2 Timothy 2

Sotho 1951 (BIBELE)

← Chapter 1 Jump to: Chapter 3 →

1Bjale wena Ngwanaka! Tia maatla ka kgaugelo e lego go Kriste Jesu.

2Tše o di kwelego ke go botša go na le dihlatse tše ntši, di gafele batho ba ba botegago, ba ba tlogo kgona go ruta ba bangwe.

3Mme le wena o kgotlelele o le mohlabani o botse wa Jesu Kriste.

4Mohlabani ga a itate ka ditaba tša bophelo bjono; se a se ratago ke go kgahla eo a mo rapilego.

5Gomme le ge motho a ka katana, a ka se rwešwe seala, ge a sa katane senna.

6Diakolo di swanetše molemi wa seroto.

7Akanya tše ke di bolelago; gobane Morena o tlo go fa tlhaloganyo dilong ka moka.

8Gopola Jesu Kriste Motsogabahung, wa peu ya Dafida, ka mo Ebangedi ya ka e bolelago,

9ye ke tlaišetšwago yona, ka ba ka tlengwa bjalo ka mosenyi. Fela, lentšu la Modimo ga le tlengwe.

10Ke ka baka leo ke kgotlelelago ke direla bahlaolwa, gore le bona ba bone phološo ka Jesu Kriste le letago le le sa felego.

11Taba ye e tiile: Ge re ehwa le yena, le go phela re tlo phela le yena.

12Ge re kgotlelela, re tlo ba ra yo rena le yena. Ge re ka mo lahla, le yena o tlo re lahla.

13Ge re sa botege, yena o tlo fela a botega; gobane yena ga a kgone go itira o šele.

14Ba eletše, o fele o boeletša go ba hlatsela le le pele ga Morena, o re ba lese go tšea dikgang tše di sa holego selo, tše di fogo ferekanya ba ba di kwago.

15Se o swanetšego go se phegelela ke gore Modimo a bone o le mmotegi, o le modiri e a se nago bosodi, e a tsebago go ratha lentšu la therešo a sa kgopamiše.

16Ila tša metlae ye e sa holego selo; gobane di a golela di tlogelanye motho le borapedi.

17Gobane thuto ya ba ba bjalo e phera boka lephera. Ba bangwe ba bona ke Himeneo le Fileto;

18ba arogile therešo, ba re: Go tsoga ga bahu go šetše go diregile. Ba realo ba phekgola tumelo ya ba bangwe.

19Ge e le motheo wo o tiilego wa Modimo wona o eme o na le leswao la go re: Morena o tseba ba gagwe, le la go re; Ba go bola ina la Morena, a ba hlaswe dibe bohle!

20Ngwakong o mogolo dibja ga se tša gauta le tša silifera fela; le tša phata le tša letsopa di gona; tše dingwe ke tša go neneketšwa; tše dingwe ke tša go nyatšega.

21Bjale ge motho a ka ila tše mpe o tlo ba sebjana sa go neneketšwa, sa go kgethega, sa go kgahla mong wa ngwako, se se tlogo diriswa modiro o botse.

22Tšhaba dikganyogo tša bosogana. Phegelela toko le tumelo, le lerato le leago gammogo le ba ba rapelago Morena ka pelotshekegi.

23O gane diphetolano tša bošilo tše di se nago thuto; le wena o a tseba, di fo tswala dintwa fela.

24Mohlanka wa Morena ga a swanelwa ke dintwa. Se se mo swanetšego ke ge bohle a ba dira ka botho, ge e le moratabatho, mokgotlelelabošula.

25Bangangi o ba eletša ka boleta, gore mohlomongwe Modimo a ba nee tshokologo, ba tle ba lemoge therešo.

26Mohlomongwe ba tlo hlabologa ba phonyokga digole tša Diabolo tše a ba tantšego ka tšona, gore a ba diriše se yena a se ratago.

← Chapter 1 Jump to: Chapter 3 →