Daniel 3

Sotho 2000 (BIBELE Taba yea Botse)

← Chapter 2 Jump to: Chapter 4 →

1Kgoši Nebukadnesare o kile a laela gore go bopše seswantšho sa gauta, botelele bja sona e be dimetara tše 26,7, bophara e be tše 2,8, le gore se hlongwe molaleng wa Dura, seleteng sa Babilone.

2Ke moka kgoši a laela gore bahlankedi ba gagwe ka moka ba kgobokane – babuši, babušiši, bathušababušiši, baeletši, boramatlotlo, baahlodi, bomaseterata, gotee le bahlankedi ba bangwe ba maemo ba dilete. Ba be ba swanetše go tla go kgakola seswantšhobopša seo Kgoši Nebukadnesare a bego a se hlomile.

3E rile ge bahlankedi bao ka moka ba kgobokane go tlo kgakola seswantšhobopša mme ba eme pele ga sona,

4segoeledi sa goelela sa re: “Lena ditšhaba le merafe le maleme ohle!

5Ge le ekwa diphalafala le dinaka le dikgapa le dikwadi le diharepa le dinakamorabana le diletšo tše dingwe tša mehutahuta di lla, le itahlele fase ka difahlego le khunamele seswantšhobopša se sa gauta se se hlomilwego ke Kgoši Nebukadnesare.

6Yo a ka se itahlelego fase ka sefahlego a se khunamela, o tla lahlelwa moubelong mo go laumago mollo.”

7Ka gona, e rile ge ditšhaba tšohle le merafe le ba maleme ka moka ba ekwa diletšo tšeo di lla, ba itahlela fase ka difahlego ba khunamela seswantšhobopša sa gauta se Kgoši Nebukadnesare a bego a se hlomile.

8Ke moo Bababilonia ba bangwe ba hweditšego lebaka la go bega Bajuda.

9Ba re go Kgoši Nebukadnesare: “Nke kgoši a re phelele go ya go ile!

10Kgoši, mong wa rena, o laetše gore ge diletšo di lla mang le mang a itahlele fase ka sefahlego a khunamele seswantšhobopša sa gauta,

11le gore yo a ka se dirego bjalo o swanetše go lahlelwa moubelong wo o laumago mollo.

12Go na le Bajuda ba bangwe ba o ba beilego balaodi ba tša selete sa Babilone, e lego Shadraka le Meshaka le Abednego, ba ba tšeišago taelo ya gago phefo. Ga ba direle modimo wa gago goba ba khunamela seswantšhobopša sela o se hlomilego.”

13Ge kgoši a ekwa seo a gakala, a tuka bogale, gomme a laela gore banna bao ba bararo ba tlišwe pele ga gagwe. Ge ba fihla,

14a re go bona: “Wena Shadraka le Meshaka le Abednego, na ke nnete gore lena le gana go direla modimo wa ka le go khunamela seswantšhobopša sa gauta se ke se hlomilego?

15Bjale ge, ge eba ga le gane, le re ge le ekwa diphalafala le dinaka le dikgapa le dikwadi le diharepa le dinakamorabana le diletšo tše dingwe tša mehutahuta di lla, le itahlele fase ka difahlego le khunamele seswantšhobopša se ke se dirilego. Eupša ge le ka se dire ka mokgwa woo, le tla lahlelwa ka pelapela moubelong wo o laumago mollo. Kgane le gopola gore go na le modimo yo a ka le phološago diatleng tša ka?”

16Shadraka le Meshaka le Abednego ba mo fetola ba re: “Mong wa rena, tabeng ye ga re nyake go iphetolela.

17Ge Modimo yo re mo hlankelago a kgona go re hlakodiša moubelong wa mollo wo o laumago le diatleng tša gago, kgoši, gona yena o tla re hlakodiša.

18Fela le ge a ka se re hlakodiše, wena kgoši, tseba gore modimo wa gago wona re ka se o direle, le seswantšhobopša sa gauta se o se hlomilego re ka se se khunamele.”

19Ke mo Nebukadnesare a tletšego pelo gomme a galoga sefahlego ka go galefela Shadraka le Meshaka le Abednego. Ka gona a laela gore moubelo o tukišwe gašupa go feta mehleng.

20A laela banna ba e lego dinatla mo bahlabaning ba gagwe gore ba tleme banna bao ba bararo mme ba ba lahlele moubelong wo o laumago mollo.

21Ka gona banna bao ba tlengwa ba sa apere dipurapura tša bona le marokgo le mengatse le diaparo tše dingwe, gomme ba lahlelwa moubelong wo o laumago mollo.

22Bjale ka gore kgoši o be a ba laile tsebegokwa gore moubelo o tukišwe kudu, kgabo ya wona e ile ya bolaya dinatla tšela di bego di lahlela banna bale moubelong.

23Ke moka Shadraka le Meshaka le Abednego ba wela ka gare ga moubelo wo o laumago mollo ba sa tlemilwe.

24Gateetee Nebukadnesare a emelela a tlabegile. A botšiša bakgomana ba gagwe a re: “Na ga ke re re lahletše banna ba bararo ka moubelong ba tlemilwe?” Bona ba mo fetola ba re: “Ee, go bjalo, kgoši.”

25Kgoši a re: “Eupša ke bona banna ba bane ba sepelasepela ka gare ga mollo! Ga se ba tlengwa, le gona ga o ba dire selo – gomme yola wa bone nke ke sebopiwa sa legodimong.”

26Ke moka Nebukadnesare a ya mojako wa moubelo woo mme a ba bitša a re: “Shadraka! Meshaka! Abednego! Lena bahlanka ba Modimo Yogodimodimo, etšwang le tle mo!” Gommme ba tšwa.

27Babuši, babušiši, bathušababušiši le baeletši ba kgoši ba kgobokana gomme ba bona banna bao ba bararo, mme ba lemoga gore mollo ga se wa ba dira selo. Meriri ya bona e be e se ya tlaboga, diaparo tša bona di se tša swa, le gona ba sa nkge mollo.

28Kgoši a re: “A go retwe Modimo wa Shadraka le Meshaka le Abednego! O romile morongwa wa gagwe a hlakodiša bahlanka ba ba gagwe ba ba mmotilego. Ba nyaditše ditaelo tša ka gomme ba gafa bophelo bja bona, ba se direle modimo o šele ba o khunamela, ge e se wa bona.

29“Gomme bjale ke laela gore ge motho wa setšhaba sefe goba morafe ofe goba leleme lefe a ka nyefola Modimo wa Shadraka le Meshaka le Abednego, o swanetše go ripaganywa, le ngwako wa gagwe o fetošwe lešope. Ga go na le modimo wo mongwe wo o ka phološago ka mokgwa wo.”

30Gomme kgoši a bea Shadraka le Meshaka le Abednego maemong a godimo go feta a pele seleteng sa Babilone.

← Chapter 2 Jump to: Chapter 4 →