Zephaniah 2

Sotho 2000 (BIBELE Taba yea Botse)

← Chapter 1 Jump to: Chapter 3 →

1Hee, lena setšhaba sa go hloka dihlong, gopodišišang tše le di dirago

2pele ga ge Modimo a le dira se a ikemišeditšego sona, pele Letšatši la Kahlolo le fihla mme lena le tšhungwa ke kgalefo ya Modimo go swana le mooko ge o fišwa ke mollo, pele letšatši la pefelo ya gagwe le le fihlela.

3Nyakišišang thato ya Morena, lena baikokobetši bohle ba mo nageng ba le phethago ditaelo tša gagwe. Dirang tše di lokilego gomme le ikokobetše pele ga Morena. Mohlomongwe le ka phephišwa kotlo ka letšatši la kgalefo ya gagwe.

4Motseng wa Gasa go tla tšhabja, Ashkelone e tla ba marope, batho ba Ashdode ba tla rakwa mosegare wo monana, le motse wa Ekrone o tla thubja.

5Le hwile, lena Bafilista le dulago lebopong la lewatle. Morena o šetše a le ahlotše, lena badudi ba Kanana, naga ya Bafilista. O tla le feleletša, gwa se šale le o tee wa lena.

6Naga ya lena ye e bapilego le lewatle e tla fetoga meraka ya badiša le mašaka a dihuswane.

7E tla ba ya mašaledi a batho ba Juda. Ba tla fudiša mehlape ya bona gona moo, gomme ba robala ka dintlong tša Ashkelone. Morena Modimo wa bona o tla ba hlokomela, a ba atla gape.

8Morena Ramaatlaohle o re: “Ke kwele batho ba Moaba le ba Amone ba rumola setšhaba sa ka ba se roga, ba bile ba ikgantšha ba re ba tla thopa naga ya sona.

9Ke ikana ke le Modimo yo a phelago wa Israele gore Bamoaba le Baamone ba tla fedišwa bjalo ka badudi ba Sodoma le ba Gomora. Dinaga tša bona e tla ba felo ga ditshehlo le meepo ya letswai le leganata go ya go ile. Mašaledi a setšhaba sa ka a tla ba hula, a ba amoga naga.”

10Ke ka mo batho ba Moaba le ba Amone ba tlago otlelwa boikgantšho bja bona ka gona. Ba tla otlwa ka ge ba rogile setšhaba sa Morena Ramaatlaohle, ba bile ba itheta ba re ba tla se fenya.

11Go bona Morena o tla šiiša. O tla fediša medingwana yohle ya lefase, ya ba gona ditšhaba tšohle tša mabopong a lewatle di mo khunamelago, bangwe le bangwe nageng ya bona.

12Le lena Baetopia, Morena o tla le bolaya ka tšhoša.

13O tla otla naga ya Asiria ka leboa a e fediša. Motse wa Ninibe o tla o fetoša marope le lesehla, lehlokameetse.

14Ke mo go tlago robala mehlape ya diruiwa le diphoofolo tša mehutahuta. Maribiši a tla robala dikokwaneng tša wona, a lla mafasetereng; magokobu a tla re gwaa, gwaa, direpoding. Dikota tša mesedere tša meago ya wona di tla be di hlomotšwe.

15Ke tšona tše di tlago hlagela motse woo badudi ba wona ba dulago ba iketlile le gona ba bolokegile. Batho ba gona ba bona nke motse wa bona o feta metse yohle ya lefase. E tlilo ba lefelo le le ngadilwego, letšaba la diphoofolo tša lešoka. Bafeti bohle ba tsela ba tla o kgotsa ka molodi, ba šikinya dihlogo.

← Chapter 1 Jump to: Chapter 3 →