2 Timothy 1

Sukuma 2019

Jump to: Chapter 2 →

1Nene Paulo ntūng'wa wa ng'wa Kilisito Yesu, kūlwa būtogwa bo ng'wa Mulungu, gīt'ūmo kūlī kwisagīlwa kwa būpanga ūbo būlī mulī Kilisito Yesu.

2Kūlī Timotheo ng'wana wane ntogwa. Shigongo na wiza na mhola shibize hamò nang'ho kūfuma kūlī Mulungu Sīswe, na kūlī Kilisito Yesu Seeba wise.

3Nakūnūmbaga Mulungu ūyo nakanamyaga nang'holò neela, gīt'ūmo bakūlūgenji bane bīītīlaga. Nataalī ū koya ū kūkwizūkwa ūlū nalīlomba līīmi na būjikū.

4Na hangī nataalī nūshizūkwa ī shisoji shako, hūna lūūlū nalī na ng'hūmbū no ja kūkūbona nayege.

5Nū kūzunya kwako ū kwa ng'hana nakūkwizūkagwa, ūko kwalī mulī mamayo Loisi ī kwandya, na mulī noko Eunike; ūko namanile hape gīkī nū mulī bebe kūlīmo.

6Hūna lūūlū kūlwa mhayo gwenūyū, nalīkwizūkīja gīkī, ī shakwinha sha ng'wa Mulungu īsho ūkanukūla kūfuma aho nakakūtūūlīla makono, shizalabanyage shandye kūtūmama.

7Nguno ū Mulungu atatwinhile moyo gwa booba, alīyo gwa būdūla na būtogwa na masala madeekanu.

8Hū kūhaya yaya ū kūding'wa minala ū kūnkaanīla ū Seeba wise, nū nene ūyo nalī ntungwa kūlwa nguno yakwe; alīyo zunyaga ū kūbiza mo ū mu būsangī bo kūluha kūlwa nguno yajo ī Ng'hūlū Jawiza, mu būdūla bo ng'wa Mulungu,

9ūyo watūpīja. Hangī watwitana mu kwitana kwela, ītī kūlwa wiza bo shītīle shise; alīyo kūlwa kasolele kakwe na shigongo shakwe, gīt'ūmo atwinhīlile mulī Kilisito Yesu kūfuma kale, kūko ikanza lītaalī kwandya kūbiza ho.

10Ūsho ī haha shamalile koolechiwa kūlwa nguno ya kwilonga kwakwe ū Kilisito Yesu mpīja wise, ūyo wakwīngije ū kūcha, wenha būpanga na būtūūcha mu nzīla ya Ng'hūlū Jawiza.

11Ū nene nakatūūlwa kūbiza nkumūcha wajo ī Ng'hūlū Jawiza jenījo, na ntūng'wa na nangi wa kūjilanga kū banhū.

12H'ī nguno yene nakūluhaga gīkī, alīyo natūding'wa minala īkī nandeebile ūyo nansanije, hama namanile hape gīkī adūgije kūshilang'hana īsho nashibīka kūlī we, kūshisha lūshikū lwenūlo.

13Īyūmīīlage ī mihayo īyo wa kūfuma kūlī nene, nguno īlī mu kwihela kwa kūgunanha, ilang'hanage mu kūzunya na būtogwa mulī Kilisito Yesu.

14Ī shawiza īsho ūbīkījiwe, shilang'hanage mu nguzu ja ng'wa Moyo Ng'wela ūyo akwikalaga mu bise.

15Ūmanile gīkī pye a bana Asia banipeelile, a ba Figelo na Helimogene balī bamò babo!

16Ū Seeba ni īchīlage shigongo ī kaya ya ng'wa Onesifolo, nguno ng'hangala ningī walūniifuujaga, hama nū būtungwa bone atabūbonelile minala.

17Nguno na a haho wiza Lumi akashikīla kūnikooba mu būkomeezu, kūshisha ūnipandīka.

18Ū Seeba ni ang'winhage kūchīlwa shigongo ū kū būtongi bo ng'wa Seeba ū mu lūshikū lwenūlo. Nīyo nū bebe wīmanile ī mihayo īyo wanibeegejaga ī Efeso.

Jump to: Chapter 2 →