Philemon 1

Sotho 1951 (BIBELE)

Jump to:

1Paulo mogolegwa wa Kriste Jesu le Timotheo ngwanešo, re ngwalela Filemone moratiwa modiriši wa rena,

2le Apia kgaetšedi ya rena, le Aragipo mohlabani ka rena, le phuthego ya mo lapeng la gago.

3Kgaugelo a e be le lena le khutšo e tšwago go Modimo Tata wešo le go Morena Jesu Kriste.

4Ke leboga Modimo wa ka ka mehla ge ke go gopola dithapelong tša ka,

5ka gobane ke kwa tša lerato la gago le tumelo ya gago ya ge o dumetše Morena Jesu, o rata bakgethwa ka moka.

6Ke go rapelela gore kopano ye ya ge re le batee ka tumelo ya gago, mo go lena e ka tšweletša tsebo ya go hlatha bolo bjohle bo išago go Kriste Jesu.

7Gobane tše ke di hweditšego ka lerato la gago ke thabo e kgolo le khomotšo, ka ge dipelo tša bakgethwa di lapološitšwe ke wena, ngwanešo.

8Bjale -- le ge ka Kriste ke na le mafolofolo a go fo go laela se se swanetšego --

9Ke upša ke rata go go rapela ka ge lerato e le le kaakaa, e le nna e, Paulo mokgalabje, mehleng yeno ke le mogolegwa wa Jesu Kriste.

10Ke tla go wena ke rapelela ngwanaka yo ke mo tswetšego ke tlemilwe ke lealo; ke ra Onesimo.

11Ke motho yo kgale a bego a sa go hole selo; bjale gona, o tlo re hola bohle, wena le nna.

12Soo, ke mo roma gore a boele go wena. Mo amogele hle! Ke go re o amogela pelo ya ka.

13Ke be ke rata ge a ka dula le nna a ntirela legatong la gago, bjalo, ka ge ke tlemilwe ka baka la Ebangedi.

14Fela, ga nka ka rata go ba le se ke se dirago ke sešo ka kwa seakanyo sa gago; gore ge o ka ntshetša, e se be ka kgapeletšo, o dire o ithapa.

15Gobane Onesimo, ge a tlogelane le wena lebakanyana, mohlomongwe e be e le gore e tle e be wa gago neng le neng;

16E se hlwe e eba mohlanka, e le e a fetago mohlanka ka bogolo, e le ngwaneno moratwa. Ge nna ke šetše ke re ke ngwanešo ruri, o ka se mphale ge bjalo e le wa gago ka sebele, e le wa gago Moreneng?

17Bjale, ge o ntira mogwera wa gago, mo amogele bjalo eke o amogela nna.

18Gomme ge o ka ba le se o se senyegetšwego ka yena, goba ge a ka ba le molato go wena, di late go nna.

19Nna Paulo ke ngwala ka seatla sa ka, ke re ke tlo go lefela. Ke realo ke sa bolele gore mo go nna le wena o na le molato wo o go anago hlogo.

20Go bjalo, wena Ngwanešo! A nke ke thabe ka wena Moreneng, gomme o lapološe pelo yaka mo go Kriste.

21Ke go ngwalela ke holofetše gore o tlo kwa wa dira se ke se bolelago, wa tlo ba wa fetiša fao.

22Le gona o ntokišetše bodulo, gobane ke holofetše gore le tlo fiwa se le se kgopelago ka dithapelo, ka tla ka ba wa lena.

23Epafora e a nago le nna e le mogolegwa wa Kriste Jesu, o a go dumediša.

24Le Mareka, le Aristareko, le Dema le Luka, badiriši ba ka ba, ba re o dumele.

25Kgaugelo ya Mong wa rena Jesu Kriste a e be le meoya ya lena. Amene.

Jump to: