Ephesians 1

Sukuma 2019

Jump to: Chapter 2 →

1Nene Paulo ntūng'wa wa ng'wa Kilisito Yesu, kūlwa būtogwa bo ng'wa Mulungu. Kū beela ba Efeso, abo banzunije Kilisito Yesu.

2Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito.

3Akumīlījiwe ū Mulungu, ū Ise wa ng'wa Seeba wise Yesu Kilisito; ūyo mulī Kilisito atwīlūkīlile mbango jose ja Kiimoyo, kūlwa kikalīle ka ng'wigūlū.

4Nguno ū mulī ng'wenūyo, ū Mulungu atūsolile kūfuma kale kūlwa būtogwa bokwe; kūfuma aho sī ītaalī kūseeng'wa, atūsolile gīkī tūbize banhū beela, na batī na shilingo kū būtongi bokwe.

5Kūfuma kale ū Mulungu ahelile gīkī, tūbize baana bakwe mu nzīla ya ng'wa Yesu Kilisito, kūlenganīla nū wiza bo kasolele kakwe.

6Ū gwenūyo agūhelile kūlwa kūkumīlījiwa kw'ikūjo lya shigongo shakwe, īsho shikang'winha kūtūgaliila no no no gīko ū mulī we ū Ntogwa.

7Ū mulī wei ū ng'wenūyo, tūlī na būkomoolwa kūlwa mininga gakwe; hū būlekejiwa bo shibi shise, gīt'ūmo būlī būsabi bo shigongo shakwe,

8Īsho akatwīlūkīla, shigongo shitaale no, shikīlile witegeleja na kiganikīle kose!

9Nī mbisīla ya kahelele kakwe ūtūmanīkīja, gītūmo būlī ū wiza bokwe, ūbo awiganikile ū mulī Ng'wenūyo.

10Gītūmo naakalongeje kakwe ahelile gīkī, ūlū lyūshikana ī likanza, pyī ī shikolo akūshitūūla ha sīlīlī ya ng'wa Kilisito; pye shibize mulī we, īsho shilī ng'wigūlū nī shisho shilī mu sī.

11Hama nīyo ū mulī wei tūsolilwe kūfuma kale, kūlenganīla na kahelele kakwe wei ng'wenekīlī, ūyo akatongeelagwa na kalamulīle ka maganiko gakwe.

12A bise abo tūlī batongi kūng'wisagīlwa ū Kilisito, tūsolilwe gīkī tūbize ho kūlw'ikūjo na kūkumīlījiwa kwakwe.

13Nū kū bing'we īlī gīko ū mulī we, aho ng'wagwigwa ū mhayo gwa ng'hana, ī Ng'hūlū Jawiza ja būpīji wing'we ījo mukajanukūla hūna ng'ūnzunya, mukameng'hwa na Moyo Ng'wela wa kwisagījiwa.

14Hū ng'wene ūyo alī lūmeng'ho lwa wingīji wise kūshisha būshikīīle ū būkomoolwa wa banhū bakwe kūlwa kūkumīlījiwa kw'ikūjo lyakwe.

15Hūna lūūlū, īkī nane naajiigwile ī mhola jing'we ūmo munsanīgije ū Seeba Yesu, nū būtogwa wing'we ū kū banhū bose,

16nakūlūmbaga gwa kūlwa nguno ying'we. Nīyo ū mu kūlomba kwane nataalī gete ū kūng'wība.

17Nakūnombaga ū Seeba w'ikūjo, ū Mulungu wa ng'wa Seeba wise Yesu Kilisito, ang'winhe moyo gwa witegeleja, na amukundūlīle, mundeebe gete ūmo alī.

18Na a miso ga mung'holò jing'we gatiimīlwe, muwitegeleje ūmo būlī ū wisagīja bo kitanīle kakwe, nū mumo būlī ū būsabi w'ikūjo lya wingīji bokwe ū kū beela.

19Mubūmane nū mumo būlī ū būtaale wa būdūla bokwe ū kū bise abo tūlī bazunya, ūbo būkūtūmamaga kūlenganīla na katūmamīle ka nguzu jakwe,

20Ījo akajitūmamīla ha kunhimbula Kilisito kūfuma mu bafu, ūng'wigasha ng'wigūlū kū nkono gwakwe gwa būlyo,

21kwigūlya no no no kūkīla mabūsugi gose, na mabūtaale, na mabūdūla, na mabūtongeeji; na būlī lina lyose lyose īlo līkahayiagwa, ītī ng'wikanza īlī dūhū, alīyo nī līlo līliza.

22Hūna ū Mulungu ūshitūūla pyī ī shose ha sīlīlī ya mhambala jakwe, hanuma ū ng'wene ūng'wīta kūbiza Ntwe gwa shose kūlwa kanisa,

23Īyo īlī mīlī gokwe, hū būshikanu bokwe ūyo alī nshikanya wa yose mu shose.

Jump to: Chapter 2 →