Nahum 3

Sukuma 2019

← Chapter 2 Jump to:

1Nzengo gwa babūlagi ba banhū, gūlī mu kwihīga kūtaale; nzengo gūsugilwe būlomolomo, gūtamalaga būsambo, na batashilaga mo biboneelwa!

2Tambū jikūkaanagūkaga moi, yoge ya madandali gakūpilingitaga, mitindo ya falasa jikūgidingaga, miding'himo ya magogoteni ga būlūgū gakūligityaga!

3Bashilikale bakwilibanhyaga, malūshū gakūng'weng'wetaga, na machimu gakūteemagīlaga! Banhū bingī no balīgulaajiwa, matūūgo na matūūgo ga bafu, mibimba ītī na būbalīle, a banhū bakwipamaga mibimba.

4Yose yenīyī īlī kūlwa nguno ya wīmīlīzu bo ng'wa malahya ntaale, ū nduti wa balogi na balogi, ūyo walī agahūmbūūlile mahanga mu nguzu ja būmalahya bokwe, na a banhū wabadutaga mu būdūla wa būlogi bokwe.

5Ū SEEBA wa Būdūla bose alīhaya, “Nalī na wilwisha nang'ho, nakūkūkunūja ī līlinda lyako līkūkundīkīje ū kū būshū wako. Ī dūūhū yako nakwīyoolecha kū mahanga, mabūtemi gakwīyiloleela Ī minala yako.

6Nakūkūmatīīla būsoso, nakūkwisaaba kūbiza wa kūdalahwa nakwīte kūbiza wa kūgekemaja banhū.

7Būlī bene bakūyūkūbona bapeela; kūnū bakwiwīlaga, ‘Ī Ninawi ītī na shose shose yabipile no, nani akwīlīla?’ Nakūpandīkīla halī ū wa kūkūlūngūja?”

8Ū bebe hū ū kūgūheeba ū nzengo gwa Tebesi, ūyo gwalī kū ng'hilimvwa ya mongo gwa Nile na gūpīndiwe minzī? Ū mongo hū gwalī ngītīli ya nzengo gwenūyo, a minzī ndugu ya kūgūkīngītīīla.

9Gwapandīkaga nguzu ningī no kūfuma sī ja Esiopia na Misili; Puti na Libya jal'isangī nago.

10Alīyo nahene gūkading'wa a banhū baamo būsaamiwa. A beleele batwalagwa kū nhūng'wanhīlo ja mayīla, baakataalīkwa hasī baatandagūka. A batongeeji baamo būyūgabanhwa bo kweselwa mbale, a banhū ba ng'wene a bataale būtungwa nhendele pye a bose.

11Alilūūlū, nū bebe ūkūng'wa shikoji shikūkole; ūkūja hanhū kwibisa, ūkūmpeela ū ng'wanishi ūje ūkūkoobaga ha kūpīlīla.

12Ī ng'hambī jako ja kūpīlīla jilī gītī mitiini īyo na matwajo gayo ga kwandya gaapile, ya kūhayūtinginyiwa a matwajo gūyūmodagūka gaashikīla mu milomo ya balyi.

13Balolage a bashilikale bako, pye bakīma! Ī mibita ya sī yako īlī ng'waje ū kū banishi; A malugalīlo gayo ganogotejiwe moto.

14Dahagi minzī ng'wibīkīle kūlwa makanza ga kūgobanīlwa banishi, jiguzuhyagi ī ng'hambī jing'we ja bashilikale! Lubagi būlongo na magūlū ging'we mubeeje madafaali, jichibagi ī ndugu ūmo jitandūkile!

15Ū ng'wenūmo h'ūmo gūkūmulīīla ū moto; līlūshū līkūmumalīla ng'wenūmo, nīyo līkūmukenaagūla gītī bana ng'hūmbī. Ibyalanagi gītī ng'hūmbī, mukwīle gītī njige!

16Abo mukisūlūgījaga nabo bingī no, nīyo batī ba kūbala, leba nī sonda. Alīyo bakīlyaga ī sī gītī njige hūna baalala bajile bīleka pe.

17A batongeeji bing'we babange njige, a basugi bing'we batikīlile na madaale ga njige, ūmo jikalamatīlaga ha ndugu mu lūshikū lwa mbeho; gwike lyakūhayūsasanuka ī līīmi jikalalaga jaaja, alīyo atīho wa kūmana ūko jikajaga.

18Ee bebe ntemi wa Ashulu, a badīīmi bako balaalile tūlo, a banikūlū bako balambalalile būlembeela. A banhū bako basalang'hanīlile kū ngūlū, na atīho wa kūbakuminga.

19Atīho wa kūkūpīja a malonda gako; Ī ligulaagīje lyako līkūkūbūlaga. Būlī ng'wene ūyo akwigwaga ī mihayo yako akūtūlaga ng'hūbi kūlwa kūgwishiwa kwako, nguno nani ūyo ataalī kūbūloja ū wiboneeji wako wa shikū jose?

← Chapter 2 Jump to: