Galatians 1

Sukuma 2019

Jump to: Chapter 2 →

1Nene Paulo ntūng'wa, ūyo būtūng'wa bone būtafumile kū banhū, nūūlū natatūmilwe na munhū. Alīyo natūmilwe na Yesu Kilisito hamò na Mulungu Sīswe, ūyo akanjūūcha ū Yesu kūfuma mu bafu;

2na a badūgū a bose abo balī hamò nane: Kū kanisa ja Galatia.

3Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito;

4ūyo akifunya wei ng'wenekīlī kūlwa nguno ya shibi shise, ūshikīlīja īyo yalī īhelilwe na Mulungu Sīswe, kūlwa kūtūkomoola twīnge ū ng'wikanza lya būbi ī lya shikū īji.

5Ikūjo lībize kūlī Mulungu shiku jose: Alichene.

6Nalīkumya no ū kūbona gīkī ng'wanekile wangū gīko ūyo akang'witana kūlwa shigongo sha ng'wa Kilisito, ng'ūgalūkīla mbika yīngī ya ng'hūlū jawiza.

7Gwike ī jenījo jitī Ng'hūlū Jawiza; alīyo balīho dūhū banhū balebe bandije kūmuyebenganya, nguno batogilwe kūjihūbya ī Ng'hūlū Jawiza ja ng'wa Kilisito!

8Alīyo nūūlū tūkabiza bise, nūūlū ūbiza malaika wa kūfuma ng'wigūlū wiza kūmulomeela mbika yīngī ya ng'hūlū jawiza ījo tūtamulomeelile bise, ū ng'wenūyo ni azumagwe!

9Ūmo tūhayīlile kūfuma ha wandījo, nī haha h'ūmo nalīhayīla hangī; gīkī, ose ose ūyo ūmulomeela mbika yīngī ya ng'hūlū jawiza kūleka ījo ng'wajanukūla, ni azumagwe!

10Ī gīsī ū nene nalīkooba kī, kūkumīlījiwa na banhū, nūūlū na Mulungu? Nūūlū hamo nalīkooba kūyeja banhū? Ūlū ni nataalī nūkooba kūyeja banhū ni natī nsese wa ng'wa Kilisito na hado yaya!

11Leki namuwīle badūgū bane gīkī, ī Ng'hūlū Jawiza ījo nakamulomeela, jalī jitafumile kūlī munhū.

12Natajanukūlile kūfuma kūlī munhū, nūūlū natajipandīkile mu nzīla ya kūlangwa; alīyo mu nzīla ya kūkundūlīlwa na Yesu Kilisito.

13Nguno a bing'we ng'wajiigwaga ī nhūngwa jane ūmo jalī a makanza gene, gīkī aho naalī nataalī nadimile a kazunīje ka Bayudaya, nīluhyaga na kaluhīje kangī nako ī kanisa ya ng'wa Mulungu, hama nīyo nīkenaagūlaga kībi no!

14Ū mu kazunīje ka Bayudaya naalī kū būtongi; ū ng'wihanga lya ng'wise naalī nabalebije bingī a b'ilika lyane, nīyo naalī njangīīzu no ū kū malange ga bakūlūgenji bane!

15Alīyo ūyo walī anisolile kwīngīīla kale, kūfuma mu nda ya ng'wa mayū, aho gwanyeja gwa kūnitana kūlwa shigongo shakwe,

16akanoolekeja ū Ng'wana wakwe; nūmona. Hūna ūnīīta kūbiza wa kūja nakūnkumūchaga mu mahanga. Ī likanza lyenīlo natandije kūja nakūbūgīlīja banhū.

17Natajile nūūlū Yelusalemu, ū kū banhū abo baalī binhwa kwandya ū nīmo gwa būtūng'wa aho nataalī ū nene, alīyo nakaja kū sī ya Balabu, hanuma nūshoka hangī Damasko.

18Yahayūbīta myaka idatū hū nūja ī Yelusalemu gīkī nakibone na Kefa; nikala nang'hwe ikanza lya shikū ikūmi n'itanò.

19Alīyo a batūng'wa a bangī natibonile nabo, ūlū atī Yakobo dūhū, ū nzunaye wa ng'wa Seeba.

20Managi gīkī ī yenīyī nalīng'wandīkīla kū būtongi bo ng'wa Mulungu, natūlomalomaga nūūlū hado!

21Nakīīta nūja kū mapandī ga Sulia na Kilikia.

22Nīyo ū būshū bone boolī būtaalī nū kūmanīka ū mu kanisa ja ng'wa Kilisito ī ja mu sī ya Būyudaya.

23Bakandya kwigwa lūkumo lone dūhū gīkī, “Ūyo walūtūluhyaga ī kwandya, ī haha alīkūlomeela ū kūzunya ūko walūkūkenaagūlaga”.

24Būyūnkumīlīja Mulungu kūlwa nguno yane.

Jump to: Chapter 2 →