Matthew 4

Sotho 2000 (BIBELE Taba yea Botse)

← Chapter 3 Jump to: Chapter 5 →

1Ka morago ga moo Jesu a išwa ke Moya lešokeng gore a yo lekwa ke Diabolose.

2Ge a feditše matšatši a masome a mane le mašego a ona a sa je selo, a swarwa ke tlala.

3Moleki yoo a tla go yena a re: “Ge o le Morwa wa Modimo, laela maswika a gore a fetoge bogobe.”

4Jesu a mo fetola a re: “Mangwalo a Makgethwa a re: ‘Motho ga a phele ka bogobe fela, eupša o phela le ka se sengwe le se sengwe se Modimo a se bolelago.’ ”

5Ke moka Diabolose a mo iša Motseng wo Mokgethwa, a fihla a mo nametša ntlhohlong ya Tempele,

6gomme a re go yena: “Ge o le Morwa wa Modimo, ikušetše fase, gobane Mangwalo a Makgethwa a re: “ ‘Modimo o tla laela barongwa ba gagwe gore ba go kuke, gore o se thetšwe ke maswika.’ ”

7Jesu a mo fetola a re: “Le gona Mangwalo a Makgethwa a re: ‘O se ke wa leka Morena Modimo wa gago.’ ”

8Diabolose a tšea Jesu gape a mo iša thabeng ye teleletelele, a mo laetša dinaga ka moka tša lefase le mahumo a tšona

9a re: “Tše ka moka ke tla go fa tšona ge o ka wa ka matolo wa nkhunamela.”

10Jesu a mo fetola a re: “Sathane, ntlogele, gobane Mangwalo a Makgethwa a re: ‘O khunamele Morena Modimo wa gago, o direle yena a nnoši!’ ”

11Ke moo Diabolose a mo tlogetšego, gomme barongwa ba tla ba hlankela Jesu.

12Ge Jesu a ekwa gore Johanese o išitšwe kgolegong, a ya Galilea.

13A se ke a boela Nasaretha, eupša a yo dula Kapernaume, e lego motse wa kgauswi le letsha la Galilea, nageng ya Sebulone le ya Naftali,

14gore go phethege se se boletšwego ke moprofeta Jesaya mola a re:

15“Wena naga ya Sebulone, le wena naga ya Naftali, le lego tseleng ya go ya lewatleng, mošola wa noka ya Jordane, wena Galilea, naga ya baditšhaba –

16setšhaba se se dutšego swiswing se bone seetša se segolo; ba ba dutšego nageng ye e okametšwego ke lehu ba hlabetšwe ke seetša.”

17Go tloga ka nako yeo Jesu a thoma go ruta batho a re: “Sokologang, ka gobane mmušo wa Modimo o batametše!”

18Ya re ge Jesu a sepela lebopong la letsha la Galilea, a bona banna ba babedi, barwa ba motho, bao e bego e le barei ba dihlapi. Bona e be e le Simone, yo a bego a bitšwa Petrose, le Andrease, ngwanabo. Ba be ba rea dihlapi ka letsheng ka malokwa.

19Jesu a re go bona: “Ntateleng, gomme ke tla le dira barei ba batho.”

20Ba akgofa ba tlogela malokwa a bona, ba mo latela.

21Ge a tloga moo a bona ba bangwe ba babedi le bona e le barwa ba motho. Bona e be e le Jakobose le Johanese, barwa ba Sebediose. Ba be ba le ka leselawatleng le Sebediose, tatagobona, ba lokiša malokwa a bona. Jesu a ba bitša.

22Le bona ba akgofa ba tlogela leselawatle le tatagobona, ba mo latela.

23Jesu a sepela le naga ya Galilea ka moka, a ruta ka disinagogeng, a bega Taba ye Botse ya mmušo wa Modimo, a fodiša batho malwetši le mafokodi a bona.

24Taba ya gagwe ya kwagala nageng ya Siria ka moka, gomme batho ba mo tlišetša ba ba babjago ba swerwe ke malwetši a mehutahuta le dihlabi, le ba ba tsenwego ke bademone, le ba malwetši a go wa, le ba go repha ditho, gomme Jesu a ba fodiša ka moka.

25A latelwa ke mašaba a mantši a go tšwa Galilea, le Metseng ye Lesome, le Jerusalema, le Judea, le nageng ya ka mošola wa noka ya Jordane.

← Chapter 3 Jump to: Chapter 5 →