Jonah 2

Sidamo

← Chapter 1 Jump to: Chapter 3 →

1Yoonaasi qulxu'michu godowi giddo hee're Kaaliiqa Maganosi,

2«Kaaliiqa'ya, qarrame hee're ate woshshi'roommo; atino yee yoottoe. Kaa'lo afi'rate yee, jeennaatu giddo raaroommo; atino raare'ya macciishshoottoe.

3Baaru giddo tugge, diimete woroonni sayisoottoe. Wayino egemminoe; wolqaataamu dambalikkino aana'yaanni hige sai.

4Ani atewiinni horo baoommohanna, Qullaawu Minikkirano galagale higeemmokkiha lawinoe.

5Wayi beeshshe amadinoe; baaruno gudise egemmie. Wayi giddo fultannoti, seeddaanna hayisso umoho xaaxantue.

6Ilaallate hundi geeshsha lixummo; hegere geeshsha cufante heedhanno baatto dirrummo. «Ati Kaaliiqi Magani'ya kayinni, ane diimete giddonni fushshite, lubbo'ya gatisoottoe.

7Lubbo'ya daaqqu yannara, ate Kaaliiqa'ya qaage huucci'roommo; atino Qullaawa Minekki heedhe macciishshoottoe.

8«Kaphu maganna hoode hadhannori baalu, ate hexxa agurtino.

9Ani kayinni galatu faarsonni, atera kakkalo shiqishi'reemmohe; xa'noommo xanono uyi'reemmohe. Gato ate Kaaliiqiwiinniiti» yee huucci'ri.

10Hakkunni gedensaanni Kaaliiqi qulxu'micho hajajeenna, Yoonaasi masse baaru qaccera tufisi.

← Chapter 1 Jump to: Chapter 3 →