Malachi 1

Sidamo

Jump to: Chapter 2 →

1Kaaliiqi himanaanchu Milkiyaasi widoonni qole Israeelete mannira coyi'rino himani kunninni aane nooho:

2Kaaliiqi mannisira, «Ani ki'ne baxoommo'ne» yaanno. Mannu kayinni, «Baxattonketa mayinni leellishattonke?» yiino. Kaaliiqino, «Eesawunna Yaiqoobi roduuwaho; ani Yaiqoobi baxoommo

3Eesawu kayinni giwoommo. Eesawuta gaaraame gobba moola asse aguroommo. Hattenne gobba yeedaala findiriiqqannota assoommo» yii.

4Eesawu sircho ikkitinori Edoomootu, «Katammanke diigantino. Ikkirono galagalchine mi'nineemmo» yituro, Olantote Mootichi Kaaliiqi, «Insa mintanno. Ani kayinni diigeemmo. Wolu manni insa, ‹Busha gobbaati; Kaaliiqi hegere geeshsha hanqino gosaati› yaannonsa» yii.

5Israeelete mannino konne baala illensanni lae, «Kaaliiqi Israeelete gobbaanni nafa wolqaataamoho» yaanno.

6Olantote Mootichi Kaaliiqi qeesootaho, «Beettu anna, soqqamaanchuno mootichasi ayirrisanno. Ani anna'neeti; mayira diayirrissinannieyya? Ani Mooticha'neeti; mayira ayirrinye diuyitinannie? Ki'ne ane mishshinoonnie. Tenne affinanni heedhine, ‹Hiitto assine minshummohe?› yitinoonnie.

7Kakkallannie dargira battaabbino sagale kakkalote shiqishshinanni, ‹Ate ayirrisa hiitto hoongeemmo?› yitinanni. Anino, ‹Kakkalo'ya darga shotisatenniiti› yeemmo'ne.

8Ballitinota, dhiwatinotanna naaffino saada kakkalote shiqisha bunshe assitinoonniha dilabbanno'ne? Hattoo saada gashshaanchi'nera afansha assitine uyitinanniha ikkiro, hagiidhe adhanno'nehanna galatanno'neha lawanno'neni?» yii.

9Qoleno Olantote Mootichi Kaaliiqi, «Xa ki'ne qeesootu, eleemmo'ne gede ane Magano huuccidhe. Ki'newiinni hattoo afansha adhe huuccatto'ne macciishsheemmoha lawanno'neni?

10Kakkalo'ya darga haafu kakkalo shilqishshinantenni, ki'ne giddonni Qullaawa Mine cufannohu mayi mittu hee'ra! Ki'nenni hagiidheemmokki daafira anera shiqishshinanni fushshaate diadheemmo.

11Arrishsho fultannowiinni kayise e'annowi geeshsha su'mi'ya dagate mereero ayirradoho. Darga baalaho anera hixaana giirtannanna dancha kakkalo shiqishshanna mannu baalu ayirrisannoe.

12Ki'ne qeesootu kayinni, kakkalo'ya darga battaawinoha assitine kiiratenninna mishshinoonni sagale shiqisha'nenni ane shollishshinoonnie.

13Qoltineno, ‹Kuni mayi qarraati!› yitinanni ceeggifattinoonni. Kakkalo'ya darga mishshinoonni. Kakkalote moorroonnita, dhiwantinotanna naaffino saada abbitinanni. Hattoo kakkalo ani Olantote Mootichi Kaaliiqi anga'nenni adheemmoha lawanno'neni?

14Saadasi giddo dancha saada aate xa'ne kae, minshoonni saada shiqishannohu dogaanchu manchi rumaminoha ikko. Ani jawa mooteeti; Olantote Mootichaati; daga baalano su'ma'ya waajjitanno» yii.

Jump to: Chapter 2 →