Joel 2

Sotho 1951 (BIBELE)

← Chapter 1 Jump to: Chapter 3 →

1Phalafala a di lle motseng wa Tsione! Hlabang mokgoši thabengkgethwa ya ka, le tšhoge, lena baagi ba naga ka moka; gobane tšatši la Morena le fihlile, le kgauswi.

2Ke tšatši la kgampi ya leswiswi; ke tšatši ya thiti ya leru le leso; se ka mahuba maweladithaba, setšhaba seo se segolo se se maatla. Ga go sekasona kgale le mehleng e tlago, ge o ka ya ka melokoloko ya meloko.

3Se tla se etilwe pele ke mello e tšhumago; se šalwa nthago ke dikgabo tše tukago. Naga se e hwetša e le tšhemo ya Edene; se e šia e senyetše wa lesehla, go sa phonyokga selo.

4Ba swana le dipitsi go ba bona, ba lebelo boka banamedi.

5Modumo wo e kego ke mošito o kwala kua godimo ga dithaba, modumo wo e kego ke wa mollo ge goswa dihlaka; ke setšhaba se se maatla ge se etšwa dira.

6Ge se fihla, batho ba a gakanega, ba galoga difahlogo, ba a sehlafala.

7Se tla se kganyeša wa bagale; se taba merako wa bahlabani; ka moka ba loka mo ba yago; ga ba fapoge tsela.

8Ga ba šušulane, monna o swara tsela ya gagwe; le ge ba wela gare ga dibetša ga ba gome.

9Ba theta le motse; ba namela mabotong, ba selela malapeng; ba tsena ka mašoba wa mahodu.

10Ge ba fihla, naga e a roromela, le leratadima le a thothomela; letšatši le ngwedi di a swiswifala, le dinaledi ga di sa kganya.

11Morena o roma medumo ya gagwe ge go tla dira tša gagwe, ke madira a mantšintši, ke a maatla; ke a go phetha se yena a se boletšego. Gobane tšatši la Morena ke le legolo, le šiiša kudu; ke mang a tlogo le kgona?

12Le bjale Morena o sa re: Boelang go nna ka pelo tša lena ka moka, le ka go ikona, le ka go lla, le ka go itshetla pelo.

13Lesang go garola aparo tša lena; le garoleng dipelo tša lena; le boele go Morena Modimo wa lena, gobane yena, ke Mogaugedi, yo lešoko, Mosefelepelo, yo bothobogolo; o rata go gomiša kotlo.

14Go tseba mang? A ka boela a re gaugela, a re šiela tšhegofatšo, ra šala le dibego tša dilewa le dinwewa tša Morena Modimo wa rena.

15Letšang diphalafala motseng wa Tsione, le goelele le re batho ba ikone; le kgobe phuthego.

16Le phuthe setšhaba, le kgethe phuthego, le kgobokanye ba bagolo, le bothe le masea a anywago, monyadi a tšwe mo ntlong ya gagwe; le monyalwa a tšwe phapošing ya gagwe.

17Le baperisita bahlanka ba Morena, ba le gare ga aletare le mathudi, a ba lle ba re: Morena tsebafa setšhaba sa gago; o se nyatšiše naga ya gago, bantle ba se tlo re kwera. E tla bang ge ba tlo re: Modimo wa bona o kae?

18Ke mo Morena a tlogo pelofalela naga ya gagwe, a kwela setšhaba sa gagwe bohloko.

19O tlo fetola a era setšhaba sagwe a re: Tsebang, ke le romela mabele le morara le makhura, le tle le hore. Nka se hlwe ke lesa le nyatšega gare ga ditšhaba.

20Motšwaleboa eo ke tlo mo iša kgole le lena; ke tlo mo rakela kua nageng ye tshehla ya marope; ba maloto ka ba iša lewatleng la bohlabela, ba sekgotho ka ba iša lewatleng la bodikela; gwa tlo rotoga mouta wa bona, gwa hlatloga monkgo ge ba bola, ka gobane ba dirile tše solago.

21Hee naga, se boife; o hlalale o thabe, gobane Morena o dira tše kgolo.

22Hee lena diphoofolo tša lešoka, le se boifeng! Gobane mafulo a naga a tlo hloga bjang bjo bonanana, mme dihlare di tlo enywa dikenyo tša tšona; mego le merara e tlo tšweletša maatla a yona.

23Mme lena bana ba Tsione, hlalalang, le thabe ka Morena Modimo wa lena; gobane o tlo le fa pula ya tsheola lebakeng la gona; o tlo le nešetša pula ya medupe le ya kgogolamoko bjalo ka mohlamonene.

24Diboa di tlo tlala mabele; mme bofotlelong go tlo tloroma morara le makhura.

25E tlo ba go le bušetša tša ngwagola le ngwagolaola, tša go lewa ke tšie le bojane, le segongwane, le mogokong, le phatakalala; ke tšona dira tša ka tše dintši tše ke le rometšego tšona.

26Le tlo ja bogobe; le tlo ja la hora, la leboga ina la Morena Modimo wa lena, e a le dirilego tše matete; mme setšhaba sa ka ga se sa tlo nyatšega neng le neng.

27Ke mo le tlogo lemoga gore Baisiraele mo ba lego gona le nna ke gare ga bona. Modimo wa lena ke nna Jehofa; mme setšhaba sa ka ga se sa tlo nyatšega neng le neng.

28Tše di tlogo latela tšeo šedi: Nama yohle ke tlo e tšhela Moya wa ka; mme barwa ba lena le barwedi ba lena ba tlo porofeta, ba bagolo ba lena ba lora diloro, masogana a lena a bona dipono.

29Le balata ba lena ba banna le ba basadi ke tlo ba tšhela Moya wa ka mehleng yeo.

30Mme ke tlo dira mehlolo kua legodimong le mo faseng, madi le mollo le mekubego ya meuši.

31Letšatši le tlo fetoga leswiswi, kgwedi ya ba madi, ge go fihla tšatši le legolo le le šiišago la Morena.

32Gomme ba tlogo phološwa ke ba rapelago ina la Morena; mme bophologelo e tlo ba thaba ya Tsione le motse wa Jerusalema ka mokgwa wo Morena a o boletšego. Mo go ba ba phološwago go tlo ba ba tlogo bitšwa ke Morena.

← Chapter 1 Jump to: Chapter 3 →