2 Peter 2

Sotho 1951 (BIBELE)

← Chapter 1 Jump to: Chapter 3 →

1Baporofeta ba maaka, le bona ba be ba le gona setšhabeng le mo go lena, baruti ba maaka ba tlo ba gona, ba ba tlogo tliša dikarogo di išago tshenyegong, ba hlanogela mong wa bona e a ba rekilego, ba ikobela tshenyego ye e tlago ka bjako.

2Ba bantši ba tlo ya nabo ba keka le ditšhila; ke bona ba go tlo nyatšiša tsela ya therešo.

3Ba tlo leka go le fora ka dipolelo tša maano ba dirwa ke megabaru. Fela ke bona le kgale kahlolo e sa diegego go ba wela, mme kotlo ya bona ga e robale.

4Le Barongwa ba ba kilego ba senya, Modimo ga a ka a ba tsebafa; o ba lahletše moleteng ba tlemilwe ka ditlemo tša leswiswi, a ba gafela go bolokelwa tsheko.

5Le lefase lela la kgale ga a ka a le tsebafa, a phološa batho ba seswai ka Noage segoeledi sa toko mola lefase la banyatši a le ribegetša ka meetsefula.

6Le metse yela ya Sodoma le Gomora o e lahlile ya ba molora, gore ka yona go tsebje se se tlogo dirwa banyatši,

7a phonyokgiša Loto moloki, e a bego a tenegile ka mekgwa ya ditšhila ya dilalogi tšeo.

8Gobane motho eo wa moloki o lle pelo mola a agile le bona, a hlwa a bona a ekwa ge ba senya molao ka mediro ya bona.

9Ke mo go bonalago gore Modimo, ba ba mmoifago o ba hlakodiša melekong; bakgopo o ba bolokela kotlo ya tšatši la kahlolo.

10Gagologolo kotlo e tlo wela ba go latela nama ba gogwa ke dikganyogo tša ditšhila, le ba go nyatša go bušwa, ba mereba, baikgogomoši ba ba sa šiego go goboša tša letago,

11Mola barongwa ba ba ba phalago ka thata le ka maatla ba sa ba bege go Morena ka maroga.

12Ba bjalo ka diphoofolo tše di se nago tlhaologanyo, tše di bopetšwego go tanywa le go bolawa, ge ba goboša tše ba sa di tsebego. Ba tlo senyegela tshenyegong ya bona,

13Ba tlo fiwa moputso wa bokgopo, bona bao ba go bona maipshino, e le menate ya letšatši le tee. Ke bafefa, ke ditšhila. Ba iphsina ka dithuto tša go iphora ge ba eja menyanya le lena.

14Ke ba mahlo a a tletšego bootswa, ga ba hore sebe; ba goketša dipelo tša bafokodi; tša bona dipelo di hlalefetše megabaru. Ke bona ba go tlo lahlwa.

15Ba arogile tsela ya go loka; ba timetše ka go tšea ka tsela ya Bileama morwa wa Beoro, e a ratilego moputso wa bokgopo,

16A tla a solwa a arogile; lekaba la semuma la bolela ka lentšu la motho, la diba bošilo bja moporofeta.

17Batho bao ke didiba tše di se nago meetse; ke kgodi ye a tšewago ke ledimo; ba boloketšwe kgampi ya leswiswi la go ya go ile.

18Ba ba sa tšwago go phonyokga ka go kgaogana le ba go tšea ka tsela ya timelo, ba ba goketša ka dipolelo tša boikgantšho bja lefela, le ka maipshino a nama le a ditšhila.

19Ba ba holofetša khunologo, mola bona beng e sa le mathopya a tshenyego. Gobane se motho a fentšwego ke sona, o ba lethopša la sona.

20Gobane ge ba šetše ba phonyokgile ditšhila tša lefase ka go tseba Mong wa rena Jesu Kriste Mophološi, mme ba boela ba yo tanywa ke tšona ditšhila, gona tša mafelelo di tlo ba befela tša phala tša pele.

21Go bona go ka be go le kaone ge tsela ya toko ba ka be ba sa ka ba e tseba. Se se befilego ke ge ba e tsebile, mme ba napa ba hlanogela molao o mokgethwa wo ba o neilwego.

22Ba dira tše seema se rerešago ge se re: Mpša e boetše mahlatšeng a yona; kolobe e hlapetše go yo pshikologa lerageng.

← Chapter 1 Jump to: Chapter 3 →