Philemon 1

Sukuma 2019

Jump to:

1Nene Paulo ntungwa kūlwa ng'wa Kilisito Yesu, na ndūgū Timotheo. Kūlī ntūmami ng'wichiswi ntogwa Filimoni,

2n'ilūmbū lise Afia, hamò na nshilikale ng'wichiswi Alikipo; nī kanisa īyo īkibilingaga mu kaya yako.

3Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisito.

4Nakūnūmbaga ū Mulungu wane, būl'ikanza ūlū nalīkūhaya ū mu kūlomba kwane.

5Nguno nakūjiigwaga ī ng'hūlū ja kūzunya kwako, nū būtogwa wako ūmo ūntogelilwe ū Seeba Yesu, na a beela pye a bose.

6Na lūūlū nalīkūlomba ū būzunya wako ūbūtūmamīle mu būsangī, hūna ūkwīdeeba mu ng'hana pyī ī yawiza īyo īlī yise mulī Kilisito.

7Naayegile no, hangī naalūngūjiwe no ndūgū wane, kūlwa būtogwa wako; nguno ojizalabanije īng'holò ja beela.

8Hūna lūūlū, nūūlū īkī ū mulī Kilisito nalī nabo ū būgimu bo kūkūlagīla īyo yigelile wīyīte,

9alīyo īlī yawiza nakūlombe, kūlwa nguno ya būtogwa. Ū nene Paulo na būnamhala bone gīkī, ūyo ī haha nalī ntungwa kūlwa ng'wa Kilisito Yesu.

10Nalīkūlomba kūlwa nguno ya ng'wa Onesimo, ū ng'wana wane mulī Kilisito; ūyo naamyalile mu būtungwa bone.

11Na ng'hana walī atī na solobo ū kūlī bebe ī kwandya; alīyo ī haha alī na solobo ū kūlī bebe nū kūlī nene.

12Ū munhū ng'wenūyo nūūlū īkī nalīkūshokeja; alīyo ī chene ū wei alī būpanga bone gete.

13Nīyo naalī natogilwe kwikala nang'hwe nene, ayūnigunanha ha ng'wanya gwako ū mu nīmo gwa Ng'hūlū Jawiza, aho nataalī natungilwe.

14Gwike naabonile ītī chiza nīīte mhayo gose gose aho nataalī kūgamana a maganiko gako; ūtizīīta mhayo gwawiza mu būhadīkījiwa, alīyo wīte mu kwifunya.

15Nguno hamo h'ī chene akakwīngīla ng'wikanza iguhī, gīkī abize wako shikū jose ja shiku jose;

16alīyo ītī mu būsese. Ī haha akīlile a ha būsese; ū kūlī nene alī ndūgū ntogwa, lelo ū kūlī bebe na kūtinda ho, ū mu mīlī nū mulī Seeba!

17Hūna lūūlū, ūlū ūlīnisanya gīkī nalī ntūmami ng'wiyo, ng'wanukūlage gītī ūlīnanukūla nene.

18Hama nūūlū wakūhūba mhayo gose gose, nūūlū hamo alī na būgasa kūlī bebe, būbalīlage kūlī nene.

19Nene Paulo nandīka na nkono gwane ng'wenekīlī gīkī nakūlīpa, natī na nguno ya kūhaya gīkī ū bebe hū ūlī na būgasa ū kūlī nene.

20Alichene ndūgū wane, nigunanhage mu gīko ū mulī Seeba, ūbūyeje mulī Kilisito ū būpanga bone.

21Nalīkwandīkīla mu kūsanya gīkī ūkwīta na kūtinda ūmo nalīkūwīlīla, nguno nabūmanile ū wigwi boko.

22Hama nīyo nalisagīlwa nakūshoshiwa kū bing'we kūlwa kūlomba kwing'we; ali lūūlū, nilonja longejage na ha kūshikīla.

23Ū Epafra ū ntungwa ng'wichane mulī Kilisito Yesu alīkūgīsha,

24na a batūmami bichane a ba Maliko nū Alisitako nū Dema, hamò nū Luka, nabo balīkūgīsha.

25Shigongo sha ng'wa Seeba Yesu Kilisito shibize hamò na moyo gwako: Alichene.

Jump to: