Exodus 8

Songe

← Chapter 7 Jump to: Chapter 9 →

1Rîu MWATHANI areera Musa atîrî, “Îta kîrî Farao ûmwîre atîrî, ‘MWATHANI ariuga ûjû; Rekeeria antû baakwa beete bagantumîkîre.

2Îndî warega kûbarekeeria beeta, ngatûma biûra bikanûkie nthîgûrû yaaku yonthe.

3Rûûjî rwa Naili rûkoojûra biûra. Biûra bikeeja mwanka nyomba yaaku ndeene, na bikûrûke kûrîa ûmamaga na biitie gîtandeene gîaaku. Ningî bigakûrûka nyomba cia nthûûmba ciaaku, na cia antû baaku. Bigatonya intoone birîa bûrugaga nabio na mpakûriine irîa bûkandagîra mîgaate.

4Biûra bigaitania na mwîrî jwaaku, na biitie kîrî antû baaku, na nthûûmba ciaaku.’”

5MWATHANI areera Musa atîrî, “Îîra Aaroni ûjû, ‘Taambûrûkia njara yaaku ûgwete rûturo îgûrû rîa ndûûjî, na îgûrû rîa tûrûûjî, na îgûrû rîa tûria, ûtûme biûra biîje nthîgûrûûne ya Misri.’”

6Tontû bûû, Aaroni aratambûrûkia njara îgûrû rîa ndûûjî cia Misri, nabio biûra birauma ku biroojûra nthîgûrû ya Misri.

7Îndî kinya aringi-biama nî baathithîrie o ta ûu bagîtumagîra inya yaao ya witho baratûma biûra biîja nthîgûrûûne ya Misri.

8Rîu Farao areeta Musa na Aaroni arabeera, “Rombeni MWATHANI arite biûra bibi kîrî ni na kuuma kîrî antû baakwa; naani nkarekeeria antû beete bakaritîre MWATHANI kîgongwana.”

9Musa nawe aracokeria Farao atîrî, “Nîu, ngûkwaa kaanya, uga rîrîa ûkwenda ndoomba nîûntû bwaaku, na bwa nthûûmba ciaaku, na bwa antû baaku, nîkenda biûra bikaathirua kuuma kîrî gwe na kuuma nyomba ciaaku, bitigare akî rûûjîîne rwa Naili.”

10Farao arauga, “Nî rûûjû.” Musa nawe aramwîra, “Ka gûkare ûu wauga, nîkenda ûmenya atî gûtî ûngî ûkari ta MWATHANI Mûrungu weetû.

11Biûra bigeeta biume kîrî gwe na biume nyomba ciaaku, na biume kîrî nthûûmba ciaaku, na kîrî antû baaku, bitigare akî rûûjîîne rwa Naili.”

12Rîu Musa na Aaroni barauma kîrî Farao bareeta. Musa arakaîra MWATHANI arite biûra, o ta ûrîa baarî bagwîtîkanîîria na Farao.

13MWATHANI aracokia îromba rwa Musa. Biûra bionthe birîa biaarî nyomba na birîa biaarî biaragoone na birîa biaarî bieniine birakua.

14Nabo barabiûthûrania ithûmba ithûmba, na kîrumba kîroojûra nthîgûrûûne.

15Îndî rîrîa Farao oonere mantû jaabua, aroomia nkoro yaawe na ararega kûbathikîîra, o ta ûrîa MWATHANI augîîte.

16Rîu MWATHANI nî eerîre Musa atîrî, “Îîra Aaroni ûjû, ‘Tambûrûkia rûturo rwaaku ûringe tîîri ya nthî nîkenda yaa rwagî kunthe nthîgûrûûne ya Misri.’”

17Nabo barathithia ûu; Aaroni aratambûrûkia njara na araringa tîîri na rûturo rwaawe. Tîîri îraa rwagî kûnthe nthîgûrûûne ya Misri na rûroombanîra kîrî antû na nyomoo.

18Aringi-biama barageria kûreeta rwagî na njîra ya inya yaao ya witho îndî bararemwa. Tontû bûû, nî kwagîîre rwagî kîrî antû na nyomoo.

19Aringi-biama bau bareera Farao atîrî, “Jaja jaumîte kîrî Mûrungu.” Îndî Farao areeta na mbere kûûmia nkoro na ararega kûbathikîîra o ta ûrîa MWATHANI aaugîîte.

20Rîu MWATHANI areera Musa, “Rooka gûûkîîra rûkîîrî weteere Farao akiumagara eetîte rûûjîîne ûmwîre MWATHANI ariuga ûjû, ‘Rekeeria antû baakwa beete bagantumîkîre.

21Waarega kûrekeeria antû baakwa beeta, ngatûma mîrumbî ya ngii kîrî gwe, na kîrî nthûûmba ciaaku na kîrî antû baaku, na ndeene ya nyomba ciaaku. Nyomba cia Amisri ikoojûra mîrumbî ya ngii na kinya nthîgûrû kûrîa batûûraga.

22Îndî ntukû îîu nkaathûra nthîgûrû ya Gosheni kûrîa antû baakwa batwîre, kwîthîrwe gûtî na mîrumbî ya ngii, nîkenda ûmenya atî ni nî ni MWATHANI nthîgûrûûne yonthe.

23Nkaathûrana antû baakwa na antû baaku. Gûgîkinya rûûjû ûntû bûu bûkeethîrwa bûgûkarîka.’”

24MWATHANI arathithia mantû jau o ta ûrîa aaugîîte; mîrumbî imingî ya ngii îroojûra nyomba ya Farao na nyomba cia nthûûmba ciaawe. Nthîgûrû ya Misri yonthe îrathûûkua nî ngii.

25Rîu nîrîo Farao eetîre Musa na Aaroni arabeera, “Îteeni bûkaritîre Mûrungu weenu kîgongwana bûrî o nthîgûrûûne îîjî.”

26Îndî Musa aramûcokeria, “Gûtîthîrwa kwagîrîte kûthithia ûu. Nîkwîthîrwa tui tûkaaritîra MWATHANI Mûrungu weetû kîgongwana kîa into birîa Amisri boonaga birî mûgiro. Tûkëeeja kûrita igongwana bia into birîa Amisri boonaga birî mûgiro bakionaga rî, bagatûûra na maiga?

27No mwanka twîte rûgendo rwa ntukû ithatû rwanda tûkaritîre MWATHANI Mûrungu weetû kîgongwana o ta ûrîa agaatwaatha.”

28Tontû bûû, Farao arauga, “Nkaabûrekeeria bwîte bûkaritîre MWATHANI Mûrungu weenu kîgongwana bûûrîîne; bunka akî bûgeeta kûraaja mono. Ndombereni.”

29Nawe Musa arauga, “Ka mbîte mpuume akuî naagwe na nkaaromba MWATHANI nîkenda rûûjû mîrumbî ya ngii îkwebera na yeebera nthûûmba ciaaku na antû baaku. Nkathithia ûu këethîra ûtîîta na mbere gûmpaîria kana ûrega kûrekeeria antû beeta kûritîra MWATHANI kîgongwana.”

30Rîu Musa araumagara kwa Farao na araromba MWATHANI.

31MWATHANI arathithia jarîa Musa aamûrombeete: ararita mîrumbî ya ngii kuuma kîrî Farao, na kîrî nthûûmba ciaawe, na antû baawe. Gûtî ngii noo îmwe yaatigarîre.

32Îndî Farao aroomia nkoro kinya îgiita rîu, na aararega kûrekeeria antû beeta.

← Chapter 7 Jump to: Chapter 9 →