Mark 8

Sidamo

← Chapter 7 Jump to: Chapter 9 →

1Hatte yannara wolu lowo manni daye gamba yii; itannore kayinni diafi'rino. Hakka woyite Yesuusi rosaanosi woshshe,

2«Kuni manni ane ledo sase barra keeshshino; ittanno sagaleno nookki daafira mararoommonsa.

3Ittukkinni ha'risummonsaro, doogo shaqqite ubbanno; insa giddonni mitu mitu xeertotenni dagginoreeti» yii.

4Rosaanosi kayinni, «Hatto ikkiro, tenne halallitte gobbara kageeshshi mannira ikkitanno sagale maminni abbinanni?» yitu.

5Yesuusi qole, «Meu timi noo'ne?» yiinsa. Insano, «Lamalu timi noonke» yitu.

6Yesuusi mannu uulla ofollanno gede hajaje, lamalanka tima haa're, galatu huuccatto assi. Timmano hiiqqaqqe, mannaho iillishshanno gede rosaanosira uyi; insano mannaho iillishshu.

7Rosaanosira boodu shiimmaaddu qulxu'mino noonsa; Yesuusino lede galatu huuccatto asse, mannaho iillishshanno gede rosaanosira kuli.

8Mannu sagale ite duuweenna, gatino giggilo gamba assine, lamala soro kayinsi.

9Itino manni shoolu kumi geeshsha ikkanno. Manna ha'rise kae,

10Yesuusi hakkawoyintenni rosaanosi ledo yowolote ofolle, Dalmanuuta yinanni gobba ha'ri.

11Farisootu Yesuusiwa dagge xa'mo shiqishshusi. Jiffe la'asira yite gordunni malaate leellishansara hasidhu.

12Yesuusi hakka woyite giddo qole ure, «Tini ilama mayira malaate hasidhanno? Halaale kuleemmo'nena, tenne ilamara horonta mitto malaateno dileellinshanninsa» yii.

13Hatto yee, insa agure galagale yowolote ofolle baara widoonni fule ha'ri.

14Rosaanosi sinqe adhitukkinni habbe hadhino daafira, yowolote giddo mittu timi callu noonsa.

15Yesuusi insara, «Farisootunna Heeroodisi gamaancho seekkitine qorophe!» yiinsa.

16Insa insanaawa, «Togo yaannonkehu anga sinqe adha hoongoommohuraati» yite hasaabbu.

17Yesuusi hedonsa afe, «‹Sinqe anga hoongoommohuraati› yitine mayira heddinanni? Xaa geeshsha mittorenni diaffinoonni; diinobuuxxinoonni? Wodani'ne xaano dillaawella no?

18Ille heedheenna'nenni dila'inanni? Macca heedheenna'nenni dimacciishshitinanni? Qulli diyaanno'ne?

19Onte tima ontu kumira hiiqqaqqe iillishummo woyite, me"e soro wo'ma kayissini?» Insa qolte, «Tonaa lame» yite qoltu.

20«Lamala tima shoolu kumi mannira iillishummo woyite, me"e soro wo'ma kayissini?» yee xa'minsa. Insa qolte, «Lamala» yite dawartu.

21«Xaano dibuuxxinoonni?» yiinsa.

22Beetesayida yinanni qacha iillituta, mannu mitto illiweelo mancho Yesuusiwa haa're abbi. Angano aanaho worannosi gede Yesuusa huucci.

23Hakka woyite Yesuusi illiweelo mancho anga amade, massage qachu gobbaanni fushshi. Illesira anja tufe, angasi aanaho wore, «Mitiri leellannoheri no?» yee xa'misi.

24Illiweeluno haxo gotti yee lae, «Mannu leellanni nooe; ikkollana ha'rantanni noo haqqe lawannoe» yii.

25Xaano Yesuusi angasi manchu ille aana wori. Manchuno ille hure, baalankare lae buuxi.

26Hakkunni gedensaanni Yesuusi, «Galagalte qacha martooti!» yee minisira ha'ranno gede kulisi.

27Yesuusi rosaanosi ledo, Filiphoosi Qiisaariyu Katami mule noo qacha dayi. Hadhanni heedheenna Yesuusi rosaanosi, «Mannu ane ayeti yaanno?» yee xa'minsa.

28Insa qolte, «Mitu, ‹Cuuaancho Yohaannisiiti› yaannohe; wolu kayinni, ‹Eeliyaasiiti› yaannohe; wolu qole, ‹Himanaanote giddonni mittichoho› yaannohe» yite dawartu.

29«Ki'ne ayeti yitinannieyya?» yee xa'minsa. Pheexiroosi qole, «Ati Kiristoosiiti» yiisi.

30Yesuusi hakka woyite mannaho kultannokki gede hajajinsa.

31Yesuusi rosaanosira, «Manchi Beetti qarra baala adhanna geerru, qeesootu roorrootinna Seeru rosiisaano alba mishama hasiissinosi. Hakkunni gedensaanni insa shitannosi; ikkollana sayikki barra ka"anno» yee rosiisinsa.

32Konne coye xawise coyi'ri. Pheexiroosi kayinni Yesuusa bade qacce fushshe hayi yaasira wo'naali.

33Yesuusi kayinni caaqqi yee rosaanosi lae, «Pheexiroosi, ati Sheexaanu albi'yanni ho'li! Ati mannunnita ikkinnina Maganunnita dihedatto» yee rufisi.

34Hakkunni gedensaanni Yesuusi lowo manni ledo rosaanosi woshshe, «Hoode'ya ha'ra hasi'rannohu, umisire agure, masiqalasi duqqe hoode'ya dayo!

35Lubbosi gatisi'ra hasi'rannohu baalu hu'nanno; lubbosi aneranna Danchu Duduwira yee hunannohu baalu kayinni gatisi'ranno.

36Manchu gobba baalate jiro afi're lubbosi hu'niro, ma lexxanno?

37Woy kayinni lubbosi gatisi'rate maricho aanno?

38Tenne fooranna cubbaataame ilama giddo, anenna qaale'ya fokkannoha baala, Manchi Beetti annisi ayirrinyinni qullaawa sokkaasine ledo daanno waro fokkannosi» yiinsa.

← Chapter 7 Jump to: Chapter 9 →