Ezra 9

Sidamo

← Chapter 8 Jump to: Chapter 10 →

1Kuni coyi ikkihu gedensaanni sooreeyye anewa dagge, «Qeesootanna Leewaawoota aanaho lexxe Israeelete manni, olliinsa Kana"aanootu, Hitootu, Ferizootu, Iyaabuusootu, Amoonootu, Moaabootu, Gibitsootunna Amooraawootu battewiinni dibaxxino.

2Israeelete manni, tenne gosa seenne adhino; Maganunnihu qullaawu manni dagate ledo karsiisamino. Tenne bunshera umo ikkitinori sooreeyyenkeetinna gashshaanonkeeti» yitue.

3Anino konne coye macciishshummo yannara, dadille uddano'ya daroommo. Umo'yanna ereeda'ya cidhoommo. Lowo geeshsha mase woffi yee ofolloommo.

4Qafadotenni higginori assitino saonni kainohunni, Maganu wole gosa ledo adhamate daafira coyi'rino qaale waajjitinori baalu anewa gamba yitu. Anino dadillanni hawarro kakkalo geeshsha ofolloommowa keeshshoommo.

5Hawarro kakkalo shiqqanno yannara, daroommo uddano uddi'roommo gedeenni dadillanni ofolloommowiinni kaoommo. Guluchi'yanni guluphe, anga'ya Magani'ya Kaaliiqiwa qole diriirse,

6«Magano'ya ballo, cubbinke uminkera iimaanni saino; saonkeno gordo iillitino. Magano'ya ballo, alira atewa hige la"ate nafa saalfatoommo.

7Akaakkanke yannanni kayisse xaa geeshsha saonke batidhino. Cubbinkenni kainohunni, techonte gede ninke, mootoollankenna qeesootinke allagga mootoolla anga umbe bagadoho, qafadote, saamamatenna shollinyeho sa'ne aamammoommo.

8«Xa kayinni, Kaaliiqa Maganonke borojjimmatenni fushshite, Qullaawa Basera keerunni hee'neemmo gede, shiima yanna gaacheena oottonke; borojjimmatenni fushshite haaro heeshsho oottonke.

9Borojje ikkinummoro nafa, ati kayinni borojje ikkine gantammora worte diaguroottonke. Faarisi mootoolla albaanni baxille oottonke. Minekki galagalchine minneemmo gedenna Yihudahonna Yerusaalamete keere hee'neemmo gede haaro heeshsho oottonke.

10«Xa kayinni, Maganonke ballo, hajajokki layinkemeeshsho hunnoommona, hige kunni ka'a mayineemmo?

11Hunnoommoti hajajokkino, borojjikki himanaano, ‹Ragidhinanni baatto battaabbinote; aanaho hee'rino manni qaccetenni qaccete geeshsha bunshenna batte wo'mitanno gede assinote.

12Kunni daafira, seenne'ne oosonsara uyitinoonte; seennensano ooso'nera adhitinoonte. Jawaatoota ikkate, baattote jiro itatenna ooso'nera geedote iqqa ragisiisate insa ledo mittu coyinnino fiixoontinoonte› yite kultinonkete.

13«Kuni baalu iillinonkehu bushu loosinkenninna bati'ra saonkenniiti. Maganonke, ati kayinni cubbinke deerrinni diqorichishoottonke; taraarenkeno digudootto.

14Kayinnilla, galagalle hajajokki hunne, tenne bunshe loosanno manni ledo mayira adhammummoro dianfoommo. Ninke taraare nafa gattukkinni goofo maltinonkereeti.

15Israeelete Magano Kaaliiqa ballo, ati halaalaancho yoo yaattoho; ikkollana kune techo geeshsha lubbotenni woroottonke. Saotenni hee'ne albakkiinni uurra didandiinanni; ninke kayinni kunni garinni hee'ne albikkira shinqoommo» yoommo.

← Chapter 8 Jump to: Chapter 10 →