Philemon 1

Shona SUB 2002 Bible

Jump to:

1Pauro, musungwa waKristu Jesu, naTimoti, hama yedu, kuna Firimoni, mudikanwi wedu noanobata nesu,

2nokunaAfia, hanzvadzi yedu, nokunaAkipo, murwi pamwechete nesu, nokuchechi iri mumba mako.

3Nyasha ngadzive nemi, norugare zvinobva kuna Mwari, Baba vedu, naShe Jesu Kristu.

4Ndinovonga Mwari wangu nguva dzose, kana ndichikurangarira pakunyengetera kwangu,

5zvandinonzwa zvorudo rwako nokutenda kwaunako kunaShe Jesu nokuvatsvene vose;

6kuti kugovana kwokutenda kwako kuve nesimba, kuti zvakanaka zvose zviri mukati medu kuna Kristu zvizikanwe;

7nokuti ndakanga ndinomufaro mukuru nokunyaradzwa nokuda kworudo rwako, nokuti mwoyo yavatsvene yakazorodzwa newe, hama yangu.

8Naizvozvo, kunyangwe ndisingatongotyi muna Kristu kukurayira kuita zvakafanira,

9kunyangwe zvakadaro, nokuda kworudo ndinoita zvokukumbira zvikuru, zvandakadai hangu, ini Pauro, mutana, uye zvino musungwa waKristu Jesu.

10Ndinokumbira zvikuru kwauri pamusoro pomwana wangu, wandakabereka pakusungwa kwangu, Onesimo,

11akanga asingakubatsiri kare, asi zvino anobatsira zvikuru, iwe neni;

12ndinomudzosera kwauri, iye amene, mwoyo wangu chaiwo;

13ndaida kuti agare neni, kuti panzvimbo yako andishumire pakusungwa kwangu nokuda kweVhangeri;

14asi ndakanga ndisingadi kuita chinhu, iwe usati watenda, kuti zvakanaka zvaungaita zvirege kuitwa nokurovererwa, asi nokuda kwako.

15Nokuti zvimwe wakaparadzaniswa newe chinguva nemhaka iyi, kuti ugozova naye nokusingaperi;

16arege kuzova muranda, asi munhu anopfuura muranda, ave hama inodikanwa, panyama nomuna Ishe, zvikuru kwandiri, asi zvikuru kwazvo kwauri.

17Zvino kana uchiti ndiri mugovani newe, umugamuchire sezvaungandigamuchira ini.

18Asi kana akakuitira chinhu chisakarurama, kunyangwe ane ngava newe, undiravireni izvozvo.

19Ini Pauro, ndinozvinyora noruoko rwangu, ndicharipa; ndisingarevi hangu kuti pamusoro pezvose une ngava kwandiri, ndiyewe umene.

20Hongu, hama, ngandive nomufaro kwauri muna Ishe; uzorodze mwoyo wangu muna Kristu.

21Ndinokunyorera, nokuti ndinotenda kuteerera kwako, ndichiziva kuti uchaitawo kupfuura pandinoreva napo.

22Asi ndigadzirirewo pokugara, nokuti ndinotarira kuti muchandipiwa ini nokuda kwokunyengetera kwenyu.

23Epafirasi, musungwa pamwechete neni muna Kristu, anokukwazisa.

24NaMako, naArisitakusi, naDhemasi, naRuka, vanobata basa pamwechete neni.

25Nyasha dzaShe Jesu Kristu ngadzive nomweya wenyu.

Jump to:

Recommended Reading

Commentary Philemon Commentaries → Devotional Philemon Devotional Guide → Get This Bible Shona SUB Bible Study Bible →