Nahum 2

Sotho 2000 (BIBELE Taba yea Botse)

← Chapter 1 Jump to: Chapter 3 →

1Bonang, kua dithabeng go theoga motseta ka ditaba tše dibotse. O tlilo bega molaetša wa khutšo. Lena batho ba Juda, ketekang menyanya ya lena, le phethagatše dikeno tša lena. Bakgopo ba ka se sa tsoga ba šwahletše naga ya lena. Ba fedišitšwe taa!

2Agee, Ninibe, agee! Manaba, bomaphušola, a a go hlasela! Leta dibo tša gago. Dula o dišitše tsela! Itokišetše ntwa, o rape madira a gago kgothekgothe!

3(Gobane Morena o tlilo bušetša Baisraele, ditlogolo tša Jakobo, sekeng, le ge manaba a ba hutše, a remile le merara ya bona.)

4Bagale ba manaba ba swere dikotsekhwibidu, madira a bona a apere bohwibidu fela. Dikoloi tša bona tša ntwa di pekenya boka mollo ge ba ipeakanyetša ntwa. Banameladipere ba fela pelo ya go lwa.

5Dikoloi tša bona tša ntwa di swinilala le mebila, di pharihla le mapatlelo a motse. Di re baibai bjalo ka dirumola, tša re tseke boka legadima.

6Balaolamadira ba a bitšwa; ba tšama ba kgopša le tsela. Bahlasedi ba kgeregela morakong, ba tsema sefahlo sethubamorakong.

7Mesela ya ka nokeng e a bulwa; mošate ga se letšhogo, ga se letšhogo!

8Mohumagadi o a thopša, makgoba a gagwe a basetsana a rwele megono, a lla boka maeba.

9Batho ba tšhaba ba etšwa Ninibe, ba etša meetse a šwahlile mogobe! Ba a goelela ba re: “Emang! Emang!” eupša ga go ya a retologago.

10Bahlasedi ba re: “Thopang silibera! Thopang gauta! Motse wo o tletše matlotlo. O rwele mahumohumo.”

11O thubilwe, o ngadilwe, ke marope! Pelo di swerwe ka diatla; go bethantšhwa dikhuru, maatla a ile; bohle ba galogile difahlego.

12O kae motse wola e bego e le seroba sa ditau, e le lewa la ditawana, mo go bego go eya tau le taugadi mmogo le bana ba tšona di sa šie selo?

13Tau e be e selela bana ba yona nama, e bolaela taugadi diphoofolo; e be e kgophela dibolawa ka maweng, matšaba a yona a tletše nama.

14Morena Ramaatlaohle o re: “Ke lwa le wena. Ke tla tšhuma dikoloi tša gago tša ntwa gwa kuelela muši. Bagale ba gago ba tla bolawa ka tšhoša, gomme ke tla go amoga dithebola tše o di amogilego ditšhaba tše dingwe. Matšhošetši a batseta ba gago a ka se sa kwagala.”

← Chapter 1 Jump to: Chapter 3 →