John 19

Songe

← Chapter 18 Jump to: Chapter 20 →

1Rîu Pilatû ararita Waatho atî Jesû ajûkue na aûûrwe ibooko.

2Asikarî baratuma thirû ya miigua na baramwîkîra kîongo. Rîu baramwîkîra rwambambio rwa rangî ya mûkû.

3Rîu bareeta kîrî we na baramûringa mpîî bakîmwîraga, “Ûrotûûra matukû jamaingî, gwe Mûnene wa Ayahudi!”

4Pilatû araumagara kaîrî na arabeera, “Raithîrieni, ka mbuumagarîrîtie we nîkenda bûmenya atî ni ntîkwona ûntû bwa kûmûgambithîria.”

5Rîu Jesû araumagara eekîrîte thirû ya miigua na rwambambio rwa rangî ya mûkû. Pilatû arabeera, “Raithîrieni! Muntû tîwe ûûjû.”

6Rîrîa athînjîri-Mûrungu barîa anene na akaria baamwonere bararinga gîtuma gîkiingî barauga, “Mwambithie, Mwambithie!” Pilatû arabeera, “Mûjûkieeni bwingwa bûmwambe, nîûntû ni ntîkwona ûntû bwa kûmûgambithîria.”

7Ayahudi baramûcokeria, “Tuî tûrî na Waatho, na kûringana na Waatho bûu no mwanka akue, nîûntû nî acieethetie Mûtaana wa Mûrungu.”

8Rîrîa Pilatû aaigîrue nteto iu nî aaigîrue ûguaa mono.

9Rîu arakûrûkia Jesû Praetoria kaîrî na aramûûria, “Nîkû uumîte?” Îndî Jesû ataamûcokeria noo atîa.

10Tontû bûû, Pilatû araamûûria, “Ka ûtîkwenda kwaria naani? Ka ûtîkûmenya atî ndî na inya ya gûkwambithia kana gûkûrekeeria?”

11Jesû aramûcokeria, “Gûtî inya ûrîngîîthîrwa ûrî nayo ya kûnthithîria noo atîa, këethîra ûtaanenkeerwe yo kuuma îgûrû. Tontû bûû, muntû ûrîa ûnenkanîre kîrî gwe, arî na meeyia jamanene nkûrûki.”

12Pilatû akwîrwa ûu araambîrîria gûcwaa ûrîa oomba kûmûrekeeria, îndî Ayahudi bararinga gîtuma bakiugaga, “Ûkëeja kûrekeeria muntû ûûjû, ûtî mûcoore wa Kaisarî, nîkwîthîrwa muntû ûrîa ûcieethagia mûnene, nî mûnthû wa Kaisarî!”

13Rîrîa Pilatû aaigîrue nteto iu, nî aaumagarîrie Jesû na arakarîra gîtî kîa îgamba antû eetagwa “Kajîra ka maiga,” kana “Gabatha” na Kîhibirania.

14Îgiita rîu kwaarî ta thaa thita cia mûthenya, ntukû ya kwithuranîra nîûntû bwa thigûûnkû ya Pasaka. Pilatû nî eerîre Ayahudi atîrî, “Raithîrieni Mûnene weenu!”

15Nabo bararinga gîtuma bakiugaga, “Nî ooragwe, nî ooragwe! Mwambithie!” Pilatû arabooria, “Ka bûkwenda mpambithia Mûnene weenu?” Athînjîri-Mûrungu barîa anene barauga, “Tuî tûtî na mûnene ûngî tiga Kaisarî.”

16Tontû bûû, Pilatû aranenkanîra Jesû kîrî bo nîkenda beeta kûmwamba.

17Rîu baratindîka Jesû na araumagara akamatîte mûtharaba jwaawe eetîte antû eetagwa “Gûntû kwa mûrûitû jwa kîongo,” na Kîhibirania nî “Goligotha.”

18Au nîo bamwambîre, na ningî baraamba antû bangî baîrî amwe nawe; ûmwe rûteere rwa ûrîo na ûngî rûteere rwa ûmotho, nawe Jesû arî gatîgatî kaao.

19Pilatû nî aandîkîre kabaaû na karaangîrwa îgûrû mûtharabeene jwa Jesû, nako kaandîki ûûjû, “Jesû wa Nazarethi, Mûnene wa Ayahudi.”

20Ayahudi babaingî nî bathomaga kabaaû kaû nîûntû au Jesû aambîrwe kwaarî akuî na ntûûra. Kabaaû kaû kaandîki na Kîhibirania na Kîlatini na Kîgriiki.

21Athînjîri-Mûrungu barîa anene bareera Pilatû, “Ûkándîka, ‘Mûnene wa Ayahudi,’ îndî aandîka, ‘Muntû ûûjû aaraugaga, ûûni ndî mûnene wa Ayahudi.’”

22Pilatû aracokia, “Ûrîa mpaandîkîre, nî mpaandîkîre.”

23Asikarî bakûthiria kwamba Jesû barajûkia nguû ciaawe na baraigaania tûthûûmba tûna nîkenda o mûsikarî ajûkia kathûmba kamwe. Ningî barajûkia kinya rwambambio rwaawe. Rwambambio rûu rûtaarî na rûtumo, rwatûmi na ngoora îmwe.

24Tontû bûû, asikarî bareerana, “Tûkárûtambûranga îndî tûrûringîreni kuura nîkenda twona nûû ûgeeta naru.” Ûntû bûu bwathithîkîre nîkenda Maandîko joojûra jarîa jaugaga, “Nî baaganîre nguû ciaakwa, na bararingîra rwambambio rwaakwa kuura.”

25Ûu nîu asikarî bau baathithîrie. Ng'ina wa Jesû na mwarî wa ng'ina wa ng'ina wa Jesû, Maria mwekûrû wa Kileopa na Maria Magidalina nî baarûngi akuî na mûtharaba jwa Jesû.

26Rîrîa Jesû oonere ng'ina, na aroona mûritwa ûrîa eendeete arûngi akuî nawe, nî eerîre ng'ina, “Mwekûrû, raithîîria mûtaana waaku!”

27Aracoka areera mûritwa ûu, “Raithîîria, ûûjû nîwe nyakwe.” Kuuma kagiita kau mûritwa ûu arajûkia ng'ina wa Jesû aramwikia kwaawe.

28Nyuma ya jau, Jesû akûmenya atî mantû jonthe jaakûthira na nîkenda Maandîko joojûra arauga, “Ndî na nyoonta.”

29Antû au nî kwaarî na mpakûri yoojûri ndibei îrî na nchechû. Tontû bûû, baratombeka kînyaguthi ndibeiine îîu na barakîmuntîîra kîrî kamûti ka mûkuû na baramûrîkîîra mûromoone.

30Rîrîa Jesû aacemere ndibei îîu arauga, “Mantû jonthe jakûthira.” Rîu areenîka kîongo bwa nthî na arakua.

31Kwaarî Jumaa, ntukû ya kwithuranîra nîûntû bwa sabatû. Tontû bûû, nîkenda mîîrî îtîgakare mûtharabeene ntukû ya sabatû nîkwîthîrwa ntukû îîu yaarî înene, Ayahudi nî baarombere Pilatû rûûtha nîkenda magûrû ja antû bau baambîtwe jaunangwa na mîîrî îcuurûkua kuuma mûtharabeene.

32Rîu asikarî bareeta na baraunanga magûrû ja antû barîa baambanîrîtue na Jesû.

33Îndî rîrîa baakinyîre kîrî Jesû nî boonere atî nî aarî agûkua. Tontû bûû batamuunangîre magûrû.

34Îndî mûsikarî ûmwe nî aamûmuntîre rwaru na îtumo na oorîo araûma tharike na rûûjî.

35Muntû ûrîa woonere ûntû bûu nîwe waaritîre ûkûûjî nîkenda bwîtîkia. Ningî nî aijî ûkûûjî bwaawe nî bwa mma na aaragia ûûma.

36Ûntû bûu bwathithîkîre nîkenda Maandîko joojûra jarîa jaugîîte, “Gûtî mwîndîndî jwaawe jûkaunwa.”

37Kaîrî Maandîko jangî nî jakuuga, “Antû bakaaraithîîria ûrîa baamuntîre.”

38Nyuma ya mantû jau, Josefu ûrîa waarî wa kuuma ntûûra ya Arimathea, nî aarombere Pilatû rûûtha rwa kûjûkia mwîrî jwa Jesû. Josefu aarî mûthingati wa Jesû na witho nîûntû nî aakîraga atongeeria ba Ayahudi. Pilatû nî aamwere rûûtha na Josefu areeta arajûkia mwîrî jwa Jesû.

39Ningî Nikodemu ûrîa waarî agwîta kîrî Jesû ûtukû, areeta na munganio jwa maguta ja manemane na udi. Munganio jûu jwaarî jwa ûrito bwa ta kilo mîrongo îthatû.

40Rîu barajûkia mwîrî jwa Jesû na barajwaka maguta na marashi na barajwoga na chuka injerû cia bamba kûringana na wîthîre bwa Ayahudi bwa kûthikana.

41Arîa Jesû aambîrwe nî kwaarî na kamuunda, na kamuundeene kau nî kwaarî na kaburi gataarî gagwîkwa muntû ûngî.

42Tontû kwaarî ntukû ya Ayahudi ya kwithuranîra nîûntû bwa sabatû, na nîûntû kaburi nî kaarî akuî nî beekîre Jesû kaburiine kau.

← Chapter 18 Jump to: Chapter 20 →