Obadiah 1

Sukuma 2019

Jump to:

1Shakoolechiwa sha ng'wa Obadia. Ū Seeba MULUNGU alīhaya mhayo ūyū kūlwa sī ya Edomu; Twigwile mhayo kūfuma kūlī SEEBA: Nhūng'wa jatwalilwe kū mahanga; jilīhaya gīkī, “Būūkagi tūnsange tūkilwishe būlūgū nang'hwe.”

2“Managa gīkī nakūkūdooheleja ūbize ndo wa bado ū mu mahanga, ūkūdalahwa kībi no nīyo.

3Ū wikumīlīja wa ng'holò yako būkakūlemba lembaga; bebe ūyo ūkikalaga mu mahalo ga mawe, ī kaya yako wītūūla kūle kwigūlya, hūna ūyiwīla bebe ng'wenekīlī, ‘Nani akūnicha hasī ū nene?’

4Ū bebe nūūlū īkī ūkalalaga winunga gītī ng'hoonà, nī chanjo shako ūzengelile ūko jilī sonda, nakūkwicha hasī nene.” Alīhaya SEEBA.

5A biibi ūlū būkūsanga, basambo biza būjikū kūkūdumīla, bakūkūlekela mibi no! Batiiba gīt'ūmo batogelilwe dūhū? Nūūlū bahūlūji ba mizabibu būkūsanga, batūkūlekeelela zabibu ngehu ja kūpūmbīīla dūhū?

6Ee, Esau, ūkūfunangūlwa kībi no, Ī sabo ja wibīkīja wako jikūjanwa pye!

7A biyo abo mulī būlagane būmò nang'ho bakūkūkandīkīja kū lūbīmbī; banwani biyo bakūkwibanga bakūgwishe; banhū abo ūkalyaga nabo shilīwa shako bakūkūtega ikila, alīyo ūtūdūla ū kūliitegeleja.

8Ū SEEBA alīhaya gīkī, “Ū mu lūshikū lwenūlo, natūbayagaja a banhū ba masala ū mu Edomu, a badeeba ū mu lūgūlū lwa ng'wa Esau?”

9Ee Temani, a bagosha ba mbagashūūla bako bakūbbaha; ū ng'wikanza lya kūbūlagwa būlī munhū akūsīnzwa ū mu lūgūlū lwa ng'wa Esau.

10Ūkūgooka kūlwa būbi ūbo wang'wītīla ū ng'wanong'wing'we ū Yakobo; ūkūkenaagūka ilalī.

11Ū mu lūshikū lwene ū bebe walī wīmīīla ha mhūjo, banhū babūbi bakūsolaga sabo jakwe, mahanga ga kūle gūyingīla ū mu mibita yakwe, kwītūlīgīja mbale ī Yelusalemu, nū bebe walī gīt'ūlī ūmò wabo.

12Yalī ītakwigeleelilwe kūng'wisesa ū ng'wanong'wing'we ū mu lūshikū lwa mayanga gakwe; nūūlū ū kūyega ū mu lūshikū lwa kūkenaagūlwa banhū ba Yuda; yaya nūūlū kwikumīlīja gīko ū mu lūshikū lwa kūluhiwa kwabo.

13Yalī ītakwigeleelilwe kūbīta ū mu mibita ya banhū bane mu lūshikū lwa makoye gabo, nūūlū kūbisesa kūlwa mayanga gabo ū mu lūshikū lwa makoye gabo; yaya nūūlū kūsola sabo jabo ū mu lūshikū lwa kūluhiwa kwabo.

14Yalī ītakwigeleelilwe kūbitegeela ha nzīla maakà, na kūyūbabūlaga abo balīpeela, nūūlū kūbalodeela abo balīpūlūgūka ū mu lūshikū lwa kūluhiwa kwabo.

15“Ū lūshikū lo SEEBA kūlwa mahanga gose lwegeelaga. Ūmo ng'wītīla, na a bing'we mukwītīlwa gīko; ī shītīle shing'we shikūmushokela ha mitwe ying'we.

16Ūmo bing'we mukang'wela ū mu lūgūlū lwane lwela, h'ūmo bakūng'wela na a banhū ba mahanga pye a gose; nīyo bakūmanūng'wa bishokeela hangī na hangī; kūshisha babize gītī baalī batīho nūūlū hado.

17Alīyo ū mu lūgūlū lwa Sayuni būkūbiza mo būpīji; ū loi lūkūbiza lwela, nī numba ya ng'wa Yakobo Īkūbūdima ū wingīji wayo.

18Ī numba ya ng'wa Yakobo Īkūbiza moto; ī ya ng'wa Yosefu yūbiza lūlali. Lelo ī numba ya ng'wa Esau ī yene īkūbiza mapalala, bakwībbiisha īnogotele īshile gete. Atūsaaga nūūlū wa ngota ū mu numba ya ng'wa Esau.” Alīhaya SEEBA.

19Banhū ba kūfuma Negevu bakūjidima Ī ngūlū ja ng'wa Esau, banhū ba kū mbūga ya Shefela bakwīdima ī sī ya Bafilisiti. Bakūgadima na a malaale ga mu Efulaimu na Samalia; Benjamini ng'wene akūsola Gileadi.

20Ī ligelè lya Baisilaeli abo baasaamiwa alīyo balī mu Kanaani, bakwīdima ī sī kūjūshika mhandī ja Zalefati; abo baasaamiwa kūfuma Yelusalemu hama ī haha balī Sefaladi, bakwīdima ī mizengo ya Negevu.

21Bagunanhi bakūlinha kū lūgūlū lwa Sayuni; bakūbiza basugi mu ngūlū ja Esau. Hama ū būtemi būkūbiza bo ng'wa SEEBA.

Jump to: