1 Thessalonians 2

Sotho 1951 (BIBELE)

← Chapter 1 Jump to: Chapter 3 →

1Gobane lena bana bešo, le tseba ka noši ge mola re tsena go lena e sa ka ya ba go tlela lefela.

2Le ge re sa tšo hlokofatšwa le go gobatšwa kua Filipi, ka mo le tsebago, re be re na le mafolofolo ka Modimo wa rena, ra le botša Ebangedi ya Modimo re le bothateng bjo bogolo.

3Gobane thuto ya rena ga se ya go fora batho, ga e na maanomabe, ga e na bomenetša.

4Rena re bolela re le ba Modimo a ba hweditšego re botegetše Ebangedi, re se ba go re re kgahla batho, re rata go kgahla Modimo molekodi wa dipelo tša rena.

5Gobane ga re ešo ra ba ra bolela re latswa ka leleme, le lena le a tseba; Modimo ke hlatse ya ge re se na maano a go apeša megabaru.

6Le gona ga re nyake go godišwa ke batho ba e kago ba bolena le ge e le ba bangwe, le ge bogolo bja ge re le Baapostola bo re loketše.

7Se re bego re na naso re le makgatheng a lena ke bonolo bja mma go bana ge a amuša ngwana wa gagwe.

8Ka tlhologelo e kaakaa re be re re re le nee tšohle, e sego Ebangedi yeo ya Modimo fela, re be re re re le nee le bophelo bja rena; gobane le le baratiwa ba rena.

9Bana bešo, le sa tseba ka mo re itapišitšego re imelwa ke mediro, ka mo re bego re dira bošego le mosegare, e le go re re se imele motho wa lena, ge re le ruta Ebangedi ya Modimo.

10Dihlatse ke bolena, le Modimo ke hlatse, ya ge lena badumedi re le dirile ka mokgwa o mokgethwa wa toko, wo o sa solegego.

11Le tseba le gore re be re etša tatagobana ge a eletša bana ba gagwe.

12Ra le eletša, ra le tsoša, ra le kgothatša, gore le tšee ka tsela ye e loketšego Modimo e a re biletšago mmušong wa gagwe le letagong.

13Gomme ke ka baka leo re sa kgaotšego go leboga Modimo, ka ge mola le tlelwa ke lentšu le le bego le bolelwa ke rena, le sa ka la le amogela boka lentšu la batho, la le amogela e le la Modimo, la therešo, ya tla ya ba lona le le dirago mo go lena.

14Gobane lena Bana bešo, le tšere ka mohlala wa diphuthego tšela tša nageng ya Juda, e lego tša Modimo ka Kriste Jesu; gobane le lena le hlokofaditšwe ke ba setšhaba sa geno ka mokgwa wo bala ba hlokofaditšwego ka wona ke Bajuda.

15Ke bona ba ba bolailego yena Morena Jesu le Baporofeta ba bona. Ga ba kgahle Modimo; ba lwa le batho bohle.

16Ba gana ge re bolela le bantle ge re re ba phološwe; gomme e ba gona go tlatša dibe tša bona mo gohle; fela, bogale bja Modimo bo šetše bo ba tlela go iša pheletšong.

17Gomme rena, bana bešo, e sa le mola re le tlogela re se hlwe re bonana ka mahlo, ka pelong gona re se kgaogane, re phegeletše ka kudu go tla go bonana le lena ka difahlogo re hlologetšwe gagolo.

18Re ratile go tla go lena; mme nna Paulo ke lekile gabedi; fela, Sathane a re thibela.

19Gobane kholofelo ya rena, le lethabo la rena, le mphapahlogo wo re kago kgantšha wona, e ka ba mang ge e se lena, le lena le ba re tlogo kgantšha bona pele ga Morena mohla a boago.

20Ke lena le lego letago la rena le lethabo la rena.

← Chapter 1 Jump to: Chapter 3 →