Jude 1

Sidamo

Jump to:

1Yesuusi Kiristoosi soqqamaanchi, Yaiqoobi rodii ani Yihudi. Woshshinoonni'nerira, Maganu Annu baxino'nerira, Yesuusi Kiristoosi agarino'nerira baalaho:

2Maaro, keerunna baxillu hala'lo'ne.

3Jaalla'ya! Ledo gatore borreessammo'nera lowo geeshsha hasi'roommo; xa kayinni marro hingannikki garinni Maganu mannisira mitte hige uyino amma'nara jawaattine sharrantinanni gede seejjanni borreessammo'nera quuxaawoommo.

4Yoo yinanninsati lowo yannara albaanni borreessinoonniri mitu mitu ki'newa luuxxe e'ino. Insa Maganinke elto ragimalete ikkitora soorrite Iso magansi'ra gibbinoreeti; callichisi Biilonkenna Mootichanke ikkinohura Yesuusi Kiristoosirano badhe wodhitanno.

5Mootichu mannasi Gibitsete gobbanni asse fushshitanna gedensaanni ammana gibbinore huni gara affinoonniha ikkirono, qaagiissammo'nera hasi'roommo.

6Heedhanno darga calla ikkikkinni uyinoonninsa roorre agurtino sokkaasine, jawu yoote barri geeshsha hegere usurira tunsichu giddo wore agare no.

7Soddoomunna Gomooruno qooxeessinsara noo katamma ledo foorrennire ikkitino; foorretenni mannaho nookki akkimale ikkitino. Kunnira insa hegere giiranni qorichishantannorira lawishshaho.

8Kuni mannino haaqeensa hoode hadhanni manninatensa batteessitanno. Gashshaanono diayirrissanno; gordoho ayirrinye afidhinoreno xontanno.

9Sokkaasinete roorrichi Mikaaeeli nafa Muse reeshshi daafira Daawuloosi ledo coyi'rami yannara, «Maganu seejjohe» yiinota ikkinnina, xono afiisinni difultino.

10Kuri kayinni affinokkire nafa xontanno; ba'anno saada hedo afidhinokkite gede, ayyaani galtete heeshsho heedhanno.

11Qaayeeli doogo hadhinona, woxeho yite Beleaami so'ro giddo ubbinona, Qore gede qoxxissanno daafira ba'annona insara aanne'e!

12Kuri ledo'ne jilaho ofolturo, saalimale ikkitonsanni ittinanni sagale lageessitanno. Insa umonsa calla baxxannoreeti. Bubbe haadhe hadhannoha xeenu nookki gomicho labbanno. Gumu nookkireeti; lame higge reyitinoreeti; rumushshunkunni arro buqqinsoonni haqqe gedeereeti.

13Saalsiissanno ikkitonsaha hambaa karfa yitanni, hanqe dayinoha baaru dambala labbanno; hegere geeshsha beebbu tunsichi agare noonsa; ka'anna kawa raataabbanno beeddahe gedeereeti.

14Addaaminni kayise lamalki ilama ikkinohu Heenooki, «Kune Mootichu kumu kumi sokkaasine qullaawate ledo daanno.

15Hakkore Magano magansidhannokkire, assitino bunshenni qorichishannonsa; haxawarrootahonna cubbaataamma baalaho, assitanno bunshe baalatenna Maganu aana coyidhanno saora yoo yaannonsa» yee coyi'rino.

16Kuri, uminsata busha yorto ha'runsitanni, wo'manka woyite gunguntannoreetinna mittu coyira nafa hagiidhitannokkireeti; afiinsanni boo'nate qaali fulanno; uminsara injaannore hasidhanni wole manna bokkeessitanno.

17Ki'ne kayinni jaalla'ya! Mootichinke Yesuusi Kiristoosi soqqamaasine kunni albaanni coyidhino qaale qaagge.

18Insa, «Goofimarchu yannara uminsa yorto maganiweelote hoode heedhanno haariimaasine dagganno» yitino'ne.

19Insa manna babbaddannoreeti; maalu yorto hoode hadhannoreeti; Qullaawu Ayyaani noonsakki mannaati.

20Ki'ne kayinni jaalla'ya! Wo'munkurinni roorsitine qullaawa amma'no'nenni umo'ne keereensi'rate jawaatte; Qullaawu Ayyaaninni huuccidhe!

21Hegere heeshshowa iillishshannota Mootichinke Yesuusi Kiristoosi maaro agadhitinanni, Maganu baxilli giddo heedhe.

22Huluullote giddo noore mararrensa.

23Mito mito giirate giddonni fushshitine gatissensa! Mito mitono lagaabbinota uddanonsa kisi'ra gibbinanni heedhinenni, waajjillu ledo insa kayinni mararrensa.

24Ubbinannikki gede agara'nera, minshanniri nookkire asse hagiirrunni ayirrinyisi albaanni uurrisa'nera dandaannohura,

25callichisi Gatisaanchonke ikkino Maganira, Mootichinke Yesuusi Kiristoosi widoonni qole bi're hundinni kayise hegere hegerera ayirrinyunna jawimma, wolqanna roorre ikkitosi! Hamii'ni!

Jump to: