Ruth 4

Sotho 1951 (BIBELE)

← Chapter 3 Jump to:

1Boase a rotoga a ya kgorong a dula. Mohunolodi yola, yo Boase a bego a mmolela, ge a feta, Boase a mo rera a re: Wena semangmang, fapogela mono. A tla a dula.

2Boase a bitša banna ba lesome ba bagolo ba motse, a re: Dulang mo; mme ba dula.

3Boase a bolela le yola wa mohunolodi a re: Naomi o tšo boa nageng ya Moaba, o rekiša serapa sela se e bego e le sa Elimeleke ngwana borena.

4Nna bjale ke bolela o di kwe, ke re: Reka serapa seo re le fa, re na le bagolo ba selete sa gešo. Ge o rata go hunolla, o hunolle. Ge o sa rate, o mpotše, ke tsebe fao; ka gobane ga go sa na mohunolodi e mongwe ge e se wena, le nna ke go hlatlamago. Monna eo a re: Ke tlo hunolola.

5Boase a re: Ge o reka tšhemo yeo ya Naomi, o nyala Ruthe mosadi yola wa ga Moaba wa mohlologadi. O tlo mo tšea gore mohu yola o mo tsošetše leina mo bohweng bja gagwe.

6Ke mo mohunolodi a itšego: Gona nka se kgone go hunolola; e ka ba go senya bohwa bja ka. A go ikhunollele wena bakeng sa ka; nna di a mpalela.

7Bjale go be go na le mokgwa wa kgale wa Baisiraele, wa gore ge go hunollwa, goba ge go rekanywa, motho a role seeta sa gagwe a se nee wa gabo; ya ba bohlatse go Baisiraele.

8Le bjale mohunolodi yola ge a rera Boase a re: Ithekele wena, a rola seeta sa gagwe.

9Boase a bolela le bagolo ba selete ka moka a re: Lena le dihlatse lehono tša gore, tše e bego e le tša Elimeleke le tša Kileoni le tša Mahlone, ke di rekile go Naomi.

10Le Ruthe mosadi yola wa ga Moaba ke a mo tšea, gore mohu yola ke mo tsošetše leina bohweng bja gagwe, gore leina la gagwe le se hwe mo go bana babo le kgorong ya gabo. Le dihlatse lehono.

11Setšhaba ka moka se se bego se le kgorong le ba bagolo ba re: Re dihlatse. A Morena a dire gore mosadi eo a tsenago lapeng la gago a etše Rahele le Lea, ba babedi bao ba bathei ba setšhaba sa Isiraele. Baa senatla mono Efuratha, o be le leina mono Betlehema.

12A lapa la gago le etše la Pheretse, yo Juda a mmelegetšwego ke Thamara; go be bjalo ka bana, ba Morena a tlogo go nea ka mosadi e.

13Ya ba gona Boase a tšeago Ruthe ya ba mosadi wa gagwe. Ya re ge a tsene go yena, Morena a mo thabiša, a ithwala a belega ngwana wa mošimanyana.

14Basadi ba tla go Naomi ba re: A Morena a lebogwe ge a sa ka a go hlokiša mohunolodi lehono; a ina la gagwe le kwale mo go Isiraele.

15A a go lapološe pelo, a go babalele ge o šetše o godile, ka gobane o belegwe ke ngwetši e ya gago, e a go ratilego a fetiša barwa ba ba šupago.

16Naomi a tšea ngwana eo, a mo fara difarong, a ba mofepi wa gagwe.

17Basadi ba ba bego ba agišane nae ba mo rea leina, ba re: Naomi o belegetšwe ngwana wa mošimanyana; ba mmitša ka la Obede. Ke yena tatago Isai, e lego tatago Dafida.

18Ba leloko la Pheretse šeba: Pheretse ke tatago Hetserone.

19Hetserone ke tatago Rame. Rame ke tatago Abinadaba.

20Abinadaba ke tatago Nahesone. Nahesone ke tatago Salama.

21Salama ke tatago Boase. Boase ke tatago Obede.

22Obede ke tatago Isai. Isai ke tatago Dafida.

← Chapter 3 Jump to: