Proverbs 2

Sotho 1951 (BIBELE)

← Chapter 1 Jump to: Chapter 3 →

1Ngwanaka! Ge o ka dumela dikeletšo tša ka, mme wa hlokomela ditaelo tša ka,

2ge bohlale o bo sekegela tsebe, wa lebiša pelo yaago mo go lego tlhaloganyo,

3Ge o ka bitša temogo wa hlabošetša tlhaloganyo lentšu la gago,

4ge o ka e tsoma bjalo ka leruo, wa e nyakišiša boka lehumo le le fihlilwego,

5ke mo o tlogo go tseba go boifa Morena, wa fihlela go tseba Modimo.

6Gobane bohlale motho o bo newa ke Modimo; tsebo le temogo di tšwa molomong wa gagwe.

7Ke yena a beetšego baloki phologo; ke yena kotse ya ba se nago bosodi.

8Gobane o hlapetša mmila wa molao; o letile tsela ya baratwa ba gagwe.

9Gona moo o tlo hlaloganya toko le molao le bothakga, le tšohle ditsela tše bolo.

10Ke moo bohlale bo tsenago mo pelong ya gago; mme tsebo e tlo natefela moya waago.

11Gona keletšo e tlo go lotola; o tlo namolelwa ke temogo.

12Mohla tsela e befago, o tlo hlakodišwa le diatleng tša bathobaradia,

13ba ba tlogetšego mmila wa go loka, ba yo swara tsela tša lefsifsi,

14ba go thaba ge ba dira bobe, ba hlalalela maanomabe,

15ba tsela tša go kgopama, ba mehlala ya go fapogela thoko.

16E tlo ba go go thibela go ya go mosadi e sego wa gago, le go e a sa tsebjego, wa mantšu a boreledi;

17o hladile moratwa wa gagwe wa mola a sa le kgarebe, a lahla kgwerano ye a e dirilego ka Modimo.

18Lapa la gagwe le tlo sobelela kwa lehung; mme tsela tša gagwe di iša bahung.

19Bohle ba yago go yena ga ba boe; ga ba boele mo go tsela ya bophelo.

20Ka baka leo swara tsela ya ba bolo; tšea ka tsela ya ba ba lokago.

21Gobane ba ba tlogo dula mo nageng, ke baloki; ba ba tlogo šala ba le gona, ke bona bailabokgopo.

22Ba babe ba tlo fedišwa nageng; bakgelogi ba tlo rakwa mo go yona.

← Chapter 1 Jump to: Chapter 3 →