2 Corinthians 13

Sukuma 2019

← Chapter 12 Jump to:

1Ūlū nalize koi, lūkūbiza lūkangala lo kadatū ū lwenūlū; būlī mhayo shiigelile goolechiwe na bakaanīji babīlī nūūlū badatū, hū gūmanīke ū būng'hana wago.

2Naamalile kūmuwīla, nī haha nūūlū īkī natīko koi, nalīhaya gīt'ūmo naalī naalekile nūmuwīla aho naalī nizile koi ū lūkangala lo kabīlī; nalībamanya ng'hana ng'hana abo bakwītaga shibi, pye na a bangī, gīkī ūlū nalize ī hangī, natikūmbīlījaga.

3Īkī mukūkoobaga shimanīkījo sha gīkī ū Kilisito akūyombaga kūbītīla mulī nene, managi gīkī, atī ngokolo na hado yaya ū kū bing'we, alīyo alī na būdūla ū mu bing'we.

4Na ng'hana akakong'wa ha nsalaba mu būgokolo, alīyo ī haha alī mpanga kūlwa būdūla bo ng'wa Mulungu; hama īlī ng'hana gīkī ū mulī wei tūlī bagokolo, alīyo ū kū bing'we tūkūbiza bapanga hamò nang'hwe kūlwa būdūla bo ng'wa Mulungu.

5Igīsīlījagi bing'we benekīlī mubone ūlū mulīmo ū mu kūzunya; hamo mutamanile gīkī ū Kilisito alīmo ū mu bing'we? Numho jibize jimulemeelile ī nzīla jakwe!

6Alīyo nalisagīlwa mukūdeeba gīkī, a bise jitatūlemeelile ī nzīla jakwe.

7Ī haha tūlīnomba ū Mulungu mutizīīta mhayo gose gose gwabūbi; ītī kūlwa gīkī a bise tūbonwe tūdūgije kūshimīzīla ū mu nzīla jakwe, alīyo a bing'we ītagi dūhū ī yawiza, nūūlū tūkabiza a bise gīkī jitūlemeelile ī nzīla jakwe!

8Nguno a bise tūtīko kwīta mhayo gose gose ūyo gwipūganije nayo ī ng'hana, tūkīītaga īyo yīmīīlile ha ng'hana dūhū.

9A bise tūkūyega nūūlū tūgogoloha, shitange a bing'we mubize na būdūla; nīyo ū būlombi wise būlī gīkī mubize bashikanu.

10H'ī nguno yene ī haha aho natīko koi nalīng'wandīkīla ī mihayo yenīyī, gīkī ūlū nalize natizūbūtūmamīla mu būkalī ū būdūla ūbo Seeba waninha; nguno waninha kūlwa kūzenga, ītī kūsambagūla.

11Ū gwa kūmalīja bang'wise ikalagi mhola, ikondelagi, nīyo ng'wihūgūla; bizagi na būsangī ū mu maganiko, na mubize banhū ba mhola. Ū Mulungu wa būtogwa na mhola akūbiza hamò ning'we.

12Igīshagi bing'we kū bing'we mu kwibbipa kwela.

13Pye a beela balīmugīsha.

14Shigongo sha ng'wa Seeba Yesu Kilisito, nū būtogwa bo ng'wa Mulungu, hamò nū būsangī bo ng'wa Moyo Ng'wela, shibize hamò ning'we bose: Alichene.

← Chapter 12 Jump to: