6

Sidamo

← Chapter 5 Jump to: Chapter 7 →

1Daariyoosi gobba gashshitannore 120 gashshaano wori.

2Qoleno isira aante mitturino xeannosikki gede kaa'litannorenna wole gashshaano towattannore Daanieelinna woloota 2 manna doori.

3Daanieeli afi'rinotenni addi guuntenni woloota roorinota loosisinni leellishi. Kunnira moote gashshootisi baalu aana roorricha asse worasira hedi.

4Hakkunni gedensaanni ledosirinna wole gashshaano Daanieelinna isi loosanno loosi gashshootunnihu aana xe'o hasse su'ma huntasira heddu. Ikkollana Daanieeli lowo geeshsha qorophannohanna ammanaminoha ikkinohura, mitte so'ro woy sao aanasi affara didandiitino.

5Kunnira insa insanaawa, «Amma'note haja widoonni anfanni so'ro heedhuro ikkinnina Daanieeli bushiinshanni doogo mitteno diafi'neemmo» yitu.

6Hakkunni gedensaanni mootenniwa marte, «Moote Daariyoosi! Ati hegerera hee'ri!

7Gashshootikki looso loosate doorammoommo towataasine, amaalaasinenna gobba gashshitannori baalu sumuu yinoommohu mittu coyi no. Hakkuno xaanni kayise 30 barri geeshsha ate agurranna wole magano woy wole mancho huucci'nannikki gede lallawisiisattora hasi'neemmo. Konne lallawa diigannohu hee'riro doobbiyu balera tunganni gede hajaji.

8Kunnira moote, kuni lallawi Medooninna Faarisi seeri garinni ayirradonna soorramannokkiha ikkanno gede malaatisi» yitu.

9Kunni garinni moote Daariyoosi lallawa borreessineenna malaatisi.

10Daanieeli lallawa malaatinsoonnita afihu gedensaanni galanno minira iimaanni noo dargira fuli; galanno mini aana noo dargi Yerusaalamete alba higginoti fa'nantino masikootta noosiho. Alba rosinonte gede guluphe Maganosi galaxxanni barrunni 3 hige huucci'ri.

11Isira gano gantannori mitteenni marte, Daanieeli Maganosi huucci'ranna affu.

12Baalunku mitteenni mootenniwa marte Daanieeli lallawa diigino daafira, «Moote! 30 barri geeshsha ate agurranna wole magano woy wole mancho huucci'rannohu hee'riro doobbiyu balera tugamanno gede lallawu aana dimalaatisitto?» yitu. Mooteno, «Ee! Medooninna Faarisi seeri garinni ayirradonna soorramannokki gede asse lallawu aana malaatisoommo» yii.

13Insano, «Hatto ikkiro moote, Yihudunni qafadante dagginori giddonni Daanieeli ate ayirrisa giwino; malaatisse fushshootto lallawano diige barrunni 3 hige maganosi huucci'ranni no» yitu.

14Mooteno konne coye macciishshe lowo geeshsha dadilli. Daanieelino gatisasira hedi. Arrishsho e'a geeshsha iso gatisanno doogo baala afi'rara wo'naali.

15Daanieeli baarigaarra mitteenni dagge, «Moote! Medooninna Faarisi seeri garinni mittu moote fushshino lallawa woy hajajo soorra dandiinannikkita afi!» yitusi.

16Kunnira Daanieeli amande abbine doobbiyu balera tunganni gede moote hajaji. Daanieelino, «Wo'manka woyite ammanamatenni soqqamattosi Magani gatisohe!» yiisi.

17Balete afoono kinchunni cunfi; aye manchino Daanieeli fushshe gatisara wo'naalannokki gede moote gashshootisihanna ledosi gashshaano maatama aanaho gani.

18Mooteno mootimmasi minira ha'ri; sagaleno di"itino; hagiirsiisanno coye shiqinshannisita giwe goxanono hooge gali.

19Soodo duu'mo saaqqanni heedheennanni moote rahe kae doobbiyu balewa mari.

20Hakkiira iille dadillaamu qaalinni, «Heeshshote Magani soqqamaancho Daanieeli! Barru baala ammanamatenni soqqamattosi Magani doobbiyu afiinni gatisahera dandiinoni?» yii.

21Daanieelino daware, «Moote! Hegerera hee'ri!

22Doobbiyu gawajjannoekki gede Maganu sokkaasincho soye afoonsa cufino. Togo assinohuno ani keeraancho ikkoommotanna ate aanano sao assoommokkita afinohuraati» yii.

23Mooteno lowo geeshsha hagiidhe, Daanieeli balete giddonni fushshitannosi gede hajaji. Fushshini woyite Magano addaxxinohura bisisi aana mitte madano dianfoonni.

24Hakkunni gedensaanni Daanieeli bushiishshure amande abbinanni gede moote hajaji; insa, meentonsanna oosonsa mitteenni doobbiyu balera tunganni gede assi. Balete hundira iillitukkinni doobbiyu iima amade bibbidinsa; miqqansa baalano cancani.

25Hakkunni gedensaanni moote Daariyoosi gobba baalate hee'rannohuranna addi addi afiinni coyi'ranno mannira borrotenni, «Keeru ki'nera ikko!

26Gashshooti'ya giddo hee'ranno manni baalu, Daanieeli Magano waajjanno gedenna, ayirrisanno gede lallawunni hajajoommo. Maganisi heeshshonnihonna hegerera hee'rannoho; isi hegere hegerera mootete; gashshootisirano gawalo dino.

27«Isi gatisanno; gargareno fushshanno; isi gordohonna baattote aana, dhaggenna maalale assanno. Daanieelino doobbiyu afiinni gatisino» yee sokka soyi.

28Daanieeli Daariyoosinna Faarisi moote Qiroosi gashshooti yanna baalate ayirre hee'ri.

← Chapter 5 Jump to: Chapter 7 →