Exodus 13

Sotho 2000 (BIBELE Taba yea Botse)

← Chapter 12 Jump to: Chapter 14 →

1Morena a re go Moshe:

2“O nneele maitšibolo ka moka a matona. Leitšibolo le lengwe le le lengwe la Moisraele le e lego mošemane ke la ka, le leitšibolo le lengwe le le lengwe la seruiwa le letona ke la ka.”

3Moshe a re go setšhaba: “Gopolang letšatši le; ke letšatši le ka lona le tšwilego Egepeta, mo le bego le le makgoba. Le ke lona letšatši le Morena a le ntšhitšego ka maatla a gagwe a magolo. Go se ke gwa lewa se se ometšwego.

4Le huduga Egepeta lehono mo kgweding ya mathomo, kgwedi ya Abibi.

5Morena o enetše borakgolokhukhu ba lena gore o tla le fa naga ya Bakanana le Bahete le Baamore le Bahibe le Bajebuse. Ke naga ya mokhora le monono. Ge Morena a le goroša nageng yeo, le keteke monyanya wo mo kgweding ya mathomo ya ngwaga wo mongwe le wo mongwe.

6Matšatši a a šupago le je dinkgwa tše di se nago komelo, gomme ka letšatši la bošupa go be le monyanya wa go godiša Morena.

7Matšatši a a šupago ao le se ke la ja dinkgwa tše di nago le komelo; go se ke gwa ba le komelo goba selo se se nago le komelo mo gohle nageng ya lena.

8Tšatšing leo yo mongwe le yo mongwe a hlathollele morwa wa gagwe gore o bina monyanya ka baka la seo Morena a mo diretšego sona mohla a etšwa Egepeta.

9Tirelo ye e tla ba segopotšo bjalo ka selo se se tlemeletšwego seatleng goba phatleng; e tla le gopotša go fela le ikgakolla le ithuta melao ya Morena, ka gobane Morena a le ntšhitše Egepeta ka maatla a magolo.

10Le keteke monyanya wo ka nako ye e beilwego, ngwaga ka ngwaga, e le molao.”

11“Morena o tla le goroša nageng ya Bakanana ye a e enetšego lena le borakgolokhukhu ba lena. Mohla a le abela yona,

12lena le abele Morena mošemane yo mongwe le yo mongwe wa leitšibolo. Leitšibolo le lengwe le le lengwe le letona la seruiwa ke la Morena;

13ge e le leitšibolo le letona la pokolo lona le rekollwe go Morena ka kgapana. Ge le sa rate go rekolla pokolo, gona le e robeng molala. Le rekolleng morwa wa lena wa leitšibolo.

14Ka moso ge morwa wa gago a go botšiša gore tirelo ye e šupa eng, o mo fetole ka go re: ‘Ka maatla a magolo Morena o re ntšhitše Egepeta, mo re bego re le makgoba.

15Mola kgoši ya Egepeta e ngangabetše e gana go re lesa re sepela, Morena o ile a bolaya maitšibolo ka moka a matona nageng ya Egepeta, go thoma ka a batho go iša go a diruiwa. Ke ka baka leo re direlago Morena sehlabelo ka leitšibolo le letona, barwa ba rena ba maitšibolo bona ra ba rekolla.

16Tirelo ye e tla ba segopotšo, go swana le selo se se tlemeletšwego diatleng goba diphatleng tša rena; e tla re gopotša gore Morena o re ntšhitše Egepeta ka maatla a gagwe a magolo.’ ”

17E rile ge kgoši ya Egepeta e lesa Baisraele ba sepela, Modimo a se ke a sepediša Baisraele ka tsela ya go ipata ka lewatle go leba nageng ya Bafilista, le ge tsela ye e be e kgaoletša kudukudu. Modimo o itše: “Ga ke nyake gore setšhaba se hlanoge mme se gomele Egepeta ge se bona gore se tlile go swanelwa ke go lwa.”

18Ka baka leo a ba tepoša ka tsela ya morarela, ba putla lešoka, ba leba Lewatlekhubedu. Ba tšwile Egepeta ba itlhamile ba ipeakanyeditše tlhabano.

19Moshe o ile a tšea mašapo a Josefa a sepela nao, ka ge Josefa a be a ile a eniša Baisraele gore ba tloge nao. O be a ile a re: “Ka kgonthe Morena o tla le hlakodiša, gomme mohla a le hlakodiša, le rwale mašapo a ka le tloge nao fa.”

20Ba tlogile Sukote, ba ya ba hloma mešaša kua Ethamo, mafelelong a lešoka.

21Mosegare Morena o be a ba eta pele ka thololo ya leru go ba laetša tsela, gomme bošego a ba eta pele ka thololo ya mollo go ba bonegela, gore ba sepele bošego le mosegare.

22Thololo ya leru e be e fela e ba eta pele mosegare, mme thololo ya mollo e ba bonegela bošego.

← Chapter 12 Jump to: Chapter 14 →