Ruth 3

Sidamo

← Chapter 2 Jump to: Chapter 4 →

1Hakkunni gedensaanni ballose Naoomi Ruuti, «Beetto'ya, mine assidhe galte afi'ratta gede ayiddaanna hasummahero woyyannoha lawinoe.

2Duugge xinqidhanna ledokki noo seenni soqqamannosihu Boeezi, ninkera gamba yiino fiixa ikkinota kunni albaanni kuloommahe. Kuneeti, isi techo hawarro hayixe ga'nanno.

3Kunnira bisokki hayishshidhe, shitto buudhi; maareekote uddanokkino uddi'ri. Hakkunni gedensaanni hayixe ga'nanno ayiddummewa mari. Kayinnilla hashshi hurbaati shiqeenna itenna age ka"a geeshsha hakkiicho noottata afoonkehe.

4Goxannowa buuxittahu gedensaanni goxano amaddannosi woyite, isiwa gamba yite lekkaallosiinni uddano fa'nite goxi. Ma"assinanniro isinni kulannohena» yituse.

5Ruutino, «Maahoyye, yoottare baala asseemma» yitu.

6Kunnira, Ruuti ayiddummenniwa marte ballose kultusente gede assitu.

7Boeezi itinna agihu gedensaanni hisanyootunni hee're, hayixu ataacha mule mare goxi. Ruutino sununni isiwa gamba yite, uddano fante lekkaallosiinni goxxu.

8Hashshu taalootira Boeezi hedeweelcho baqqi yee midaado higanno woyite, mitte mancho lekkasi mule goxxe noota afe,

9«Ati ayeti?» yee xa'mise. Iseno, «Mooticha'ya, ani Ruutiiti. Ati gamba yoottoe fiixa ikkoottoehuranna raggete aanoottoeha ikkootto daafira uddanokki diwie» yitusi.

10Boeezino, «Beetto'ya, Kaaliiqi maassi'rohe! Xaa geeshsha dureessu woy buxichu qeedhichira assi'ra agurte, kune albinni roore ayiddimmate halaale wonshootta.

11Ruuti, ati xaate mittore qarrantooti; katamaho noo manni baalu danchummakki afino daafira xa'mi'rittare baala wonsheemmohe.

12Ani gamba yoommohe fiixa ikka'ya halaaleho; ate towatano hasiissannoe. Ikkollana, anenni roore gamba yaannohu wolu fiixi no.

13Sooda geeshsha agari; soodanno woyite hakku manchi raggete maahoyye yaannoronna hoogannoro xa'me afeemmona. Isi ragi'rannoheha ikkiro danchaho; giwannoha ikkiro kayinni, ani ragi'reemmohe gede Heeshshote Kaaliiqi su'minni xaareemmo. Xa kayinni sooda geeshsha goxi» yiise.

14Ruutino sooda geeshsha Boeezi lekkaallo goxxu. Boeezi kayinni ise ledosi noota anfara hasi'rinokkihura mannu goxinowiinni kaikkinni gutte ka'u.

15Boeezino, «Uddanokki qo'li!» yiise. Iseno uddanose qo'liteenna 20 kiilo ikkanno hayixe ee bayisiisise. Iseno Hayixe bayidhe katama higgu.

16Minira iillituta ballose, «Beetto'ya, maaho hiittooti?» yite xa'mituse. Ruutino, Boeezi assinosere baala kultuse.

17Qolteno, «Atewa mulla anganni higeemmakki gede konne baala hayixe uyinoe» yituse.

18Naoomino, «Beetto'ya, xa kuni coyi mare fulannowa afatta geeshsha cincatenni agari. Boeezi techo konne coye darga iillishikkinni diaguranno» yituse.

← Chapter 2 Jump to: Chapter 4 →