1 Samuel 22

Sotho 2000 (BIBELE Taba yea Botse)

← Chapter 21 Jump to: Chapter 23 →

1Dafida a tšhaba motseng wa Gathe a ya leweng kgauswi le motse wa Adulamo. Ge bomorwarragwe le ba bangwe ka moka ba lapa ba ekwa gore o fao, ba yo dula naye.

2Batho ba ba bego ba le mathateng, le bao ba bego ba palelwa ke go lefa melato ya bona, le bao ba bego ba ngongorega ba ile ba ya go yena, ya ba banna ba e ka bago ba makgolo a mane, gomme yena ya ba moetapele wa bona.

3Go tloga moo Dafida a ya Mitsepa kua Moaba gomme a re go kgoši ya Moaba: “Hle, dumelela tate le mme ba tle ba dule nago go fihlela ke tseba se Modimo a tlilego go ntirela sona.”

4Ka gona Dafida a šadiša batswadi ba gagwe le kgoši ya Moaba, gomme ba dula moo nako ka moka ya ge Dafida a sa utamile ka sebong.

5Eupša moprofeta Gade a tla go Dafida mme a re: “O se ke wa dula mo; napa o tloge o ye nageng ya Juda.” Ka gona Dafida a tloga a ya sethokgweng sa Herete.

6Ka letšatši le lengwe Saulo o be a le Gibea, a dutše ka fase ga mohlare wa motamariske mmotong a swere lerumo la gagwe, gomme balaodi ka moka ba madira a gagwe ba eme kgauswi le yena. O ile a botšwa gore Dafida le banna ba gagwe ba bonwe,

7mme a re go balaodi ba gagwe: “Theetšang, lena banna ba Benjamene! A le gopola gore morwanyana yola wa Isai a ka tla a le fa mašemo le dirapa tša merara ka moka ga lena, gomme a dira yo mongwe le yo mongwe wa lena molaodi wa ba lekgolo goba wa ba sekete?

8A leo ke lona lebaka le le le dirago gore ka moka ga lena le ntakane? Ga go yo a kilego a ntoma tsebe gore morwa wa ka o gwerane le Dafida. Ga go yo a nkwelago bohloko gare ga lena goba yo a ntshebelago gore Dafida, mohlanka wa ka, ka nako ye o nyaka nthobana ya go mpolaya, le gore morwa wa ka o mo hlohleletša go dira taba yeo!”

9Doege o be a eme moo le balaodi ba madira a Saulo, gomme a re: “Ke bone Dafida nako yela a be a ile go Ahimeleke, morwa wa Ahitube, kua Nobo.

10Ahimeleke o ile a botšiša Morena se Dafida a swanetšego go se dira, gomme ka morago ga moo a fa Dafida mphago le tšhoša ya Goliate, Mofilista.”

11Ka gona Kgoši Saulo a roma batho gore ba yo bitša moprista Ahimeleke le meloko ya gagwe ka moka, bao le bona e bego e le baprista kua Nobo, gomme ba tla go yena.

12Saulo a re go Ahimeleke: “Theetša, wena morwa wa Ahitube!” Ahimeleke a re: “Ke theeditše, mong wa ka.”

13Saulo a mmotšiša a re: “Ke ka baka lang wena le Dafida le ntakane? Ke ka baka lang o mo file mphago le tšhoša, mme wa botšiša Modimo se a swanetšego go se dira? Bjale o nkemetše ka maoto gomme o nyaka nthobana ya go mpolaya!”

14Ahimeleke a mo fetola a re: “Dafida ke mohlankedi yo a go botegelago go feta bahlankedi ba gago ka moka. Ke mokgonyana wa gago, molaodi wa baleti ba gago, mme o hlompšha kudu kgorong ya mošate.

15Ee, ke botšišitše Modimo se a swanetšego go se dira, gomme e be e se la mathomo le gatee. Ge e le mabapi le go go lakana gona, kgoši a se ke a rweša mohlanka wa gagwe molato, goba a rweša yo mongwe melokong yešo molato. Ga ke tsebe selo ka taba yeo!”

16Kgoši a re: “Ahimeleke, o swanetše go hwa, wena le meloko ya geno ka moka.”

17Ke moo a itšego go baleti ba ba bego ba eme kgauswi le yena: “Bolayang baprista ba Morena! Ba lakane le Dafida gomme ba se ntome tsebe gore o tšhabile, le ge ba be ba tseba taba yeo nako ye ka moka.” Eupša baleti ba gana nnang go bolaya baprista ba Morena.

18Ka gona Saulo a re go Doege: “Wena ba bolaye!” Gomme Doege a ba bolaya ka moka. Ka letšatši leo a bolaya baprista ba masome a seswai a metšo ye e fetšago seatla, bao ba bego ba apara seaparo se sekgethwa.

19Saulo a laela le gore le batho ba bangwe ka moka ba Nobo, motse wa baprista, ba bolawe: banna le basadi, bana le masea, dikgomo, dipokolo le dinku – batho ba bolawa ka moka le diphoofolo.

20Eupša Abiatare, morwa yo mongwe wa Ahimeleke, a phologa, gomme a tšhabela go Dafida.

21A mmotša ka moo Saulo a bolailego baprista ba Morena ka gona.

22Dafida a re go yena: “Ke ile ge ke bona Doege kua tšatši lela, ka tseba gore ruri o ile go botša Saulo. Ka gona ke na le molato ge meloko ya geno ka moka e bolailwe.

23Dula le nna gomme o se ke wa boifa. Saulo o nyaka go bolaya nna le wena bobedi bja rena, eupša ge o na le nna o tla bolokega.”

← Chapter 21 Jump to: Chapter 23 →