Micah 3

Sidamo

← Chapter 2 Jump to: Chapter 4 →

1Ki'ne Israeelete gashshaano, konne coye macciishshe! Halaalaancho yoo afa dihasiissanno'ne?

2Ki'ne kayinni dancha coye gibbine busha coye baxxinoonni. Manna'ya uurro gogansa dultine maalansa miqichinsawiinni baddinoonni.

3Manni'ya goga dultine maalansa murtine ittinoonni. Miqqansano hiiqqaqqitine midaanote ganfanni maali gede murmurtinoonni.

4Ki'neno qarrantine Kaaliiqiwa higgine raartinanni yanna dagganno. Isi kayinni didawaranno'ne. Busha looso loossinoonni daafira huuccatto'ne dimacciishshanno.

5Kaphu himanaano hasidhinore afidhannoha ikkiro, «Keeru dirranno'ne» yitanni dudubbanno. Hasidhinore afi'ra hoogganno woyite kayinni, «Dartu danno'ne» yitanni manna so'risiissanno. Kaaliiqi hatto assitanno himanaano,

6«Barru hashsha ikkanno'ne; arrishsho e'eenna daanno tunsichi amadanno'ne. Manna'ya so'risiissinoonni daafira, xaate kunni ka'a ajuuja dileeltanno'ne; himanano dicoyidhinanni» yiinsa.

7Ajuuja la'annorinna himana coyidhanno kaphaasine baala qinaannonsakki daafira irraabbanno. Maganuno dawaro qolannonsakki daafira waajjite anga umoho wodhite hadhanno.

8Anera kayinni Kaaliiqi Ayyaanasinna wolqasi wonshinoe. Israeelete gosahu saonsanna cubbinsa mageeshshihoro egensiiseemmo gede halaalu yoo yaammora wolqanna jawaante uyinoe.

9Ki'ne halaalaanchimma gibbinanniri, halaale kaphoho soorritinanniri Israeelete gashshaano konne coye macciishshe.

10Ki'ne Maganu katama Yerusaalame mundeetenninna bunshetenni mintinanni.

11Katamu mootoollano yoo uyitannohu gubbo itteeti; qeesootinsa jajja uyinikkinni dirosiissanno; himanaanonsano woxiweello himana dicoyidhanno. Kuni duuchu ikke hee'reenna, «Kaaliiqi ninke ledo noo daafira mittu qarrino di"iillannonke» yitanni Kaaliiqa hexxitanno.

12Kunnira, ki'nenni kainohunni Yerusaalamete Katami loosi'nanni darga ikke gatanno. Diigame duuno ikkanno. Qullaawu Mini minamino ilaalino dubbo ikkanno.

← Chapter 2 Jump to: Chapter 4 →