Habakkuk 3

Sotho 1951 (BIBELE)

← Chapter 2 Jump to:

1Thapelo ya Habakuku moporofeta; ke sefela.

2Morena, ke kwele kgowane ya gago ka tšhoga. Morena, ditiro tša gago a di ye le nyaga di phela, di tsebja di eya le nyaga. Ge o ka befelwa, o se lebale tlhomogelo.

3Modimodimo o tla a etšwa Themane; Mokgethwa o tla ka thabeng tša Parane; letago la gagwe le apeša legodimo, naga ya enela ditumišo.

4Seetša sa gona se ka sa mosegare; thoko tšohle tšagwe gwa hlaga mahlasedi; ke mo go khutilego maatla agwe.

5O etwa pele ke dinkhu; o šalwa nthago ke mollo.

6A gata lefase, le a roromela; a gadia, dithaba di a thothomela; dithaba tša bogologolo di a pšhatlwa; meboto ya kgalelele e a phirima. Ke tšona ditsela tšagwe neng le neng.

7Ke bone mekutwana ya Kušane e wetšwe ke mašula, dintlo tša ba Midiane di rotlollwa.

8Morena! A o galefela dinoka? A o tuka bogale ka baka la dinoka le lewatle, ge o tla ka dipitsi tšago, le ka makoloi ago a go phološa?

9Bora bja gago bo a bonala; maramašupa. Ke lentšu lela la tuu. O fatotše naga ka dinoka.

10Dithaba di go bone tša rotla; mafula a meetse a a feta, bodiba bo duma modumo, bo iša matsogo a bjona godimo.

11Tšatši le kgwedi di khuta dintlong, mesebe ya gago ge e gadima; di široga go pekenya dikgadima tša marumo ago.

12O gata o befetšwe; wa galefa le ditšhaba o ka pšhatla.

13O tšwa dira e le go phološa tšhaba sa gago, go phološa kgoši o e beilego. Ntlo ya o mobe o e rutla hlaka; metheo o epola gwa šala lentswe le le medilego.

14Balaodi ba bona o ba tia hlogo ka melamo ya bona. Ke ba go re šwahlela wa ledimo gore ba re šwalalanye; ke ba go nyakalala ge ba ja mmotlana ba utame.

15Dipitsi tša gago o tla natšo ka lewatle, ka belabela ya meetsemagolo.

16Nna ke di kwele, ka ferega pelo; melomo ya mumala, ke ekwa modumo; ka nolega moko ke šišinywa mo ke bego ke gatile. E le ka gobane ke letetše tšatši la tlalelo, la go hulwa ke setšhaba sa go re rapelwa.

17Fela, le ge mogo o ka lesa go khukhuša, le merara e se enywe selo, le mehlware e ka šitwa, le mašemo a se ntšhe dijo, le ge dinku di ka fela merakeng, gwa hlokwa kgomo marakeng,

18Le ge go ka ba bjalo, nna ke tla hlalalela yena Morena, ka thabela yena Modimo wa go mphološa.

19Morena Mong a bohle ke, yena maatla a ka; o mpha maoto a ditshepe, o ntshepediša mo ke phagamago. Ke sefela sa mohlabeledi a na le lekope la ka.

← Chapter 2 Jump to: