Philippians 3

Sotho 1951 (BIBELE)

← Chapter 2 Jump to: Chapter 4 →

1Ke sa iša pele, bana bešo! Ke re: Thabang Moreneng! Nna ga ke itšimeletše go boeletša tše ke di ngwadilego; a e be go le tiiša.

2Bonang dimpša tšeo; badirabobe bao; bonang baitshegakanyi bao.

3Gobane bona babolodiruri ke borena ba re direlago Modimo Moyeng, ra kgantšha Kriste Jesu, re sa bote tša nama.

4Go bota tša nama go nna go ka be go kgona go ba gona; gobane bona ba rego ba ka bota nama, nna ke ba phadile.

5Ke boloditšwe ka letšatši la seswai; ke wa setšhaba sa Isiraele; ke wa moloko wa Benyamini; ke Mohebere ka letswalo; Mofarisei ka Molao.

6Ge ke tlaišitše phuthego e be e le go fišegelwa tšona tšeo; tokong ya Molao ke be ke sa solege.

7Fela, tše ke bego ke re ke leruo, ke di bone ge e le tshenyegelo ge ke di bapetša le se Kriste a lego sona.

8Gomme le bjale ke sa tiiša ke re ke tshenyegelo, ge ke di bapetša le bogolo bja tsebo ya go tseba Jesu Kriste mong wa ka; ka baka la gagwe ka re: Tšeo ka moka ke tshenyegelo; ka re: Ke maudi fela, gore ke tle ke hume ka Kriste,

9Ke tle ke hwetšwe ke le wa gagwe, ke se na toko ya ka e tlago ka Molao, ke na le toko ka ge ke dumetše Kriste, toko ye ke e filwego ke Modimo ka baka la tumelo,

10ka mo tseba, ka tseba le maatla a tsogo ya gagwe, le go kopana nae mahlokong a gagwe, ke eba wa go tlo swana nae lehung la gagwe,

11e le gore le nna ke fihlele go tlo tsoga bahung.

12Ga se gore ke šetše ke di hweditše ka ba e a phethegilego; se ke se dirago ke go di hlomara gore ke be ke di thope; ke thope tšona tšeo Kriste a nthopetšego tšona.

13Bana bešo! Nna ga ke itsheme gore ke šetše ke thopile.

14Se se lego gona sese: Ke lebala tša kua nthago; ke obelela tša kua pele; ke kganyelela boyo, mo go lego mphapahlogo wa ba go biletšwa kua legodimong ke Modimo ka Jesu Kriste.

15Ka moka ba re lego baphethegi, a re be le kgopolo yeo. Ge le ka ba le kgopolo e šele, gona Modimo o sa tlo le utollela se e lego taba.

16Tabakgolo ke gore mo go tše re di fihletšego, re iše pele ka yona tsela e tee, re le batee kgopolong.

17Bana bešo! Bang baetši ba ka; le bone bao ba swerego tsela ba tšea ka mohlala wa rena.

18Gobane ba bantši ba iketše; bao ke ba boletšego gantši mo go lena; le bjale ke ba bolela ka go lla, ke re: Ke manaba a sefapano sa Kriste.

19Bofelo bja bona ke go lahlega; modimo wa bona ke mpa; ba kgantšha tša dihlong; megopolo ya bona e ile le tša lefase.

20Ge e le rena, gagešo ke magodimong; le Mophološi Morena Jesu Kriste re mo lebeletše re re o tlo boa gona.

21Mebele ya rena ye e nyatšegago ye, o tlo e fa lebopo le šele, ya tlo swana le mmele wa gagwe wa letago; ke tše a tlogo di dira ka maatla ao a kgonago go buša tšohle ka ona.

← Chapter 2 Jump to: Chapter 4 →