3 John 1

Shona SUB 2002 Bible

Jump to:

1Mukuru kuna Gayo, mudikani, wandinoda nechokwadi.

2Mudikani, ndinokunyengetera kuti ufare pazvinhu zvose, uye uve mukukutu, sokufara kwomweya wako.

3Nokuti ndakafara zvikuru hama dzichisvika dzichikupupurira chokwadi chako, dzichiti, unofamba muchokwadi.

4Handina mufaro unopfuura uyu, wokuti ndinzwe kuti vana vangu vanofamba muchokwadi.

5Mudikanwi, unobata basa rakatendeka pazvinhu zvose zvaunoitira hama navaeniwo;

6vakapupurira rudo rwako pamberi pechechi; uchaita zvakanaka kana uchivaperekedza nomutoo wakafanira Mwari.

7Nokuti vakabuda nokuda kweZita rake, vasingatori chinhu kuvahedheni.

8Naizvozvo isu tinofanira kugamuchira zvakanaka vakadaro, kuti tibatsirane pachokwadi.

9Ndakanyorera Chechi; asi Dhiotirefe, anoda kuva mukuru pakati pavo, anotiramba isu.

10Naizvozvo, kana ndichiuya, ndichayeudza mabasa ake aanoita, kuti anotiitira makuhwa namashoko akaipa; uye, haatendi naizvozvo bedzi, iye amene haagamuchiri hama, uye vakanga vachida havo anovadzivisa nokuvadzinga muchechi.

11Mudikani usatevera chakaipa, asi chakanaka. Uyo, anoita zvakanaka, ndowaMwari; anoita zvakaipa, haana kuona Mwari.

12Dhemetirio anopupurirwa navanhu vose, uye nechokwadi chaicho; nesu tinopupurawo, newe unoziva kuti kupupura kwedu ndokwechokwadi.

13Ndakanga ndine zvizhinji zvandaida kukunyorera, asi handidi kukunyorera neingi nepeni;

14asi ndinotarira kuti ndichakurumidza kukuona, tigotaurirana nomuromo.

15Rugare ngaruve newe. Hama dzinokukwazisa. Ndikwazisire hama, mumwe nomumwe nezita rake.

Jump to: