John 16

Sidamo

← Chapter 15 Jump to: Chapter 17 →

1«Kuneeti, konne baala kuloommo'nehu amma'na'nenni gufidhinannikki gedeeti.

2Xaadu mininni fushshite huntanno'ne; shaanno'nehu baalu Maganoho soqqamannoha lawannositi yanna dagganno.

3Insa hatto assitanno'nehu Anna'ya woy ane egentinokki daafiraati.

4Balaxe konne ki'nera kuloommo'nehu yanna iillitanno woyite yoommo'nere qaagginaraati» yiinsa. Yesuusi lede, «Konne baala balaxe kuloommo'nekkihu ledo'ne noommo daafiraati.

5Xa kayinni soyinoehuwa ha'rammoraati; ikkollana ki'ne giddonni, ‹Hiikka ha'ratto?› yee xa'mannoehu dino.

6Konne baala kuloommo'nehura wodani'ne dadillino.

7Ani kayinni halaale kuleemmo'ne; ani ha'rummoro woyyanno'ne. Ha'ra hoogummoro Jawaachishaanchu ki'newa didaanno. Ani ha'rummoro kayinni iso ki'newa soyemmo'ne.

8Isi daanno yannara, alamete aana noo manni cubbire, keeraanchimmannirenna Maganu yoore mannaho xawise kulanno.

9Cubbunnire xawise kulannonsahu, ane ammantannokki daafiraati.

10Keeraanchimmannire xawise kulannohu, ani Anni'yawa ha'reemmohuraatinna kunni ka'ano affinanniekki daafiraati.

11Yoonnireno xawise kulannohu, tenne alame gashshaanchi aana yoo yinoonni daafiraati.

12«Kunni ka'ira kuleemmo'nehu lowo coyi nooe; ikkollana, xa adha didandiitinanni.

13Halaalu Ayyaani daanno woyite halaalu baalunniwa massaganno'ne. Isi macciishshinohalla coyi'ranno ikkinnina umisinni dicoyi'ranno. Qoleno kunni albira ikkanno coye kulanno'ne.

14Ani yeemmore haa're kulanno'ne daafira, ane ayirrisannoe.

15Anni'yaha ikkinohu baalu aneho, ‹Ani yeemmo'nere haa're kulanno'ne› yoommo'nehu kunni daafiraati» yii.

16Yesuusi, «Shiima yanna gedensaanni diaffinannie; qoltineno shiima yanna gedensaanni affinannie» yiinsa.

17Rosaanosi giddonni mitu mitu insa insanaawa, «‹Shiima yanna gedensaanni diaffinannie; qoltineno shiima yanna gedensaanni affinannie› yaannohunna, ‹Anni'yawa ha'reemmo› yaannohu mayiraati?» yitu.

18«‹Shiima yanna gedensaanni› yaasi mayaate? Mayi daafira coyi'ranni nooro dileellinonke» yitanni mimmitonsa xa'mitu.

19Yesuusino xa'mate heddinota afe, «Ki'ne mimmito'ne xa'mitinannihu, ‹Shiima yanna gedensaanni diaffinannie› qoltineno, ‹Shiima yanna gedensaanni affinannie› yoommo'nehuraatini?

20Halaale kuleemmo'nena, ki'ne wi'litinanni; raartinanni; tini gobba kayinni hagiidhitanno. Ikkirono dadilli'ne hagiirreho soorramanno.

21Ila rakkino meyati gamete barri iillinosehura yaaddanno. Iltuhu gedensaanni kayinni, tenne gobbara qaaqqu ilamino daafira hagiidhite qarrase habbanno.

22Ki'neno xa hatto dadillitinanni; ani kayinni galagale afeemmo'ne. Wodani'ne hagiidhanno; hagiirre'neno adhannohu dino.

23«Hakko barri iillanno woyite ane mittoreno dihuuccidhinannie. Halaale kuleemmo'nena, ane su'minni huuccidhinannire baala Anni'ya aanno'ne.

24Xaa geeshsha su'mi'yanni mittoreno dihuuccidhinoonni. Huuccidhe, adhitinannina; hagiirri'neno wo'ma ikkanno.

25«Konne coye maammaashshunni kuloommo'ne; kunni ka'a maammaashshunni coyi'reemmokki yanna dagganno. Ikkollana, Anni'yare xawise kuleemmo'ne.

26Hakko barri iilliro su'mi'yanni huuccidhinanni. Ani Anna'ya ki'ne su'minni huucceemmo yaa di"ikkino.

27Anni'ya umisi ki'ne baxanno'ne. Anni'ya baxino'nehu ane baxxinoonniehuranna Maganuwiinni dayommota ammantinoonnihuraati.

28Anni'yawiinni daye tenne gobba eoommo; galagale tenne gobba agure Anni'yawa ha'reemmo» yii.

29Rosaanosino, «Xa kuneeti maammaashsha agurte xawisse coyidhanni nootto.

30Ati baalankare egennoottotanna ayino xa'mo xa'mahera dandaannokkita xa anfoommo. Kunnira, Maganuwiinni dayottota ammanneemmo» yitusi.

31Yesuusino, «Xa amma'nitinanni?

32Mittu mittunkunni billaallitine ane calla'ya agurtinannie yanna dagganno. Kune iillitino. Ikkollana Anni'ya ledo'ya noo daafira callicho'ya di"ikkoommo.

33Konne coye kuloommo'nehu, anenni heedhine keere afidhinara yeeti. Tenne gobbara heedhini geeshsha qarru noo'ne. Ikkirono waajjitinoonte; ani tenne gobba qeeloommona» yiinsa.

← Chapter 15 Jump to: Chapter 17 →