Proverbs 6

Sotho 2000 (BIBELE Taba yea Botse)

← Chapter 5 Jump to: Chapter 7 →

1Ngwanaka, ge o itlemile go lefela motho molato wa gagwe ge yena a palelwa, ge o ikanne go lefela motho yo a jetšego molato mpeng,

2ge o tantšwe ka tše o di boletšego, ge mantšu a gago e bile moreo go wena,

3gona o wetše ka diatleng tša motho yoo. Go intšha bothateng, ngwanaka, o dire ka mokgwa wo: O akgofe o ye go yena, o mo rapele.

4O se robale, o dule o phafogile.

5O itlhakodiše bjalo ka tshephe go motsomi, goba bjalo ka nonyana sefung sa morei.

6Wena sebodu, eya makekeng, o bone ka mo a phelago ka gona, gomme o ithute ka ona.

7Le ge a se ne moetapele, goba molaodi, goba mmuši,

8a ipolokela dijo selemo; a ikgobokeletša mefago ge go bunwa.

9Sebodu towe, o tla robala go fihlela neng? O tla tsoga neng?

10Sona se fetola ka go re: “Ke sa nyaka go robala gannyane, ke bo re šwaa, ke phuthe matsogo, ke bo fokotše gosenene.”

11Ge o ka no pompala, bodiidi bo tla go phuthuma bjalo ka mohlakodi, mohlako wa go tsetsela bjalo ka mokgopedi.

12Motho wa senokwane, wa sehwirihwiri, ke yo a tšamago a bolela maaka,

13yo a kobonyago bangwe ka leihlo, a ngwalangwala fase ka leoto, a šupašupa batho ka monwana;

14ke yo a dulago a loga maanomabe ka pelo ya bomenetša, a lweša batho.

15Ke ka baka leo a tlago khukhunetšwa ke madimabe, gateetee a hwa la pitšana.

16Go na le dilo tše tshelelago tše Morena a di hloilego, gabotsebotse ke tše di šupago tše di mo šišimišago:

17ke boikgogomošo, le go bolela maaka, le go bolaya ba ba se nago molato;

18ke go loga maanomabe, le lephakuphaku la go dira tše mpe;

19ke hlatse ya maaka, seaketšabatho, le twešameloko.

20Ngwanaka, o phethe taelo tša tatago, le tše o di rutwago ke mmago o se di hlokomologe.

21O dule o di bolokile ka pelong ya gago, o ikgabiše ka tšona bjalo ka pheta molaleng.

22Di tla go hlahla ge o sepela, tša go leta ge o robetše, tša bolela nago ge o tsoga.

23Ditaelo tša tatago ke lebone, tše o di rutwago ke mmago ke seetša; go solwa ke bona ke tsela ya bophelo.

24Ke tša go go phemiša seotswa, mosadi wa leleme le boreledi wa monna yo mongwe.

25O se goketšwe ke botse bja mosadi yoo, wa tanywa ke melebelelo ya gagwe.

26Segwebakathobalo le ka senkgwa motho a ka se reka, kganthe seotswa sona se inyakela lehumo la motho.

27Kgane motho a ka gogolela mollo difarong a se tšhume diaparo tša gagwe?

28Na motho a ka gata magala a se swe dinao?

29Di bjalo tša yo a robalago le mosadi wa monna yo mongwe. Yo a mo kgomago a ka se re phankga.

30Lehodu la go utswa dijo go ntšha tlala maleng batho ga ba le sole;

31eupša ge le ka swarwa le lefišwa gašupa, le ge e ka ba ka thoto yohle ya lapa la lona.

32Ge e le monna yo a otswago, yena o itlhokiša tlhaologanyo. Taba ya mohuta wo e dirwa fela ke moipolai.

33O tla papatlwa, a hlomphollwa; o tla gobošetšwa sa ruri;

34gobane lehufa le galefiša monna; ge a itefeletša ga a na lešoko.

35Ga a amogele phophotho, ga a fepeletšege, ešita le ge e ka ba ka mpho ye kaakang.

← Chapter 5 Jump to: Chapter 7 →