2 Thessalonians 2

Sotho 1951 (BIBELE)

← Chapter 1 Jump to: Chapter 3 →

1Bana bešo! Re na le se re le kgopelago sona ka baka la go tla ga Mong wa rena Jesu Kriste, le go tlo bothelwa ga rena go yena.

2Re re: Le se ke la fo šišinywa ka pela la tlogelana le tlhaologanyo la gakantšhwa ka tša moya, le ka thuto, le ka lengwalo le ba rego le tšwa go rena, gwa tla gwa thwe: Letšatši la Kriste le kgauswi!

3Le se ke la gakišwa ke motho le ka mokgwa ofe, gobane letšatši leo le ka se ke la tla go sešo gwa tla tlhanogo pele, ge go sešo gwa tšwelela yena motho wa bobe, morwa wa tshenyego.

4Yena lenaba, e a nyatšago tšohle tše ba kago re ke Modimo le thapelo; a tlo ba a dula Ntlongkgethwa ya Modimo, a ipolela a re: Modimo ke nna!

5A ga le sa gopola, ge ke le boditše dilo tše mohla wola ke na le lena?

6Mme bjale le a tseba, se se mo diegišago se gona, sa gore a tle a utologe e le lebaka la gagwe.

7Ge e le sefsiswi sa bokgopo se šetše se tsoša maatla; fela, modiegiši o sa tlo thoma go tšwa tseleng.

8Ke mo go tlogo bonagatšwa motho wa bobe yo Morena a tlogo mo fediša ka mohemo wa molomo wa gagwe, a mo timetša ka go bonagala ga go tla ga gagwe.

9O tlo timetša yena eo wa go tla ka maatla a Sathane, ka maatlamoka a maaka, le ka matete a maaka, le ka mehlolo ya maaka.

10Ke yena wa go tla ka phapošo e tletšego ya dibe, a fapoša balahlegi ka ge ba ganne go rata therešo ya go ba phološa.

11Molato ke wona woo ge Modimo a ba lesitše ba tšewa ke maatla a phoro, a ba lesa ba yo dumela maaka,

12gore go lahlwe bohle ba sa kago ba dumela therešo, ba e lego ba go kgahlwa ke sebe.

13Ge e le rena, se se re swanetšego ke go le lebogela go Modimo ka mehla, lena bana bešo, baratwa ba Morena; gobane Modimo o le hlaoletše go phološwa go tloga mathomong, gore le be bakgethwa ka Moya, le dumele therešo.

14O le bileditše sona ka Ebangedi ya rena, gore le fihlele letago la Mong wa rena Jesu Kriste.

15Ke gona hle, bana bešo! Emang, le tiiše go ya ka taelo tše le di rutilwego ka polelo ya rena le ka lengwalo la rena.

16Gomme yena Mong wa rena Jesu Kriste, le Modimo Tata wešo e a re ratilwego, e a re filego khomotšo ya neng le neng, a re fa kholofelo e botse ka kgaugelo,

17a a homotše dipelo tša lena, a le kgoniše go dira tše botse le go bolela tše botse fela.

← Chapter 1 Jump to: Chapter 3 →